Kuenta pa kaminda

[p. 106]

Yu pretu

Despues di a lesa un kantidat di buki riba e ideanan robes tokante teoria di rasa, Henri a yega na e konklushon, ku ta un nigrita pretu-blou e mester buska, un nigrita puru i legítimo.

Sintá ku su amigu Johan den e restorant di Lim Tung, el a duna un splikashon di su problema. ‘No tin kestion, Johan. Un nigrita puru ta e ideal di un hòmber ku uza su sintí. A keda probá, por ehèmpel, ku ta e kútis di un neger so ta forma protekshon kontra rayonan di solo. E manchanan ku un blanku ta haña riba su kueru, asina e yega na sierto edat, ta konsekuensia di solo. Mi konosé un nigrita di sesenta i sinku aña. Te ainda su kara ta lizu; su kurpa na lugá. Tuma nota ku e muhé ku mi ke men a haña ocho yu. B'a komprondé ki mi ke men?’

Johan ku tabata sinta hunga ku e senisero riba mesa, a hisa kara i opservá: ‘Pero kon bo ta hasi pa haña un nigrita puru awor akí na Kòrsou? Tur hende a meskla riba e lugá akí durante vários siglo.’

‘Kisas por tin algun ainda. Ami ta kere ku mester tin.’

‘I kiko bo hendenan lo opiná? Pasobra t'ei ta sinta e baina grandi.’

‘Kiko bo ta insinuá?’

‘Bo tin koló basta kla i... bon kabei, manera nan sa bisa.’

‘Koló ku kabei ta gran chambonada. Por sierto ami ta konsiderá esei un degenerashon. Bo sa masha bon ku hendenan ku a bai biba na partinan friu a haña falta di sufisiente solo. P'esei nan kueru a blikia. Nan a degenerá. No tin nada mas mahos ku un blanku ku pasa kuarenta aña. I, bon mirá, bo por splika mi ta pakiko hòmbernan tin tantu lokura pa buska nigrita? Bo no sa antó ku tin turista merikanu ku a sali for di Merka, bai te Paris, pa buska nigrita pa nan drumi kuné?’

[p. 107]

‘Un bon nigrita kurpa será ta e mihó muhé ku un hòmber por tin den kama!’

‘At'é. Ata bo mes ta papia bo sintimentu. Ta nifiká antó, ku un kaminda skondí den nos sesu nos ta realisá ku e nigrita ta superior. Ta tur kaminda ta meskos. Aki na Kòrsou i na Merka tabata asina, ku e blanku por tin su esposa blanku, pero e tabatin su nigrita ku en realidat por a dun'é satisfakshon kompletu. Mi no tin mester di menta nòmber. Kòrsou ta yen di e kasonan ei.’

‘Bo no tin mester di baha bo nèrvio riba mi, palu. Si bo papia ku kalma tambe ta bon.’

‘Johan, mi mester trata na bolbe na e estado ideal. Mi persona degenerá mester sublimá atrobe. I pa mi logra esei, mi mes mester pone e promé paso. Mi persona por kuminsá sublimá den mi yu. Despues mi yu ta pone e di dos paso, mi ñetu e di tres paso. Asina ei gradualmente mi persona por bira mas neger, mas perfekto.’

‘Bo teoria ta zona masha interesante. Ma kon bo ta hasi ku e mentalidat di nos pueblo?’

‘Ki karaho mi tin kunes ku e mentalidat estúpido ku nan tin. Ami ta bai buska e nigrita di mas pretu ku mi por haña. Esun di mihó kurpa, di mas será i mas salú ku mi por topa. Pa mi stim'é, kasa kuné i traha un yu pretu kuné.’

‘Éksito, parna. Pero bo famianan lo buta bo balia keke. Komprendé un kos bon, Henri. Si bo tin un nigrita ta dibertí kuné... eh... esei... bueno, esei nos por bisa ku ta normal. Pero kasa ku un mièrdè asina, esei ta otro kos. Henter sosiedat, esta loke nos ta yama sosiedat, ta bira lomba pa bo. Nan por tolerá un neger. Pero no mas ku esei. Ora bo presentá ku un koño pretu, lo bo sinti kiko ta nifiká diskriminashon kamuflá.’

‘Bo ta bestia.’

‘Bestia nò, bru. Práktiko. Mi ta mira realidat. Den nos akí bisá, ami ta kontentísimo ku mi tin un tiki koló ku kabei. Kon ku bai bini mi ta gradisidu ku mi mama a haña mi ku un blanku.’

[p. 108]

‘Johan, ta pasobra bo ta mi amigu, mi por bisa bo loke mi ta pensa. Bo mama a putia ku un blanku. Ki honor e blanku a duna bo mama? Bisa mi. Kua?

El a keda un kriá pendeu. Ora e no por a satisfasé e tata mièrdè di bo mas, e buchi di ponchi a bin biba kuné. Ta gaña mi ta gaña?’

Tur e ora ku Henri tabata sulfurá, Johan a keda mir'é masha trankil.

‘Bo sa ta kiko ta pasa bo?’, el a kontestá despues di un ratu di silensio. ‘Bo ta poko eksitá. Un poko bruá. Idealismo tin bo peseta. P'esei mi no ta tuma ni molèster di rabia. Dal bo serbes pa bo fria bo kabes. Pasobra si bo sigui kere ko'i mariku, bo ta resultá den Montekristu.’

Henri su man a tembla ora el a pone e glas na boka. Johan a keda wak e di abou, te ora el a bolbe pone e glas bashí riba mesa.

‘Pòrk-chòp. Batata hasá’, e chines tras di bar a grita. For di patras den kushina un otro chines a grita algu komo kontesta.

‘I nos ta ban dal un buèlta na Campo?’, Johan a invitá Henri, despues ku esaki a sinta marka figura ku su dede den e tiki awa riba mesa.

‘Kòrda warda poko plaka un banda tambe, pa aworó bo por kura e shanki ku e drep’, Henri a kòrt'é: ‘Te aworó.’

Johan a dal un gritu hari. Henri a pusha su stul patras i sali bai bon purá for di e restorant.

...Unda kuminsá buska...? Unda e nigrita perfekto por ta...? Kurpa será, fuerte, salú... pechu pará, duru... atras hanchu... boka yen... pretu... pretu blou... djente limpi, kompletu... kueru fini, dushi, suave. Un nigrita ku por stima di bèrdè... entregá su mes kompletu... sin komedia... sin mintira... I despues e yu! Kon lo mi yam'é?

