Mi lenga. Deel 2

[p. 35]

Di ocho lesaant.

Reyno seku
di kadushi, di sumpiña
ku solo i byentu so ta karisyá,
bo n' tin ni sombra
di un pal'i mansaliña,
pa mi hala un rosea,
sinta un ratu
sosegá.

Bo sedu,
bo sekura
ta kontagyoso.
Bo kurpa kayente ta duru,
t'e ta lastima.
Maske kwantu bo dòrna bo mes
ku anglo presyoso,
mondi bo ta keda,
semper huí,
despresyá.

Di Charles Boom

Reyno seku.

Generalmente un adhetivo ta pará tras di e sustantivo.

P.e. Kas shinishi, hende flaku, mucha gordo.

Pero tin algun ku por para dilanti o tras di e sustantivo.

P.e.: Un mucha dushi (dushi di figura, di aparensha).

Un dushi mucha (dushi di karakter, den trato).

Un bon hende (bon di karakter)

Un hende bon (di bon famia, di bon salí, di bon reputashon).

[p. 36]

Un galiña bunita (bunita di forma, di kara, di kurpa)

Un bunita galiña (pa duna mas énfasis, nos ta pone bunita dilanti)

Un hòmber balente (un hòmber ku kurashi, ku brio)

Un balente hòmber (un hòmber kurpa grandi)

Hende malu (malu na kama o den hospital).

Mal hende (hende di mal karakter, di mal kurason).

Un muhé pober (un muhé den nesesidat)

Un pober muhé (pa ekspresá dwele di e persona, nos ta pone pober dilanti) Kaminda e ta resaltá mas ta den ‘Pober dyabel’

Pero nos ta bisa. Mala higra, mala mucha mala lenga, di mala bayna.

Den kaso ku ta un adhetivo di materyal, nos ta agregá ‘di’ P.e. Un flur di betòn. Un kas di tabla. Un pòpchi di suku.

Seku

Un mucha seku (flaku, delegá).

Trata masha seku (sin grasya)

Mondi

Ku palabra bon (dushi) ta saka shimaron fo'i mondi. (Ku bon manera ta mansa e tipo di mas brutu) Yerba di mondi (yerba stinki, yerba shimaron).

Roza mondi. 1 Limpya terenu yen di infrow, datu i yerba stinki, pa planta o traha kas.

2. Kore bay masha duru. (El a kore te roza mondi). Ke men ku el a kore asina duru, ku su pianan a roza mondi!

Kadushi

No kome kadushi, bin limpya bo man den mi ka-

[p. 37]

bes. (No tumami hasi chòmbòn. No echa bo bayna, anto bin tira falta riba mi).

Byentu.

Byentu di kwaresma, byentu di seka maishi, (byentu fwerte den luna di mart).

Fleyt byentu. (Riba laman ora no tin byentu piskadó i nabegantenan sa fleyt, pa byentu bolbe lanta, di moda ku nan bark'i bela por move).

Sombra

1 E parti kaminda no tin klaridat di solo.

2. Fondo di bistí bow di shimis.

Djo tin myedu di su mes sombra.

(E ta spanta pa tiki kos).

Rosea.

Kwe rosea. (despwes di a traha duru o despwes di a pasa den problema ku didfikultat).

Kore duru te pèrdè rosea. (Hala rosea ku difikultat).

Un persona ku ta sufri di asma, tin rosea kòrtiku.

Un futbolista ku ta sigi hunga sin kansa, tin rosea.

Sosegá

Biba o traha sosegá (trankil).

Kas di sosyegu. (Kas pa hende byew pasa restu di nan bida).

Sedu (set)

Nos ta bisa: Sed'i awa, ma tambe set (sedu) so.

Nos ta sinti set, wanta set, kita set, mata set, pasa set, korta set (ku un krenchi awa).

Kurpa

Toni ta mata kurpa, pa e logra su deseo. (E ta traha mashá duru, hasi esfwèrso).

Mani ta un karpinté di awa dushi, pero e ta yuda su kurpa. (E ta hasi loke e por).

Un kos di kenta kurpa. (un beter).

[p. 38]

Un hende por sinti será di kurpa, pero si e ta bon di salù, e ta bay di kurpa tur dia.

Chofil a sera kurpa, pa wanta sla.

Ehèrsisyo.

1	Kwa ta e palabranan ku e poeta Charles Boom a uza pa deskribí e bista antipátiko di un mondi?
	Den kwa tempu di aña bo ta kere ku Boom a skirbi e poesia aki?
2.	Splika e diferensha den: Un pober muhé i un muhé pober.
3.	Manuel Piar tabata un gran hòmber, pero e no tabata un hòmber .......................................
4.	Kiko ta un byentu di kwaresma?
5.	Ki ora nos ta bisa ku un hende ta yuda su kurpa?
6.	Den kaso ku un persona ta spanta pa di menstu kos, nos ta bisa ku e tin meydu ..........................................
7.	Yerba di mondi ta yerba sh .......... o yerba st .............
8.	Si un persona tratabo sin grasya, sin kariño, bo ta bisa ku e ta trata mashá ..........................
9.	Si bo ta traha duru, hasi tur bo esfwèrso pa bini kla ku algu, bo ta m ............... k .......................
10.	Menshoná algun kaso kaminda nos ta uza e adhetivo ‘Mala’