Un selekshon di palabra i ekspreshon. Deel 2

Hari i yora

Alegria, tristesa, ferdrit	Yoradó di morto
Kontentu, felis	Alegre (ku dos aden)
Basha na harimentu	Chansa, kanta kokoyoko
Sonreí, sonrisa	Kara será o abrí
Saka djente, rèk lep	Felis konènchi, grita hari

Laga di ta pishi na wowo (yora) pa ko'i loko. Aw'i wowo (lágrima). Drama lágrima. Yora sanger (mashá duru). Yora malai (keha enormemente). Hari te pishi karson, hari te yora, hari te lor'abou. Mi no ta konfia su harí falsu. Hari chikí-chikí. Yora awa kuater-kuater.

Esun ku no yora, no ta mama (bisa loke bo ke, pa hende sa). Mihó un yu yora ku su mama yará. Makaku su wowo ta hundu, e ta yora trempan (mira difikultat di antemano i tuma medida na tempu). Sigui asina ei; aworó lo bo yora (lo duelbu). Yoradó no sa yora largu (tristesa no ta pa semper).

Mirando un pelíkula di Cantinflas e públiko sa basha na grit'i harimentu. Bo ke ku bo ta mashá grasioso, pero bo mester kishikimi pa mi hari. Alegria di shon ta tristesa di kriá (alegria di un ta tristesa di otro). Alma na pena, kurpa na pena. Un sonrisa por hasi milager. Un bon bendedó mester sa sonreí ku su wowo tambe. Mi ke ku Mani ta poko alegre (kontentu); el a dal un par di beter. Maria su kara ta será manera un bom.

Un harí di hanch'i Punda (mahos, duru i barata). No munstra un hende mal kara. Ta di kon bo kara ta será asina? Ban mira, abri kara. Pedritu ta sin komplimènt (e no ta tene kuenta ku reglanan di kortesía). Djente blanku no ta kurason. Hasi algu pa tene un hende su kurason kontentu. E pober kriatura a rèk lep ora nan a kita su pòpchi fo'i dje.

[p. 27]

Gachi a hari su morto ora el a tende kiko a pasa. Kome djente dl rabia. Si bo haña un bon raòbrt, bo por kanta kokoyoko. Un persona den su hehébe (kontentísimo). Loko di kontentu (mashá kontentu). Chebu a pasa mashá trafat den su bida; pesei su kara ta halá asina.

Felis konènchi (mashá felis). Alegria no sa dura na kas di pober. Esta ferdrit (mahos) b'a keda den e shimis ei. Den kampaña pa elekshon tur polítiko ta kana saka djente. Djis un momentu tabatin un swenk di sonrisa den su kara. Un dia nan a bisa un tersio ku semper ta kana ku frenta será: ‘Sigui kana ku frenta será; a la largu nan ta kapas di kere ku bo ta un filósofo’.

Un bon tiradó (kontadó) di chiste (chasko) por buta hende hari te tene barika. Laga di ta (hasi) chansa; e asuntu aki ta serio. Jerry Lewis ta un artista kómiko. Komo nos pueblo ta gusta hari (kisas bulando pipa pa realiat i tristesa den bida), semper komedia tabatin mas éksito ku tragedia.