Henri a lora drenta Columbusstraat. Apénas e tabata ripará unda e ta kamna. Su wowonan tabata blo buska tur kaminda. Kada nigrita den kaya tabata pasa un prueba visual sin ku nan sa. Sin paga tinu Henri a baha den kaya. Un outo a raska pasa banda di dje. Di sustu e shafer a grit'é: ‘Koño. Mira unda bo ta kamna!’ Henri a reakshoná spantá i bula riba asera. Unda

[p. 109]

e nigrita di awor ei a keda? Ahan, at'é ta bai ayá. Nò! E n' ta sirbi. E tin meskla blanku. Bo ta nota mesora. E makaku ta strika kabei... E animal no sa kon na Europa masha hopi hende ta gusta kabei di peper... Pushkin tabata orguyoso ku e ta desendiente di neger... Ta kiko e kaka sa di Pushkin? Madurostraat... Den e pakus ei por tin algu? Esei...? Mes pendehada. Nò. Muchu seku... Aki den? Ata un pará na e otro banda di kaya. Tampoko no t'e kos. Su sanka ta plat... kara bobo...

Henri a sigui kamna. Den Heerenstraat. Riba Awasá di Punda. Den Breedestraat. Despues pasa den Pietermaai. Penstraat. Nieuw Nederland. Cher Asile. Marie Pompoen.

Banda di och'or di anochi el a yega kas i kai morto kansá riba su kama, sin sikiera kita paña. Un ratu despues el a pega soño.

Tambú! Tin un tambú ta zona. Su ritmo ta subi te bira riu di zonidu razu. Un nigrita ta balia su dilanti. Blo sunú. E kurpa. E brasanan i e pianan ta trose manera kolebra. Esta bon bo ta. Sigui sagudí. Bo pechunan no ta tembla sikiera. Na e pechunan ei un yu pretu lo bebe lechi te harta. Tambú, no para awor akí. Balia, nigrita. Move bo kustia. Mea. Suta tera ku bo plant'i pia. Mi ke pasa mi man riba bo kurpa, pasa mi boka riba bo kútis. Bo sodó ta buta bo lombra. Mira kon pipita di sodó ta kore di bo kara i kai riba bo pechunan. E sodó ta buta bo bikinan lombra manera pèrla. Mi ke bo manera bo ta. Salbahe. Krudo, sin puiru, sin pintura, sin peluka, sin mintira. Yega serka, pa mi primi bo, pa mi sinti bo karni. Pa mi stima bo den mi delirio. Pa bo duna mi...

‘Un yu pretu!’ Henri su gritu den silensio di anochi a buta tur hende den kas bula lanta. Su mama a kore drenta kamber, su tras e tata i e dos ruman muhénan.

‘Ta kiko a pasa?’, e mama a puntr'é bon spantá.

Henri a sagudí kabes. ‘Nada partikular. Lo m'a soña.’

‘B'a grita manera hende den ansha.’

‘Bai drumi numa; mi ta kere ta pasobra m'a drumi stoma yen.’

[p. 110]

‘Bòltu bo kusinchi.’

Henri a gruña i nan a sali bai drumi. Ku masha trabou Henri a bin logra pega soño atrobe.

Solo tabata basta fuerte ainda ora Henri a sali for di ofisina. Un poko fadá el a para den e fresku parti pabou di su ofisina i wak tráfiko. Den esei a dal na su sintí pa bai keiru den Otrobanda. Mesora el a tumba direkshon pabou, krusa brùg i pasa den Kaya Grandi di Otrobanda.

Ku su pensamentunan fihá riba su ideal, el a bolbe sigui baluá kada nigrita ku tabata pasa den kaya. Kanando di tai manera el a bin resultá te na Kas Chikí. Ei el a kansa i buska un lugá di sinta sosegá. Ma komo no tabatin ningun kaminda di sinta, el a lèn kontra di muraya di un kas i sende un sigaria.

Zonidu di un par di pargata lastrá a hala su atenshon i sak'é for di su pensamentu. Dos pal'i pia pretu bon formá ta promé kos ku su wowonan a topa. El a hisa kara mira e kurpa ankrá den un shimis barata di katuna. E brasanan tabata yen. E garganta limpi. Kara lizu. Boka yen, orguyoso. Henri a kita kurpa for di e muraya i sigui wak e parti patras di e nigrita sigun e mucha muhé a sigui pasa bai. E atras tabata burdugá bou di e bistí. Dos bola baliando bou di un sintura delegá. Henri por a grita di kontentu. Disididu el a hinka tras di e nigrita. No a tarda muchu ku e nigrita a ripará ku Henri ta sigui kamna su tras. El a drei mira Henri, sonreí (esta poko djente blanku) i drenta un di e hanchinan di Marchena. Henri a pega su tras. Despues di a pasa den dos kaya, e nigrita a para di gòlpi i puntra Henri ta kiko e ke.

‘M'a namorá di bo’, Henri a kontest'é.

E nigrita a wak e di su kabes te su pia i dal un harí masha kanaya.

‘Shon konosé mi antó?’

‘For di e momentu ku m'a mira bo, m'a realisá ku ta ku bo mi tin ku kasa.’

‘Atá. Ta den ki mi ta haña mi akí?’

‘Lo mi splika bo tur kos.’

[p. 111]

Pero ami no tin idea di kasa ainda. Ta binti aña mi tin.’

‘Mi n' bisa ku mi ke kasa mesora. Nos mester konosé otro promé.’

E mucha a pone man na kabes i keda mira Henri komo si fuera ta hende loko a papia kuné.

‘Ma bo no a topa mi nunka promé.’

‘Mi sintí a bisa mi ku bo ta mi ideal.’

‘Ideal di kiko awor, shon?’

‘Di mi bida.’

‘Esta baina. Awe sí m'a topa. Ki yama bo?’

‘Henri.’

‘Yu di Kòrsou bo ta?’

‘Di mi kabes te mi pia.’

‘Anto b'a gusta mi.’

‘Sí. Tur ku por tin. Unda bo ta biba? Unda bo ta traha?’

‘Aki den Marchena, serka mi ruman muhé. Mi ta traha serka shon Elena, den Pietermaai. Bo n' sa e kas kòrá ku trali blanku?’

‘Mi ke ku mi sa ta unda. I ki yama bo?’

‘Ami? Amelia. Pakiko bo ke sa tantu kos asina?’

‘Mi tin ku sa tur detaye tokante esun ku mi ta bai kasa kuné.’

‘Atá. Bo kabes no ta pareu. Ta kiko b'a gusta na mi kurpa?’

‘Tur kos.’

Kasi mei ora Henri ku Amelia a para kombersá. Na kuminsamentu e nigrita, no muchu inteligente, a haña henter e kaso masha straño. Tur su kerementu tabata ku Henri ta busk'é pa kama. Pero gradualmente Henri su konvikshon a but'é realisá ku aki no ta wega tabatin. I ora nan a yama otro ayó na final di e kombersashon, Henri tabata sa ku manisé lo e kompañá Amelia bai kas, for di den Pietermaai te Marchena.

Atardi Henri a kumpra un repi grandi di chukulati pa Amelia i tumba bela yen pa Pietermaai. E nigrita tabata nèchi peñá i limpi bistí ora Henri a yega na porta di kurá. Sigun nan tabata kamna bai pabou, Henri a kuminsá splika e nigrita gradualmente kon su ideal ta.

