Mangusá

[p. 51]

(foto Brenneker)

Bati Huda

Ku un boroto di otro mundu, un trupa di mucha pia 'bou i lomba sunú a pasa den hanchi, lastrando un Huda bistí na un flus shinishi bieu tur manchá i yen di buraku.

Un di e muchanan tabata blo bati e wantomba den su lomba korkobá ku un pal'i basora, mientras un otro tabata lemb'e ku moketa den su stoma shawawa. E Huda su kabes ku man i pia a sigui kai di un banda na otro sigun e tabata kome sla di su huesnan.

‘Porko’, un di nan, kabei korá, a grita.

‘Burdugu desgrasiadu’, unu flakitu ku djente putrí a zundr'e. I bou di gritu di harimentu, den lokura di furia, nan a sigui molostía e Huda, kende a plama su shirishiri di sas den hanchi.

Den tur porta di kas hendenan ku a tende e beheit di batimentu di Huda a sali lur. Ku nan komentario i ekspreshon di despresio pa e traidor malvado nan a entusiasma e muchanan pa sigui yòrkia e pòpchi di mal fason.

‘Karga e alimá ku skòp’, un biehita ku kara lapi-lapi, pará kant'i kurá a konseha nan.

[p. 52]

‘Plama su kara p'e’, tabata deseo di e sneiru delegá haltu, pará den bentana, ku un karson tur na rei den su man.

Ku bochincha i dezòrdu otro mucha mas a kore sali for di nan kas, ku pida tabla, garoti o kabuya, i hinka tras di e proseshon di husticia kontra e Huda ku ya a kuminsa bira delega di tantu tripa ku nan a fòrsa for di su kurpa wayabá.

Na skina di hanchi e trupa a bira bai pariba den kaya grandi, kargando nan víktima na man ku pia. I un ratu despues e hanchi a bolbe kai den e kietut di Sabat di Aleluya.

E biehita so a sali for di kurá ku su basora di kabana, i bari dilanti di su porta, sigun su boka chumbá a keda kik: ‘Malagradisidu. Bo n' merese mihó’.

(Di ‘Njapa’ 1962).

Nota: E pida istoria akí a tuma lugá na aña 1926, den e hanchi di Pareda na Ser'i Pitermai.