Mangusá

Un Huda

Promé ayá, riba o promé ku Bierne Santu, muchanan tabata traha Huda. Nan tabata kue un flus bieu, yena esei ku shirishiri di paña bieu o klerchi, te ora e haña mas o menos figura di un hende.

Riba Sabat di Aleluya nan tabata sali riba kaya ku nan Huda, kada un ku pida palu. I sigun nan tabata lastra e Huda den kaya, nan tabata batié, te ora e kibra na werki.

Simbólikamente esei tabata un kastigu pa e Hudas ku a traishona Kristu.

Pero e palabra Huda tin un nifikashon mas ku te dia di awe nos ta uza. Si nan yama un persona un Huda, esei ke men ku e ta falsu.

Nos tin tambe den nos idioma e ekspreshon ‘un Huda mal yená’. Esei ta uza pa un persona ku tin figura for di proporshon.

E tradishon di bati Huda a bai un poko fo'i moda, pero parse tin algun bario ku ainda ta bati Huda riba Sabat di Aleluya.