[p. 112]

Amelia no por a komprondé apsolutamente nada di loke Henri a papia. Den su simplesa e tabatin un deseo so, esta di waya e promé chispa di amor ku e yònkuman ku koló kla i bon kabei, te ora e bira un vlandam ku ta hib'é kama. I sigun Henri tabata filosofiá bai, Amelia tabata atmirá su nanishi pará i su boka bon formá, su wowonan i su flus. Por sierto ora Henri a karisiá su brasa djis un tiki, el a sinti ku algu den su kurpa a kontestá mesora.

‘Ayera m'a lubidá di konta bo, ku shon Elena a pidi mi pa keda drumi’, el a konta Henri. ‘Asina ei mi por yuda na mesa mainta. Shon Elena su kasá ta masha fastioso, bo sa.’

‘Den ki sentido?’

‘No loke bo ta pensa, pero, bo n' sa, fastioso? E ta masha pèrtinènt. Si tin un krench'i wiriwiri di pan riba mesa, ya e ta reklamá. Bo mester wet'é kamna. Kabes ta yen di porkeria.’

‘I unda bo ta haña un kuartu?’

‘Patras den kurá tin un kas ariba ku abou. Abou mi sa laba paña. Mi ta haña esun ariba pa drumi. Mi ta haña mi kuminda tambe tres be pa dia.’

Henri a haña ku no ta mal idea. ‘Ademas bo ta spar bo sèn di bùs’, el a opservá.

‘Esei ta bèrdè. Anto e kamber ariba ta fresku, bo sa. Yu, bo mester sinti kon dushi e fresku di laman ta.’

Na e mesun punto ku nan a para kombersá e dia promé, nan a bolbe papia riba e mil i un temanan konosi entre namorado. Na un momentu ku ningun hende tabata pasa Henri a sunchi su frenta i yam'é bonochi. Amelia a sinti kla kon den su barika algu a ranka i trose. El e keda wak Henri te ora el a disparsé for di bista. Su sintí a keda tur bruá di tur e kosnan ku Henri a kont'é. Pero den su kurpa un kandela a kuminsá sende. Difísil tabata pa e komprondé kon e mucha hòmber asina bon tipo tabata trat'é tantu desente. Ni un momentu so el a papia kos di fresku. E no a bisa nada di dòbel sentido. E no a mishi ku su pechunan. E no a menshoná nada di kama.

[p. 113]

Anto Icha, un amiga di dje i un nigrita meskos kuné, a kont'é kon un mucha hòmber a gati'é, priñ'é den ménos ku dos luna ku nan a frei. Despues e mucha hòmber a bai lag'é. Pero esaki tabata un hòmber fini, masha korekto. I tur e kosnan straño ku e ta papia... Lo e ta bon studiá i di bon famia. Ma di kon antó, no opstante tur e finura di Henri, sin embargo ya kaba mi ta sinti algu straño den mi kurpa?

Amelia a haña un kama, un kashi, un mesa, dos stul pa su kamber den kurá. Tabata muebel bieu ku shon Elena no ta uza mas, pero nan tabata na bon estado. Amelia a laba nan, lombra nan ku was i limpia henter su kuartu. Pasobra anochi su Henri lo bin hasi su promé bishita. Tur kos mester ta limpi. Amelia a piki poko flor di trinitaria den kurá i pone nan den un bòter di djèm riba mesa. Komo shon Elena a laga pasa un waya te den su kuartu, Amelia tabatin lus eléktriko. Un pera di diessinku watt i sin pantaya tabata kologá meimei di plafòn. Nunka di su bida Amelia tabata asina kontentu. El a laba paña ku furia, i for di diesun or di mainta ya tur kabuya tabata kargá ku paña labá. Pa e no tin mester di sinta pòrnada tramèrdia, Amelia a bolbe pasa un basora den tur kamber di shon Elena su kas. Pero for di kuat'or el a stòp di traha, p'e bai baña peña i spera Henri. Pará den e zim grandi di awa den huki di su kamber el a karisia su pechunan i papia ku nan. ‘Bosnan tur dos lo bira di mi Henri, di mi yunan. Bosnan lo primi riba Henri su kurpa, p'e sinti ku mi ta muhé. I despues bosnan lo yena ku lechi, pa mi yunan bebe kuantu ku nan ke. Awe nochi lo mi primi bosnan kontra di su pechu ora e sunchi mi, p'e mira kuantu mi ta stim'é. Hahai! Mi sa ku e ta stima mi. E tin idea serio. Si e pidi mi habri mi blusa, lo mi habrié i munstr'é bosnan. Si e pidi mi drumi kuné, mi ta drumi mesora kuné. Lo mi entregá mi mes sin miedu, pasobra mi stim'é.’

Alegremente el a sigui baña, kantando: ‘Mi ta stim'é. Mi ta stim'é.’ I riba ritmo di su kansion improvisá e tabata primi su bikinan di tete.

[p. 114]

Henri no tabatin mester di fleit dos be, pasobra for di promé be Amelia a saka kara na bentana. Henri a drenta pa porta di kurá i kore subi trapi, bai den kamber di Amelia. Maske kuantu brio Amelia tabatin, ora Henri a kue brasa i sunch'é rondó di su kara, el a keda para ku miedu, sin sa kiko bisa ni hasi.

‘Mi amor, m'a trese esaki pa bo.’ Henri a munstr'é un estuche ku un par di renchi di orea.

‘Pa mi esakinan? Esta bunita.’

‘Bisti nan mesora, pa mi mira kon nan ta keda bo.’

‘No ta mihó mi warda nan pa djadumingu?’

‘Ki dia ku bo bisti nan ta djadumingu pa mi. Bisti nan numa.’

Amelia a pega e renchinan na su orea i koketeá ku su kabes.

‘Presioso, mi bida’, i Henri a tapa tur su kara ku sunchi atrobe.

‘Pero Henri. Pakiko bo ta stima mi tantu asina?’

‘No puntra. Ademas, amor nunka ta eksigí splikashon.’

‘Sí, pero...’

‘B'a drecha bo kama masha bunita.’

E palabra kama a buta Amelia sinti su mes bira un tiki zonzo un ratu. El a kalkulá ku Henri lo sigui papia riba kama. Ma Henri a kai sinta riba un stul i opservá ku e zonidu di laman ta masha agradabel. Te dies or nan a keda sinta serka otro. Nan a papia, sunchi i brasa miéntras kada un su alma tabata rementá di alegria. Ki ora ku Amelia a haña okashon, el a primi su pechunan kontra di Henri su kurpa, sperando ku Henri lo reakshoná. Pero Henri a dominá su mes.

‘M'a komprendé bo, Amelia’, el a bisa e nigrita. ‘Pero ainda e momentu no a yega. Mi amor pa bo ta buta mi respetá bo. Ta por mi no por mancha bo promé ku nos kasa.’

Amelia a kita kara yen di bèrgwensa. Tantu rèspèt e no a spera. E pober no por a komprondé e amor elevá ku Henri tabata dun'é. Despues ku Henri a bai kas, el a keda drumí lantá riba kama basta ratu, pensando, deseando. Pa baha su deseo el a hinka un kusinchi meimei di su pianan i primi su bèlnan riba dje.

