Un selekshon di palabra i ekspreshon. Deel 2

Hustisia

Hues, abogado	Huzga, studia lei
Sospechá, akusá, kondená	Kriminal, ladron
Polis, reshèrs (recherche)	Burdugu, saka liber
Investigashon	Hura, pena kapital
Delitu, krimen	Prueba, proseso
Prizòn, wangalan	Tistigu, huisio final
Piskalat, mirashelu	Tribunal Supremo

Lo bo ta huzgá dje mes manera ku abo a huzga. Nan ta konsidera ku tur hende konose lei, pero generalmente ta un abogado mester pleita un kaso pa su kliente. Antes horkamentu tabata pena kapital na Korsou. Mientras polis ta investigando un hende su kaso, e ta un persona sospechá; dilanti di hues e ta persona akusá i ora hues pronunsiá sentensia e ta kondená o liber.

Lei pa un, lei pa tur. Ma tin be nan sa bisa ku lei ta únikamente pa hende sokete. Ma ta lei! (klaro, ku siguransa). Hustu ta paga pa pekadó. Bo por hura i firma (bo por tin sigur). Esta un kastigu (molester,

[p. 37]

trabou) bo ta dunami! Pober Dochi ta manera katibu kastigá, shon rogá (hardi bai e tin ku supliká humildemente pa logra algu).

Anchu p'abo, smal p'ami ta lei di trèktu (midimentu ku dos midí). Lei torto (inhustisia). Si un tistigu hura falsu, e ta haña kastigu. Hotel Mirashelu ta na Kurá Spé. Proseso di krimen seksual sa ta ku porta será. Manuel no tin lei ku nos (e no ta gusta nos). Si un tata hura su yu, ke men ku e ta menas'e ku kastigu.

Un Henri-n'-ke-bai-profos ta un pòpchi di palu o metal; su man i pia ta lòs, di moda ku por move nan ku un pida liña ku tin pegá na nan. Profos tabata prizòn militar. Leonita ta hura Dios ku e no a komete ningun delitu (pretende fuertemente). Hopi be un hues o un abogado tin ku konsulta e desishon di Tribunal Supremo tokante un detaye di lei.

Un hues ta keda nombrá pa henter su bida, sin tin mester di duna kuenta na ningun hende. Si bo haña ku un persona a ofendebu, bo por demand'e. Tin delitu ku por ta tratá únikamente despues di un akusashon. Tin derecho sivil i derecho kriminal (penal).

Polis ta mantene òrdu. Si un ladron hórta den anochi, bulando kurá o drentando un terenu privá, su kastigu lo ta oumentá. Si den un proseso no tin prueba legal, esun akusá ta sali liber pa falta di prueba. Na huisio final ningun hende no por kore buska abogado. Nan ta pretende ku krimen perfekto no ta eksisti; sinembargo aki na Korsou a sosode krimen ku nunka nan por a solushoná.