Un selekshon di palabra i ekspreshon. Deel 2

Transporte i trafiko

Outo, trùk, (outo)bús	Wil, tayer, chup
Konvoi, bapor, oroplanu	Gasolin, siya, brek
Trein, tranvia	Taxi (outo di hür)
Garoshi, dori, kitoki, shèrs, lando	Winshil, tap'i motor
Kabai, buriku, hamaka	Doshi di lusafè
Bòrchi, stashon, haf (porta)	Trapa gasolin tabla-tabla
Kochero, shafer (shofer)	Kanta wil, sera brek
Kaptan, piloto	Primi tròt, un brek lastrá
Krenwa, bisikleta (baiskel)	Basha pitu, dim lus
Motersaikel, skuter	Polis di tráfiko

For di chikitu mester siña tur mucha kon ta krusa kaya, pasobra awendia ta hopi burduga ku permit ta kore outo. Na Korsou nos tin ku kore na man drechi. Kaminda sa tin hopi tráfiko sa pone lus di tráfiko. Outo ta un bentaha grandi pa esnan ku ta biba na kunuku leu, pero desgrasia riba kaminda a oumenta. Tene bo winshil semper limpi, pa evita peliger. Si bo bateria baha, mester buska hende pa pusha o tou. Un maraka o un wabi ta un outo fròt i bieu.

Den un outobùs chikí hende ta keda manera saldinchi na bleki. Sinkuenta aña pasá bo por a konta outo riba dede; awor aki pushi ku kachó tin ko'i kareda. Taxinan ta depende prinsipalmente di turismo, boutiso, kasamentu i kualke kaso urgente. Ora un chabalitu haña un outo nobo, e tin ku saka su kareda, lubidando ku e ta fòrsa e motor.

Asina outo dal, hopi hende ta bai mira su number, pa nan hunga e

[p. 28]

number ei. Sa sosode ku un hende ta para na bòrchi te blikia, sperando konvoi. Si bo ke haña lugá di pone (parker, stashoná) bo outo na Punda, bo mester t'ei promé ku mitar di ocho mainta. Promé ayá mester a krènk outo p'e start; awor aki ta djis drei swich.

Esun ku kore ku kuidou no tin nodi di basha pitu i spanta hende riba kaya. 'Doshi di lusafè’ ta e nòmber ku antes nan a duna e outobúsnan chikí ku kurpa di palu. Kitoki, dori, garoshi, shèrs i lando a bai fo'i moda. Un outo grandi nan sa yama un lando, pasobra promé ayá tabatin lando di shon Bel, pa transporta un pareha ku ta bai kasa.

Riba Dempel sa tin hopi trùk ku sa hala karga pa e pakusnan den Punda. Ku krenwa nos ta hala santu, tera o pieda. Un merián ta un garoshi di dos wil ku trahadónan di den Klip sa uza pa hala karga. Perkura pa bo tin un djèk, pa kambia tayer ora bo chup bora. Buriku, kabai, bisikleta i motersaikel tin sia. Blendu hende ku lus brait ta falta di kortesia riba kaminda. E nòmber ‘konvoi’ pa outobùs grandi a origina den temp'i guera. Kared'i kabai, parad'i buriku (kuminsa ku masha fèrt i despues para di gòlpi) (tambe metafórikamente!). Buriku no por pusta ku kabai. Na aeropuerto di Hato oroplanunan ta subi i baha henter dia, transportando kantidat di pasahero.

Aseguro di outo a bira mas karo, pasobra tin hopi hende iresponsabel tras di stür. ‘Kòrta’ i ‘hisa benta’ ta dos maniobra sumamente peligroso. Bibida a kousa masha hopi dalmentu i desgrasia di outo; kansansio tambe. Na bahada di un seru bo por bati un friwil. Nan di ku Lamuerto ta drenta outo pareu ku bo. Antes tabata karga hende malu den hamaka di kunuku te Punda.