[p. 115]

‘Henri, Henri, mi kurpa ta pidi...’

Mainta Amelia a laba e slopi i kologá e kusinchi na solo.

‘Sigun mi ta tende, bo tin un asuntu ku un kriá nigrita.’

Henri a buta kuchú ku fòrki riba mesa i hisa kara pa tende loke su mama ta papia. Su tata a sigui kome, aparentemente desinteresá. Pero Henri a ripará ku man di su tata tabata tembla. Su dos ruman muhénan sintá na mesa a wak e di abou.

‘Mi di ku mi a tende ku bo tin un asuntu ku un nigrita mahoso, pia di tera’, e mama a ripití ku asko den su stèm.

Henri a pensa promé ku e papia. E no kier a ofendé su mama, pero e no por a pensa mesora kiko e bisa.

‘Nigrita mahoso’, e mama a bolbe ripití ku ainda mas despresio den su stèm.

Henri a dominá su mes tantu ku e por i kontestá: ‘Mahos i bunita ta masha relative. Inteligensia tin ku disidí. Ignoransia ta obra únikamente a base di sintimentu.’

‘No bini ku bo filosofianan.’

‘Hende, generalmente, ta destiná pa pensa.’

‘Pensa soketada manera bo ta hasiendo awor akí. Mete ku un nigrita ta soketada. Pèrdèmentu di tempu. Kon bo por rebahá bo mes asina? Mi ke sa kiko Sarah i Rebecca, mi rumannan lo pensa ora nan tende e kos akí.’

Henri por a rementá, pasobra rápidamente a pasa den su sintí loke a sosodé dia e tabata mucha di nuebe aña. Su mama a manda e ku su ruman muhé mayó bai bishitá nan tawela, riba un djadumingu atardi. Henri a kòrda kla kon e ku Elsa su ruman a sinta den balkon di e kas grandi di su tawela. Un kriá a bin sinta kombersá ku nan. E tawela a pasa den sala di e kas na su pidjama. E tabata kamna tras di un pushi pretu, ku un tayó ku lechi. Ni un momentu so e tawela a kumindá nan. Henri a bolbe mira e hòmber blanku ta kamna tras di e pushi. E tabatin mas amor pa e pushi ku pa su ñetunan. T'esei tabata e hòmber ku a duna su wela barika dia su wela tabata traha komo kriá na e kas ei. T'esei tabata e hòmber blanku ku

[p. 116]

nunka a kasa ku su wela. T'esei tabata e sinbèrgwensa, tata di Sarah ku Rebecca. Tabata na su punt'i lenga pa bisa ku Sarah ku Rebecca ku tur sobrá por bien bai den koño. Pero el a guli mand'abou i kontestá únikamente:

‘E muhé ku den su bobedat entregá su mes sin matrimonio na un blanku abuzador ta kometé prostitushon.’

Mas skèrpi e kuchú no por a kòrta. E mama i e tata tur dos a komprondé mesora kiko Henri ke men. E tata a guli i keda ketu. E mama sin embargo tabatin mas brio: ‘Bo mester mira kada kos riba su mes.’

‘Kòrsou ta yen di fachada’, Henri a respondé. ‘Masha hopi hende ta biba tras di un kortina di fantasia. Si kada hende realisá kiko nan personalmente komo individuo ta bal i presta, nan lo tabata felis en realidat. Awor akí nan ta sigui fia di un grandesa ku nunka tabata eksistí den e hòmbernan ku tabata orígen di nan eksistensia, a base di abuzu. Ademas, tur loke ta blanku ta degenerá. M'a mira nan na hopi lugá i semper m'a haña gana di saka i skupi riba nan.’

‘Ta basta awor’, e tata a kai aden. ‘Mi por yega na komprondé ku kisas físikamente un nigrita ta atraktivo. Pero ku mentalmente nan bal algu... esei mi ta duda.’

‘I Pushkin? Ralph Bunch? Washington Carver?

‘Eksepshon, nada mas.’

E mama a bula aden: ‘Pena la bida bo trese ningun nigrita den mi kas. Mi ta kore kuné.’

Henri a realisá ku aki ya no tabatin rasonamentu posibel. El a lanta for di mesa i tira su último flecha: ‘Afortunadamente un kantidat di mama pretu no a mata e yunan degenerá ku nan a pari ku blanku. Pasa bon.’ E no a para skucha sobrá komentario. Mesora el a kohe tur su pañanan, sali for di kas i bai biba na un penshon.

Henri a kuminsá spar tur loke e por, pa kumpra muebel pa su kas. Na Montaña nan a primintié un kas di tabla i el a konta Amelia di dje. Pero Amelia a bis'é ku e ke sigui traha algun

[p. 117]

luna serka short Elena despues ku nan kasa, pasobra e no ta gusta sinta ketu. Henri a bai di akuerdo kuné.

Pero e problema grandi tabata e konsentimentu di Henri su grandinan pa por kasa. Henri tabata sa ku nan lo nenga redondamente. Ma ora el a bin sinta pensa bon, el a realisá ku en realidat no ta eksistí problema. Siendo franko manera semper, el a konta Amelia esei.

‘Pero, Henri, kon nos ta hasi pa kasa antó?’

‘Fásil. Nos mes ta kasa nos kurpa.’

‘Ta ki pantomina bo ta papia.’

‘Ken a bisa bo ku no por. Ta un hòmber i un muhé ta kasa nan kurpa. No ta e pader. Tur loke e pader ta hasi, ta duna bindishon.’

Amelia su wowonan a span asina grandi.

‘Tende un kos akí mi amor’, Henri a trankilis'é, ‘mi sa ku bo no a tende di e kosnan akí. Pero ta asina ta.’

‘Di bèrdè mes?’

‘Manera m'a bisa bo. Mira akí. Nos tin sinku luna ta namorá. Mi tin e plaka pa kumpra muebel. Wèl, mi ta proponé pa nos kasa dia 27 di sèptèmber. E ta kai riba un djasabra. Aki tres siman. Aki den mes nos ta kasa.’

Amelia a keda mir'é i purba di bisa algu.

‘Nò. Bo no tin nodi di duda ni kibra kabes. Aki den nos ta kasa. Diesdos or di anochi. Mi ta kumpra unbunita bistí blanku pa bo.’

Di repente Amelia a mira den su fantasia un bistí blanku tur na mancha di sanger. I na e mes momentu ku el a sinti un ola di piaser kòrta den su kurpa, a parse ku un doló skèrpi a buta su barika tembla.

Tres siman largu, tur dia despues di sink'or, Henri ku Amelia a drecha e kuartu. Henri a fèrf e murayanan i e flur. Amelia a kologá kortina i algun kuadro barata na muraya. Henter e kamber tabata hole limpi.

Dia 25 di sèptèmber Henri a kumpra un flus nobo i e bistí blanku pa Amelia. El a trese un bòter di shampaña, dos glas i

[p. 118]

su ‘tape-recorder’, riba kua el a graba marcha nupsial di Lohengrin. E kama a haña laker ku slopi nobo i un sobrekama bèrdè ku fleko.

