Mangusá

Minta, un mucha spiertu

Muchu promé ku Minta nase, ya kaba su tata, su mama, su wela, su tawela i su tanta a dun'e nomber.

Tawela Mou di: ‘Si e nase mucha hòmber, mester yam'e Mauricio, meskos ku mi’.

Tantan Minta a hinka boka den kòmbersashon: ‘Kòrda bon ku mi yama Araminta. No lubida riba mi’.

Wela Nea a opina: ‘Si e nase mucha muhé, mi ke pa boso yam'e Cornelia, meskos ku mi’.

Papa Lou, su tata, a propone pa yam'e Lourencio. ‘Pero’, papa Lou di, ‘si ta mucha muhé, por yam'e Araminta. Esei ta un bunita nòmber’.

Tio Yanshi a bisa nan ku e ta bai di akuerdo ku loke nan disidi.

‘Kiko ami lo bisa?’ e mama mes a puntra nan. ‘Boso ta kere ku por yama e kriatura Susana?’

‘Klaro ku por’, Papa Lou a trankilisá su kasá. ‘Mama Sus, si e sali mucha muhé, nos ta yam'e Susana tambe’.

Nan tur a keda spera ku pasenshi den nan kasita banda di Saliña, esta mama Sus, papa Lou, tawela Mou, wela Nea, tantan Minta i tio Yanshi.

Kestion ku tin poko luna despues, ora e kriatura a nase, a resulta ku ta mucha muhé. Bon kontentu papa Lou a bai òp su yu. Anto el a pone su firma ku mashá pikete den e buki grandi kaminda nan a skibi nòmber di su yu muhé: Araminta, Cornelia, Susana.

[p. 53]

E mucha a krese i duna tur hende den kas mashá alegria. Ta klaro ku kada be nan no por a yama e mucha Araminta, Cornelia, Susana. E nòmber ei tabata muchu largu. Pesei nan a dun'e un nòmber di kariño mas kòrtiku, esta Minta.

Den e kasita na Saliña kada hende tabatin nan trabou. Minta tambe. Papa Lou tabata kuida su matanan den kurá. Mama Sus tabata kushiná i laba paña. Tawela Mou tabata bai bende e matanan den plasa tur djasabra mainta. Wela Nea tabata kose i drecha tur paña. Tio Yanshi tabata kuida e galiñanan den kurá. Tantan Minta tabata tene kas limpi.

I Minta mes? Kiko Minta tabata hasi?

Bo mester sa ku Minta su pianan tabata chikitu i gorditu. Ma esei no a kita ku e por a basha kareda, bai hasi rospondi o kumpra kos na tienda. Ta pesei kada be Minta tabata okupa ku hasimentu di rospondi o kumpramentu di ko'i kome.

Riba un dia Minta tabata sinta hunga den kurá, den e fresku pabou di kas. E tabatin Michi den su skochi. Michi tabata nan pushi koló pretu ku blanku.

Den esei papa Lou a yam'e: ‘Minta, papa su prenda, kore bai na kas di shon Mani. Anto bo ta pidié manda e kuchara di mèsla ku el a fia di papa’.

‘Ta bon, papa’, Minta a kontestá, i el a kore bai den kas, pa kue un saku di papel.

Na porta di kushína el a topa mama Sus ku un bleki yen di webu. Anto mama Sus di: ‘Minta, mama su korona, bai duna shon Tela, kasá di shon Mani e webunan akí. Ayera el a pidimi poko webu p'e traha un bolo’.

‘Ta bon, mama’, Minta a kontestá i tuma e bleki den su man. Anto Minta a ripiti pokopoko asina: ‘Kuchara di mèsla pa papa, webu pa mama’.

Den esei Tawela Mou a kana yega. ‘Minta, mi súku dushi’, e di, ‘kumpra un bòl di liña p'ami na tienda di Shi Katea. Ata dies plaka’.

‘Ta bon, papa Mou. Mi ta kumpr'e’. Minta a hinka e dies plaka den su saku di shimis i ripiti: ‘Kuchara di mèsla pa papa, webu pa mama, bòl di liña pa papa Mou’.

Ora Minta tabata na punto di sali fo'i porta, wela Nea di kuné: ‘Minta, mi amor, kumpra seis pal'i ilu p'ami. Tuma. Ata seis dies plaka aki’.

Mesora Minta a kontestá: ‘Ta bon, mama Nea’. El a hinka e dies plakanan den su saku di shimis. Anto el a ripiti: ‘Kuchara di mèsla pa papa, webu pa mama, liña pa papa Mou, ilu pa mama Nea’.

Bon kontentu Minta a kuminsa kana. Pero na porta di kurá tio Yanshi a kore bin bon purá su tras.

‘Minta, tio su kònòshi, ‘bai tienda di buchi Pablo, anto bo ta bis'e ku e tin ku manda e saku di maishi. E galiñanan tin hamber’.

Mes kontentu Minta a kontestá: ‘Ta bon, tio’. Anto el a ripiti: ‘Kuchara di mèsla pa papa, webu pa mama, liña pa papa Mou, ilu pa mama Nea,

[p. 54]

mainshi pa tio’.

