Mangusá

Joseph Sickman Corsen

Korsou 13 desember 1855 - 9 oktober 1911.

J.S. Corsen (Shon Yo), literato i músiko, a skibi su prosa i poesia na spaño i papiamentu. E ta e prekursor di nos literature papiamentu, pasobra e ta esun di promé ku a produsi obra literario na nos idioma.

Despues ku e tabatin un pustamentu di boka ku su amigunan literato tokante e punto si ta posibel si o no pa skibi obra literario na nos lenga, el a bin presenta su poesianan tantu konosi te dia di awe (por ehempel ‘Atardi’).

[p. 57]

Tres aña despues di su morto su tomo titulá ‘Poesias’ a sali publika (imprenta J.F. Kloosterman, Nijmegen 1914).

Durante su estadia na Barcelona (Benesuela), na yaniwari 1879, Corsen a skibi su promé obra dramátiko titulá ‘Apariencias’, dedika na su ruman hòmber.

Shon Yo tabata amigu íntimo di Shon Wein Hoyer i pader Poeisz ku antes tabata kapelan na Pitermai. Huntu nan a kompone un serie di kantika di misa (muzik i teksto) den e edifisio ku aktualmente ta Radio Hoyer.

Oda Blinder (Yolanda Corsen) i Charles Corsen ta ñetu di Shon Yo Corsen.

Shon Yo a biba den e tempu ku nos tabatin romantisismo spañó na Korsou. E tempu ei idioma spañó tabata manda. Su otro kontemporáneonan literato manera John de Pool, Adolfo Wolfschoon, David Dario Salas, David Mendes Chumaceiro tambe a skibi nan obranan na spañó.