Mientrastantu shon Elena tabata sigui e moveshonnan ku atenshon. I komo su boka tabata gusta redu, e ku su amiganan tabatin basta komentario, ora nan ta sinta kombersá den stupi.

‘Anto ta un mucha hòmber di bon famia’, shon Elena a opservá.

Serafina, sintá su dilanti, a sagudí kabes. ‘Masha tristu mes.’

‘Bo n' ta kere ku e nigritanan ta hasi brua, pa tene hòmber na nan kurpa?’

‘Lo ta. E kriá ta ku barika?’

‘Mi no ta mira nada.’

‘Henri sa keda drumi serka dje?’

‘Nunka. Promé ku diesun or e sa bai. M'a para skucha tras di yalusí vários be.’

‘Ami no ta komprondé kiko Henri por ta mira den un kriá nigrita.’

‘Ami tampoko. Su mama sa di e asuntu ei?’

‘Ai sí. E pober ta sufri mashá. E no a kere nunka ku su yu hòmber por a mete ku nigrita. Ma bo sa ki t'e kos? Mi ta kere ku nigritanan ta hasi tur sorto di porkeria ku hòmber. P'esei hòmbernan ta pega nan tras. Bo no ta kòrda ku m'a konta bo kon Jorge mi kasá a mete ku e kriá ku nos tabatin? Yu, mi a reis riba nan den baño. Mi no ta lubidá nunka mas e posishon mahos. Un nigrita duru pretu, ku un atras ònbeskòp. Che. M'a zundra Jorge i kore ku kriá mesora.’

Den e kuartu patras den kurá e dos palombanan tabata namorá, sin por a tende opinion di e dos muhénan den stupi.

Dia 27, for di sink'or Amelia tabata peñá, bistí. Den su kabei el a sprengu un tiki kolonia for di un bòter ku Henri a regal'é. Su kurason tabata bati te den su garganta. Pensamentu riba su Henri a buta ku el a muha papa, di moda ku e mester a kambia su karson.

[p. 119]

Tabata parse mintira ku tempu a pasa asina lihé. Sinku luna pasá el a konosé Henri. Awe nochi portin lo e por uni kompletu ku Henri, sinti Henri riba su pechunan, sinti Henri den su kurpa. I el a kuminsá repasá den su sintí loke Icha a siñ'é: ‘Si bo ta stima bo hòmber, entregá bo mes kompletamente. Chupa su lenga. Lag'é mansa bo tetenan, chupa nan, te ora bo sinti henter bo kurpa ta trose.

Pèrkurá pa bo ta bon muhá. Esei ta hasi e kos mas fásil.’

Pashon a bolbe lanta ku Amelia i el a kuminsá frega su bèlnan kontra otro. Ora, pasa. Pasa lihé, pa yega diesdos or. Mi ke Henri. Mi ta deseá Henri. Mare e por priña mi awe nochi mes.

Algu despues di shet'or Henri a yega. Amelia a bula riba dje i primié kontra di su kurpa. El a sinti deseo di morde Henri su kara, pasobra Henri a keda masha bunita den su flus nobo.

‘Djis akí, mi amor’, Henri a kalm'é. ‘Djis akí bo ta haña tur kos. Ata m'a trese un nasigóren pa nos kome.’

Amelia tabatin hamber, pero a pars'é ku e no por guli. Tur nèrvioso el a pone e kuminda den dos tayó, i nan a kome. Djei Henri a sende su radio di bateria. Nan dos a sinta den brasa di otro, skuchando muzik i mirando laman. Pero Amelia no por a sinta ketu. Su paden ya tabata herebé. El a primi su pechunan riba Henri i frega su bèl meimei di Henri su pianan.

‘Mi amor’, el a kuminsá yora Henri, ‘aki un par di ora nos ta kasa. Ki diferensha ta hasi si nos hasié awor akí? Mi tin gana. Buta mi riba kama, mi amor.’

‘Ni maske bo kurpa ta na vlandam, mi no ta hasi nada promé ku nos kasa.’

‘Pero mi ta kayente, mi amor.’

‘Mi tambe. Warda un ratu mas.’

‘Maske ta djis un tiki, mi bida.’

‘Ni tiki ni taka. Aworó bo ta haña sufisiente.’

Amelia a pega su kabes kontra di Henri su pechu i sigui keha. Pero ni maske kiko el a hasi, Henri no a komplas'é. E

[p. 120]

oloshi grandi den hadrei patras di shon Elena su kas a bati diesun or.

‘Un ora so mas’, Amelia a bisa Henri, i su deseo teribel a but'é primi Henri manera hende desesperá. Djei el a hinka su lenga den Henri su boka, sera wowo i gosa kon Henri tabata chupa su lenga. Un ratu Henri a laga su mes dirti den pashon. Pero asina el a mira ku Amelia a kuminsá tofer na su kil di karson, el a lanta para bai wak laman den bentana.

‘Rabiá bo ta?’ Amelia a puntr'é.

‘Ni un ora so.’

‘Pakiko b'a lanta antó?’

‘Kada kos na su ora. Ma tende un kos akí, mi amor. M'a konta bo i splika bo tantu kos e lunanan ku a pasa. Awor akí ta falta un ora pa nos kasa. Promé ku e momentu desisivo yega, mi ke hasi bo un sorto di eh... èksamen.’

‘Èksamen di kiko, mi bida?’

‘Mi ke sa ku bo ta realisá kiko ta bai sosodé.’

‘Nos ta bai hasi kos masha dushi.’

‘Bo no ta pensa otro kos?’

‘Ma ta bo mes ta buta mi bira kayente, mi prenda.’

‘Basta. Bo sa pakiko mi ta kasa ku bo?’

‘Ata bo sa kaba. Pasobra nos ta stima otro.’

‘I pakiko ami ta stima bo?’

‘Mi ta bo nigrita ideal.’

‘Eksakto. Pakiko mas?’

‘Bo ke un yu pretu.’

‘Presis. Sigui.’

‘Eh un yu pretu... ku ta abo... pero mas neger... pa asina bo persona... mi amor, mi no ta kòrda mas. Pakiko bo ta papia tantu kos straño asina? Ata nos ta stima otro hopi kaba? Mi bida, djis akí, ora bo kibra mi señorita, mi ta tene bo duru den mi brasa. Asina Icha a siña mi. Maske kuantu doló mi sinti, mi ta keda primi bo den mi kurpa. Anto e dushi ta buta e doló pasa. Anto mi ta sera wowo, habri mi...’

‘Stòp ku ko'i loko awor akí. Mi ta papia kos serio.’

[p. 121]

Amelia a spanta djis un ratu, ora el a mira kon Henri su kara a sera. I masha sumiso e di: ‘Papia numa, mi bida.’

‘Pa mi persona hasi e promé paso den e direkshon di sublimashon. P'ami, i despues mi ñetu, bira mas neger, mas legítimo, mas noble.’

