Mangusá

[p. 48]

Nubia pikinini

Solo tabata kima mashá pisá. I sigun e solo tabata kenta laman, e awa tabata lanta bai laria na forma di hopi gota mashá chikitu. E awa tabata evaporá. Anto te ariba ayá den shelu e awa tabata bira nubia. Mashá hopi nubia, kada un ku nan forma. Nan tabata blanku den e shelu blou i nan a sigui drif, pa despues nan bira awaseru.

Pero e solo kayente no tabata kenta laman so.

Den kunuku di Bas Kalitu tabatin un dam. Banda dje dam tabatin un krenchi awa. Solo a kenta e awa. Solo a kenta e awa banda dje dam, anto e tiki awa tambe a bai laria, bira un nubia. Un nubia chikitu asina. Un nubia pikinini.

Ora e nubia pikinini a drei mira, el a mira hopi nubia grandi. El a sinti poko miedu. Esta grandi e otro nubianan ta! Anto nan a kuminsa tenta e nubia pikinini.

Nan di: ‘Hei, nubia pikinini. Kiko bo ta hasi aki na laria? Bo ta muchu chikitu. Bo no tin basta awa pa aworó bo bira awaseru i muha tera. Nos akí ta grandi. Aworó nos ta basha tur e awa ku tin den nos kurpa. Nos ta muha terenu di tur kunukeru, pa nan planta maishi, patía, milon ku bonchi. Nos ta yena tur renbak ku awa. Nos ta traha roi grandi den kunuku. Pero abo... kiko bo por? Nada drechi. Kita aki 'fo pa bo n' stroba nos’.

E nubia pikinini a bira tristu. Pero e no a yora, pa e pèrde esun tiki awa den su kurpa. Anto el a kore bai leu, mashá leu mes. El a drif, pasa riba Ruba. Despues el a mira kosta di Benesuela i Kolombia. Sigun el a sigui drif, el a krusa laman grandi. Djei el a mira Spaña, Fransha, Ulanda.

Asina ei e nubia pikinini a sigui drif, te ku el a pasa rònt mundu.

Riba un bon dia el a drif pasa riba Boneiru. Banda di Nikiboko el a mira un kas chikitu. Banda dje kas tabatin un pidasitu kurá chikitu. For di e porta di patras dje kas el a mira un machi bieu kana sali. E machi tabatin un bleki chikitu ku awa den su man. E machi a kana bai na un mata di kònkòmber ku e tabatin den su kurá. Ei el a basha e awa riba e mata di kònkòmber i bolbe drenta su kas.

E nubia pikinini a mira tur kos bon. Anto el a pensa: ‘E machi mester ta pober. E no tin pipa di awa na su kas. Kasi sigur e ta kuida e mata di kònkòmber, pa aworó e haña ko'i kome. Bo sa kiko? Mañan mi ta bin muha e mata p'e machi’.

Bon purá e nubia pikinini a basha kareda bai, pasobra un bientu duru a push'e. Ma su manisé el a bolbe riba Boneiru, esta na Nikiboko. El a baha, baha, baha, te ora el a yega riba kurá di e machi. Ei el a basha poko awa riba e mata di kònkòmber. Asina el a ripara ku e mata ta bon muhá, el a drif bai atrobe, pa e bolbe su manisé.

[p. 49]

E nubia pikinini a sigui bai pabou, te ku el a pasa riba Korsou. Banda di Santa Katarina el a mira poko mucha ta hunga ninichi den nan kurá.

Pikinini di: ‘Bo sa kiko? Mi ta bai buta e muchanan hari poko’.

Pesei el a baha, baha, baha, te ora el a yega te kasi riba e muchanan su kabes. Anto el a grita nan: ‘Mira, mira! Mi ta bira un pára’.

E nubia pikinini a trose su kurpa, te a la largu el a haña forma di un pára.

[p. 50]

E muchanan a grita hari, pasobra nan a gosa di mira kon e nubia a bira un pára blanku den laria.

Un poko mas pabou, banda di Kwartí, e nubia a mira algun mucha hòmber ta hunga tròm. Mesora el a baha te abou. Anto el a grita nan: ‘Mira, mira! Mi ta bira un barku’.

Pikinini a primi, trose su kurpa, te ora el a haña forma di un barku. Mashá kontentu e muchanan a grit'e: ‘Barku blanku, bo ta yega te Wespen?’

Pikinini a kontestá: ‘Djis akí. Ki bo ke mi hasi na Wespen?’

‘Kumindá Tio Gachi pa nos. E ta biba banda di Sabana di Wespen’.

Pikinini a priminti nan i el a sigui bai te Wespen. Na e kasita koló ros di

Tio Gachi el a keda para den laria, i el a grita: ‘Tio Gachi, Tio Gachi!’

Tio Gachi a sali lur na porta i mira e nubia pikinini.

‘Mashá kumindamentu di bo subrinanan, Tio Gachi’, e nubia a grita.

‘Danki, mi shon, mashá danki’, Tio Gachi a kontestá.

Despues di esei nubia pikinini a sigui bai, pasobra bientu di ost tabata supl'e. Ma su manisé el a bolbe bai muha e mata di kònkòmber. I unda ku el a mira mucha, el a hasi nan kontentu. El a kambia na forma di piská, na forma di karné i forma di barku. Tur e muchanan tabata gosa. Tur tabata grita hari i kumindá nubia pikinini.

Un poko tempu despues Pikinini a mira kon e machi bieu a piki dos man di kònkòmber for di e mata. Pikinini a keda mashá kontentu pasobra el a hasi e machi felis.

Asina ei Pikinini a sigui hasi bon tur kaminda ku e por, maske kon chikitu e tabata.