Apenas Minta a kaba di sera e porta di kurá su tras, ku tantan a grit'e:

‘Minta, mi pret'i wowo, wardami!’

Minta a keda para i tantan a kore yega seka dje.

‘Tuma, mi yu’, tantan di kuné, ‘ata dies plaka. Kumpra un paki di angua pa tantan’.

‘Ta bon, tantan’, Minta a priminti. I sigun el a hinka e sèn den su saku di shimis, Minta a ripiti: ‘Kuchara di mèsla pa papa, webu pa mama, liña pa papa Mou, ilu pa mama Nea, mainshi pa tio, angua pa tantan. Basta nan no pidimi mas kos. Sino mi ta kapas di lubida’.

Pero ningun hende no a pidi nada mas i Minta por a kana bai hasi su rospondinan.

Den kaya el a topa Neron, e kachó di Mai Bea, nan bisiña. Minta ku Neron tabata bon amigu. Pasobra hopi be Minta a sali keiru ku Neron. Pero awor akí Minta no tabatin tempu pa Neron, maske kuantu Neron a kana su tras i waya rabu.

Ku kara serio Minta a sigui ripiti: ‘Kuchara di mèsla pa papa, webu pa

[p. 55]

mama, liña pa papa Mou, ilu pa mama Nea, mainshi pa tio, angua pa tantan. Awor akí mi n' por bai keiru ku bo, Neron. Mi tin muchu kos na mi kabes. Aworó, b'a tende’.

Neron a keda para un poko tristu riba kaya, mirando kon Minta a kana bai.

Na skina di kaya Minta a topa su amiga Finchi.

‘Hei, Minta, tende’, Finchi a bis'e, ‘m'a haña un pòpchi grandi. Bo ta ban hunga ku mi?’

Pero Minta a keda mira Finchi i ripiti: ‘Kuchara di mèsla pa papa, webu pa mama, liña pa papa Mou, ilu pa mama Nea, mainshi pa tio, angua pa tantan. Aworó, Finchi. Mi tin hopi rospondi awor akí’. Anto Minta a sigui kana.

Djis un ratu despues el a yega n'e kas di shon Mani.

‘Bon dia, shon Tela’, el a kuminda ku mashá rèspet. ‘Papa ta manda puntra ku e por haña su kuchara di mèsla. Anto mama a manda e webunan akí’.

Shon Tela a keda kontentu ku e webunan i el a kore bai buska e kuchara di mèsla i un panlefi pa Minta.

Djei Minta a sigui kana. El a yega na e tienda di Shi Katea.

Mashá desente el a pidi: ‘Shi Katea, mi ke un bòl di liña pa papa Mou i seis pal'i ilu pa mama Nea’.

Shi Katea a pone e liña ku e ilu den Minta su tas di papel. Anto Minta a duna Shi Katea shete dies plaka. Ke men ku Minta a sobra ún dies plaka den su saku di shimis. Pero maske kuantu Minta a para pensa, e no por a bini kla ta kiko e mester a kumpra ku e último dies plaka.

‘Kisas poko mangel?’ Shi Katea a puntr'e.

Minta a sagudi kabes. ‘No por ta mainshi tampoko. Esei ta kosta muchu mas ku dies plaka. Aki ratu lo mi kòrda. Ayó, Shi Katea’.

Pensando Minta a sigui kana, te ku el a yega n'e tienda di buchi Pablo. El a duna buchi Pablo e rospondi i sali bai. Dilanti dje porta di buchi Pablo su tienda Minta a para pensa ku pensa ku pensa kiko e mester a hasi ku e delaster dies plaka. E kos no kier a dal na su sintí. Tur loke e por a kòrda ta ku esei tabata un rospondi pa tantan.

Den esei di ripiente el a kòrda: Angua pa tantan!

Bon purá el a kore bai bèk n'e tienda di Shi Katea.

‘Angua pa tantan’, e di. ‘Un paki’.

Shi Katea a buta e paki di angua den Minta su tas i Minta por a kana bai kas.

‘Esta spiertu mi yu ta’, mama Sus a gab'e. ‘E no a lubida nada’.

‘El a bai buska mi kuchara di mèsla tambe’, papa Lou a hari.

‘Mi bòl di liña tambe’, tawela Mou a hinka boka 'den.

‘I mi seis pal'i ilu’, wela Nea di.

‘Angua pa mi tambe’, Tantan a bisa nan.

[p. 56]

Tur hende a grita hari di kontentu. E ora ei tawela Mou a hinka man den su saku. Anto e di: ‘Esaki ta un depchi pa Minta mi prenda. Pa bo kumpra tentalaria’.

E mes atardi ei Minta a bai keiru ku Neron, i el a kumpra tentalaria. Ora el a bolbe, el a pasa un ratu seka Finchi. Minta a duna Finchi un pida tentalaria i nan a sinta hunga mashá kontentu ku e pòpchi grandi.