‘Si, mi amor.’

‘I ken ta kasa nos?’

‘Nos mes ta kasa otro.’

‘Kiko bo mester splika nos yu, si akaso mi muri promé ku e bira grandi?’

‘E mester kasa ku un neger pretu pretu, pa e pone di dos paso.’

‘Bo ta bon. Awor, kiko ta nifiká amor?’

‘Amor? Wèl, entregá bo mes kompletu i lubidá bo mes den e persona ku bo ta stima. Ta bon asina?’

‘Tur bon ku por tin.’

‘Pero tin un kos ku ta preokupá mi.’

‘Kiko?’

‘Bo hendenan.’

‘Mi ta hasi loke ami haña ta bon. Mi hendenan no por dirigí mi destinu.’

‘Pero suponé ku aworó nan bin zundra mi, ofendé mi yu. E kos ei mester ta teribel.’

‘Biba bo propio bida i ignorá hende estópido.’

‘Bo ta bisa asina. Pero kisas nan por amargá mi bida.’

‘Basta papia nònsèns. Buta e shampaña ku e glasnan riba mesa. Nos momentu ta aserkando.’

Amelia a buta e bòter di shampaña den su baki di eis i e glasnan riba mesa. Pero mientrastantu tabatin un orkan den su pensamentu. El a haña ku Henri ta pinta tur kos masha bunita. Pero Henri tabata lubidá kon hende bibu ta. Ata shon Elena mes a tir'é un palabra riba Henri, ora e tabata den kushina. Ai, mi Dios, ta kiko mi ta hinka mi kurpa aden? Tur Henri su famianan lo bandon'é. Nan lo lastra mi na wèrki. I si mi haña un yu, e kriatura lo por pasa mal bida...

[p. 122]

Amelia a wak Henri pará den bentana i el a bira drecha e sobrekama. E kier a hasi algu, ki ku ta, pa kalma su nèrvio.

‘Kuartu pa diesdos’, Henri a avis'é despues di a wak ora na su oloshi di man. ‘Paga lus.’

A parse Amelia ku Henri su stèm a zona di masha leu. El a drei e pera di lus, keda para un ratu inmóvil den skuridat.

‘Bin para serka mi den bentana’, Henri a bis'é. Amelia a kamna yega serka. Henri a tene su man i hal'é den kurpa. El a sinti kon Amelia su kurpa tabata tembla. E olanan tabata sapatiá kontra di kosta. Nan zonidu tabata dushi, trankilisante.

Te leu ayá un bapor tur na lus tabata pasa. Shelu tabata yen di strea.

E dos amantenan a keda para den silensio, mirando e bista mahestuoso di shelu ku laman.

Un pa un e slanan dje oloshi den hadrei a anunsiá diesdos or. Ku masha seriedat Henri a tene Amelia su man, wet'é den su kara i puntr'é: ‘Amelia, bo ta aseptá mi komo bo esposo, den tur felisidat i kontratempu di bida, te na morto?’

Amelia a guli skupi i kuminsá tembla mas tantu. Ku emoshon enorme den su stèm el a kontestá: ‘Sí, Henri mi amor, mi ta aseptá bo. Ku henter mi kurpa, henter mi alma i tur loke mi tin. Mi pechunan ta di bo, mi kurpa ta di bo, mi barika ta di bo. Bo Amelia ta henteramente di bo, te dia Dios tuma mi.’ Amelia a sinti kon lágrima a kuminsá basha for di su wowonan. I den su vlandam di deseo, el a benta su kurpa den brasa di Henri. Pero Henri a kalm'é i bis'é, ku awor e mester hasi e pregunta.

Amelia a tuma un kurashi i puntra su amante: ‘Henri mi bida, bo ta tuma mi pa bo esposa den tur kos te na morto?’

‘Sí, Amelia. Mi ta aseptá bo. I lo mi sigui proba mi amor pa bo te ora morto sera mi wowonan.’ El a brasa e nigrita temblando i bis'é den su orea: ‘Awor sí nos por bai kama. Ban kita paña.’

Ni un minüt despues nan tabata lora banda di otro den kama. Streanan a mira. Olanan a tende. E dos glasnan ku e

[p. 123]

tiki shampaña sobrá a tembla riba mesa... sigun e flur a tembla... sigun e kama a tembla i keha.

Na skina di duana Johan a topa ku Henri.

‘Karamba, bru, mi por a paga plaka pa mira bo. Ta unda b'a hinka bo kurpa’

‘M'a kasa.’

‘Laga di ta pompa. Ku e nigrita?’

‘Klaro.’

‘Esta baina. I kon e ta den kama?’

‘Esei ta mi asuntu.’

‘Mira akí, palu. Ta kiko a pasa bo. Ya e mièrdè a hasi brua pa bo, buta bo bira chocho?’

‘Stòp ku bo ofensanan, Johan. Komportá bo serio.’

Johan a grita hari i puntra ta for di ki dia tabatin e presioso seremonia.

‘Algun luna kaba.’

‘Ba priñ'é kaba?’

‘Kasualmente Amelia a bisa mi ántayera ku e no a mira su regia e luna akí.’

‘Fantástiko. Bo ta bon den bo karson. I bosnan a bai biba Montaña kaba manera b'a yega di konta mi ku bo tin idea?’

‘Ainda nò. Amelia ke sigui traha un poko mas, te ora su barika tin seis luna.’

‘Ban dal un serbes pa selebrá e ko'i pendeu ei.’

‘Ta duel mi, Johan. Amelia ta warda mi.’

‘Inkreibel. Mi amigu Henri a bira katibu di muhé. Esta un fieldat. Esta dedikashon. Kariño, amor. Mira akí, Henri, bo no por laga di ta hode. Lanta fo'i soño, hòmber, e muhé chambòn ei ta subi bo kabes, uza bo pa feila.’

‘Mi sa kiko mi ta hasi.’

‘Wél, ami tambe sa kiko mi ta hasi. A yega poko muhé chabalitu na hotèl. Bo ta djòin?’

‘Loke Amelia ta duna mi ta e mesun kos, pero ku amor berdadero. T'esei ta e diferensha.’

[p. 124]

‘Enfin, ta bo mester sa. Dibertí bo ku bo nigrita.’

‘Pasa bon, Johan.’ Henri a keda wak kon Johan a drenta Columbusstraat. I e no a sinti ningun tiki duele.

