Mangusá

Yana yerba su problema

Su nòmber mes tabata Huliana. Pero pa kariño tur hende tabata yam'e Yana yerba. Pasobra Yana tabata un muhé bieu mashá sabí. E tabata un kurioso ku por a kura tur sorto di malu ku yerba. Si hopi kalor sali na un mucha su kurpa, Yana ta lab'e ku welensali herebé. I tur kalor ta seka. Esun ku no por pega soño, ta bai seka Yana. Anto e ta herebé blachi di sòrsaka, dunabo bebe. Mesora bo ta haña gana di drumi. Si bo ta hopi kansá despues di trabou pisá, anto Yana ta herebé pitiseli shimaron pa bo bebe. Un ratu despues tur e kansá di kurpa ta kita.

Asina ei Yana yerba tabata yuda hende i bestia den su kas chikitu na Kenepa. Su kas trahá di bara ku dak di pal'i mainshi tabata mashá limpi. Su murayanan tabata blanchá blanku. Su flur tabata limpi barí.

Pabou di su kas tabatin un palu di shimaruku. Anto asina e shimaruku pari despues ku awaseru kai, tur mucha di Kenepa tabata bin piki shimaruku. Pesei tur hende di Kenepa tabata bisa ku Yana yerba ta un pan di dios. Esei ke men ku e ta mashá bon hende.

Un dia mainta Yana a spierta i e ker a sali, pa bai buska poko yerba di manpuritu den mondi. Un dia promé Manuel, e fitó di Kenepa a bin bisa Yana ku e tin mashá doló di stoma. Ta pesei Yana ker a bai piki mampuritu. Pero asina Yana a abri su porta di kas, el a ripará ku e no por a sali. Net dilanti di su drempi tabatin un baka grandi drumí, morto na soño. Mesora Yana a rekonose e baka. Tabata Maga, e bak'i lechi di shon Felipi. Yana no por a bula e baka, pasobra e bestia tabata balente grandi.

[p. 58]

Yana no tabata sa kiko e hasi. Anto e baka a sigui ronka ketu bai den porta.

‘E pober bestia lo ta kansá’, Yana a pensa. ‘Mihó mi lagu'e drumi poko mas, saka su soño’.

Den esei Yuchi yuana a blo na Yana su porta.

‘Ma Yana’, el a yora, ‘mi tin mashá doló na mi pia. Ma Yana por yudami?’

‘Ku mil amor, mi yu’, Ma Yana a kontestá, ‘pero kon mi ta hasi pa sali fo'i kas, pa mi bai buska yerba p'abo?’

[p. 59]

‘Grita den Maga su orea, p'e lanta fo'i soño’, Yuchi di.

‘No, mi yu. Mi n' por hasi a kos ei. Maga ta kapas di lanta ku mal beis’.

Yuchi a kompronde i el a disidi di wanta ku pasenshi.

Un poko despues Kintu a kana yega ku su kabes tur labá na sanger. Kintu tabata un chubat'i kabritu mashá pleitista.

‘Sigur b'a bringa atrobe ku otro chubatu’, Yana a rous e. ‘Ta ki dia bo ta laga e kosnan ei para? Awor akí lo bo mester warda, pasobra ta manera mes no tin pa mi sali fo'i kas’.

Kintu a kai drumi den kustia di Yana su kas i spera.

No a pasa ni sinku minut, ku ata Tonchi totèki a kokochá den kaminda, bin para na porta di Yana.

‘Romatisma ta kaba ku mi, Yana’, el a keha. ‘Yudami lihé. Esun pia akí no ke lagami kana’.

‘Ni maske mi ke, mi no por bai buska karawara spañó pa bo pia’, Yana a kontestá. ‘Bo tin un tiki pasenshi?’

Tonchi a bolbe keha ku doló i kai drumi den tera.

Den tur esei Maga a sigui drumi i ronka sin sa mes kiko ta pasando.

Di aleu Yana a mira papa Dochi ta kana bini.

Muchu promé ku papa Dochi yega na Yana su porta, el a grita: ‘O Yana ei! Bo tin algu pa kita ferkout? Winchi mi yu tin un ferkout mashá pisá’.

‘Sigur mi ke yudabu’, Yana a kontestá, ‘pero mi no por muf fo'i mi porta. Asina Maga lanta, mi ta drenta mondi i piki poko yerba di makurá, pa nos herebé pa Winchi’.

Papa Dochi a disidi di yongotá den tera i warda ku santu pasenshi.

Den esei Yana a tende kon Maga a dal un hap grandi i abri wowo.

‘Maga, ta kiko a pasabu?’ Yana a puntra e baka.

‘Kansá, Ma Yana, kansá di mi alma. Ayera mi mester a kana henter dia den mondi, pa mi haña un tiki yerba. Ora solo a kuminsa baha, m'a kue kaminda di kas. Pero mi tabata asina kansá, te mi pianan a perdè forsa. Anto m'a sinti kon un soño tabata pèrtami. Ta moda di hasi mes no tabatin. Komo Yana ta hende konosi, mi di: Lagami tira e kurpa ‘bou dilanti di bo porta. Mesora m'a pega soño. Parse ku m'a perdè ariba. Kuant'or tin awor akí? Solo ta haltu na shelu’.

‘Nueb'or kaba’.

‘Bon, lagami bai kas lihé, pasobra shon Felipi lo ta tur na laria’. Maga a lanta i kana bai.

Mesora Yana a sali pafó. El a buska mampuritu pa Manuel i el a yuda Yuchi yuana. Despues el a piki blachi di karawara spañó pa Tonchi totèki i el a yuda Kintu. Un poko mas lat Yana a hiba yerba di makurá pa Winchi. Asina ei tur a keda kontentu.

Un poko kansá pero satisfecho Ma Yana a drenta su kushína, pasobra ainda su stoma tabata bashí. El a traha poko kòfi p'e bebe i el a bati henter un pas buskuchi ku keshi huntu ku su kòfi pretu.