Amelia su sintí no tabata na su trabou. Pará banda di e mashin di laba paña, e tabata blo pensa riba Henri. A la largu e no tabata tende ni e zonidu di e mashin mas... Tantu kos straño... Henri ta stim'é ku tantu lokura... tur anochi e ta entregá su mes na Henri... ora largu... te ku el a sali ku barika... E yu pretu ku Henri a deseá ta den su barika... Henri sa gusta karisia su barika... sunchi su barika... Pero e mes no por komprondé... Neger semper tin duele ku nan ta neger... Ata vários di su amiganan a buska hòmber blanku pa drumi kuné. No ta p'esei e mes a kai pa Henri? Henri no ta blanku, pero hopi kla... E hendenan di Henri. Tur e kos akí por ta un komedia? E yu den su barika. Sinku luna kaba. Un luna mas e ta traha serka shon Elena. Ata shon Elena ta kombersá den sala ku un di su amiganan. Lo ta riba dje atrobe. Vários be shon Elena a tira puña riba su barika. Pakiko? Ta ki rabia shon Elena por tin riba dje? Henri ta stima mi di bèrdè? Nò. Sí. Sí, e ta stima mi. Nos ta bai biba na Montaña. E ora ei e no tin mester di soportá e puñanan di shon Elena. ‘Tin kos ku ta imposibel’, shon Elena a yega di opservá. Lo e ke men e yu akí. Amelia a pasa su dos man riba su barika. I di repente el a hañ'é ta papia ku e yu: ‘Mi no ta laga bo pasa mal bida. Mi ta hasi loke Iris a hasi pa e pèrdè yu. E trapi! Mi ta subi te na mitar di e trapi... bul'abou. Ai, mi Dios, ta ken a manda mi. Nò, mi no por. Mi tin miedu. Mi por muri. Iris a hera di muri. Mi no ke muri. Mi no ke mi yu muri. Pero kon mi ta hasi?’

Kuater dia largu di pensamentu amargo a buta Amelia bira teribel nèrvioso. Henri tabata blo puntr'é ta kiko a sosodé. Pero Amelia tabata gaña ku ta pasobra e ta kòrda riba nasementu di e yu i e doló. Henri tabata kalm'é, trankilis'é i kont'é kon dushi nan lo pasa den nan kas na Montaña.

[p. 125]

Ma despues di kuater dia ya Amelia tabata tur tolondrá. I den su ansha di nèrvio el a tuma un desishon.

Djis un ratu despues ku Henri a sali bai banda di mitar di ocho mainta, el a bisa shon Elena ku e ta sinti su kurpa malu i ku p'esei e ta bai dòkter pa mira ta kiko. Kompletamente disididu el a kamna bai Plasa Brion, kue un bus di Bándabou ku a bah'é te na kas di su tanta.

‘Ta ki bientu a tira bo aki banda?’ e tanta a puntr'é, ‘malu bo kurpa ta?’

Amelia a fòrsa sonreí i kontestá ku ta un dia liber el a haña.

‘Turesten mi ta bai keiru poko, kue fresku’, Amelia a gaña, ‘mi tin hopi tempu sin subi riba e barankanan pabou di kas.’

‘Tene kuidou pa bo no slep ku e barika grandi ei.’

‘Mi ta kuida mi kurpa, Tanchi.’

Amelia a sali bai den direkshon di e barankanan. Su kabes tabata manera kandela, tur bruá. El a purba resa, pero na mes momentu e idea teribel tabata pursiguié. El a mira Henri den su pensamentu. Henri ku tabata biba den e lokura di su yu pretu. Ma el a hinka den su kabes, ku no por ta posibel. E yu akí no por nase nunka. Ta tristesa, problema so lo bini. Henri su bida lo ruina por kompletu. Dios, pordoná mi, el a resa, pordona mi loke mi ta bai hasi. Pero mi no por otro manera. Shon Elena tin rason. Ta imposibel. Henri su idea ta imposibel.

Amelia a subi un baranka di mas o ménos dos meter i para wak abou. E haltura a pars'é masha grandi. Pero el a sera wowo i bula, kai riba su pianan. Mesora el a sinti un doló fuerte den su barika. Awa a baster for di su wowonan. Ma el a sera kurpa i kamna kasi lastrá bai kas di su tanta.

Den porta di kas el a bai leu, dal abou. E zonidu a buta e tanta kore drenta kas, kaminda el a weta Amelia drumi den un laman di sanger.

Atardi, ora Henri a yega, el a sinta lesa un revista riba kama, sperando Amelia yega kas. E no a bira nèrvioso, pasobra shon Elena a bis'é ku Amelia a bai dòkter. Ounke el a haña poko

[p. 126]

straño ku Amelia por a tarda asina tantu. Ma den su mes e di ku kisas Amelia por a pasa serka kualke amiga o konosí.

Pero ora och'or a bati, el a kuminsá haña un presentimentu ku algu straño lo por a pasa. Mesora el a tumba pa Marchena. E ruman muhé di Amelia a kont'é ku e no a mira Amelia. Henri a pensa na avisá polis. Pero pa evitá skandal, el a disidí di no hasié. Despues di a sali for di Marchena, Henri a kamna informá na tur e kamindanan ku Amelia tin amigu. Ningun di nan a mira Amelia. Tur nèrvioso Henri a bolbe kas, pa mira ku Amelia por a yega. E kuartu tabata meskos ku el a lag'é. E kier a puntra shon Elena ku e por a mira Amelia, ma komo ya a bira diesun or, e no kier a molestiá shon Elena. Bon anshá Henri a bolbe sali, i sigui buska, informá tur kaminda si Amelia lo por a pasa.

Den su desesperashon el a drenta un shap, dal dos whisky tras di otro. Sigun su sintí tur bruá a sigui traha, el a pensa ku kisas por ta otro hòmber ta den e asuntu. Pero el a kita tal pensamentu, pasobra e tabata sa ku Amelia stim'é masha tantu. A la largu e no por a wanta mas. El a sali bon purá for di e shap, bai buska un outo di hür, pa hib'é na kas di Amelia su grandinan, na Barber.

Morto spantá e mama a yega na porta, ora Henri a bati. ‘Amelia? Nò, shon Henri. E no a yega akí. Mi no sa unda e por ta. Basta e mucha no a bai hasi su kurpa ningun daño.’ E tata tambe a sali na porta, pa weta ta kiko a sosodé. Miéntras ku e mama a kuminsá yora, e tata a konsehá Henri di bai weta na kas di Amelia su tanta. ‘E tanta stim'é mashá. Por ta masha bon ku el a bai ayá.’

‘Na unda e tanta ta biba?’, Henri a puntra.

‘Santa Marta Grandi. Puntra pa Eloisa di Ferna. Tur hende konosé su kas.’

Henri a yama danki i bonochi, bolbe bula den e outo ku a keda ward'é. ‘Santa Marta Grandi’, el a duna e shafer órden. ‘Ban purá.’ Lus di e outo tabata balia riba kaminda. Henri tabata tembla di nèrvio, kome tur su uñanan. Sin muchu

[p. 127]

difikultat el a haña e kas, despues di a pasa den un kaminda smalitu di tera. Porta di e kas tabata será. Djis un krench'i klaridat di un lampi tabata sali den e skref na porta ku bentana. Henri a bula subi e dos tret di stupi dilanti di e kas i bati duru na porta.

‘Ta ken?’, un hende a kontestá paden.

‘Henri. Unda Amelia ta?’

A keda un silensio den kas. Henri a pone su orea na porta pa e skucha bon. A pars'é ku el a tende un hende yora, miéntras un otro a papia algu masha pokopoko. I Henri a komprondé mesora ku Amelia ta ei den. Henri a dal un gritu: ‘Habri lihé, sino mi ta kibra e porta akí.’

‘Mi ta bini, shon Henri, mi ta bini’, e tanta a kontestá. ‘Ta un shimis mi ta tira na mi kurpa.’ Djis despues e porta a habri na un skref. Den e tiki klaridat di un lampi di korozin riba mesa den huki, Henri a mira un muhé gordo pará. Mesora el a pusha e porta habri i drenta e kas.

‘Unda Amelia ta? M'a tende kon e ta yora.’

‘Ai, e pober su kurpa ta malu’, e tanta a kuminsá papia ku stèm lastimoso. ‘E ta na kama. Awor ei el a pega soño.’

‘Laga di ta gaña ko'i loko. Amelia!’ Henri a pusha e tanta un banda, dal e porta di kamber habri. Amelia, drumí riba kama, a tapa su kara ku laker i kuminsá yora amargamente. Bon sará Henri a yega na e kama i bisa Amelia ku e mester ban kas mesora.

‘Mi no por, Henri’, Amelia a yora, ‘mi no por. Bai laga mi.’

‘Pakiko bo no por? Ta kiko a pasa? Bo kabes ta pareu?’

‘Mi no por konta bo, mi amor. Bai, bai laga mi. No buska mi nunka mas.’

Mientrastantu e tanta a keda para morto spantá den porta di kamber. Henri a bira di gòlpi, i eksigí e tanta pa konta ta kiko a pasa.

‘Owèl... mi shon ta komprondé... Ami ta kere...’

‘Kere ki demoño? Papia lihé.’ Henri a bira bestia, ranka e laker for di Amelia su kurpa i mira su esposa drumí sin e

[p. 128]

barika grandi. El a paralisá, bira friu. E no tabata sa kiko e bisa. Tur kos a reboltiá den su sintí. Su boka a tembla i el a sinti kon su pianan a pèrdè forsa. Ma despues ku el a bin realisá kiko a sosodé, el a dal un gritu: ‘Amelia, mi yu!’

Amelia a hisa su dos brasanan na laria, manera e kier a lanta i bisa algu. Pero palabra no kier a sali for di su boka. Henri a kue su brasanan tene i lant'é.

‘Unda mi yu ta, Amelia. Papia lihé. Papia!’ Pero Amelia a basha na yoramentu: ‘Mi amor, mi ta sinti masha doló. Mi no por lanta. Laga mi drumi. M'a pèrdè nos yu.’

Henri a tende e bèrdat amargo i mesora el a sinti kon henter su kurpa a krak. Kompletamente desesperá el a kai sinta riba e kama. Awa a basha for di su wowonan. Pero djis un ratu despues el a bira manera razu. Furioso el a bula lanta i grita Amelia pa kont'é tur kos. Gradualmente el a bin haña sa loke a sosodé. Amelia a splika yorando, pakiko el a tira e yu afó, pa e mucha no bin pasa mal bida. Henri a sinti kon un tristesa amargo a poderá di su sintí. Su mes stèm a bira monótono den su orea. Su kabes a kuminsá bira. E tabata kompletamente kibrá.

‘Abo mes, Amelia’, el a yora ku asko i rabia, ‘abo ku tantu m'a stima. Bo tabata mi ideal. M'a pone bo riba un pedestal. M'a munstra bo kiko ta amor berdadero. B'a nenga di komprondé. E yu ku tantu mi a anhelá. E kriatura ku m'a stima den bo barika. Bo ta un burdugu. B'a mata mi yu. Henter bo bida bo konsenshi lo sigui pursiguí bo pa e krímen sushi ku bo a kometé. Dos krímen b'a kometé. Pasobra spiritualmente bo a mata ami tambe. Pa bo kreensia estúpido. Miedu di sosiedat. Miedu di hende ignorante. Miedu di un populacho bestia ku ta kere pendehada. B'a proba ku bo ta mes animal ku nan tur. Unda bosnan a dera mi yu? Bisa mi lihé, promé mi choka bo mata.’ El a bula riba Amelia. Pero e tanta a kore yega serka, ranka Henri.

‘Den santana di Soto’, el a bisa Henri, ‘den un huki pariba, parti nort.’

[p. 129]

Henri a skupi riba Amelia, pusha e tanta un banda i sali bai.

‘Mi ta kla’, el a bisa e shafer i pag'é, ‘masha danki.’

Sigun Henri a sigui kamna bai pafó riba e kaminda di tera, e por a tende kon Amelia tabata grita yora. E tanta tabata blo borotá.

Henri a subi kaminda grandi, pasa dilanti di misa bai pariba. Bientu fresku a buta su kurpa sodá tembla. Rápidamente el a bula e waya di santana pariba di misa. Djei el a sende vários lusafè, pa buska e graf fresku di su yu. E tiki lus di lusafè a buta e krusnan tira sombra misterioso riba suela. Su pianan di karson a yena ku simia di yerba-dal-pega. Ma tur Henri su tinu tabata konsentrá pa buska unda su yu ta derá. Ku ansha i ku rabia e tabata buska.

Te den e huki parti nort el a topa ku e monton chikitu di tera riba un graf fresku. Bon purá el a kita su bachi, pon'é den tera i kuminsá koba ku su mannan. Lágrima tabata basha for di su wowo sigun e tabata benta e tera un banda. Asina el a sinti tabla di e kaha, el a kuminsá koba ku mas furia. Un kaha chikitu, koló blou a aparesé. Henri a ranka e tapa i sende un lusafè. Ta manera su kurason a para djis un ratu, ora el a mira e kriatura pretu den e kaha.

‘Mi yu. Mi yu pretu’, tabata tur loke e por a bisa. Ku masha kariño el a saka e kadaver for di e kaha, primié na su pechu i yora sin frena.

Algun dia despues un kunukeru a konta polisnan, ku el a weta un hòmber pasa riba e barankanan kontra di laman di nort, banda di shet'or di mainta.

‘I Pachi por a nota ki sorto di hòmber e ta?’, e polis a puntr'é.

‘Sí, mi shon, koló kla.’

‘Kiko mas?’

‘E tabata kamna kara abou.’

‘Pachi por a mira algu straño?’

[p. 130]

‘Straño? Ahan, sí. E tabatin un bònder den su brasa, kontra di su pechu. Mi ke ku ta den su bachi e tabatin un kos lorá. M'a mira un manga di su bachi ta kologá.’

‘Ki direkshon el a kue?’

‘Stret pa nort. Riba baranka.’

Brigida ku Sationilia, dos kriá nigrita, tabata bati un boka di redu na e tranké di datu entre nan dos su kurá di kas.

‘Anto yu, bo mester sa ku despues ku polisnan a bini serka Amelia, nan a bin bis'é ku un hòmber a mira Henri riba baranka di San Pedro.’

‘Bo sa ku ta awor akí mi ta tende e asuntu ei?’

‘Bo ta leu for di notisia. Eloisa, e tanta di Amelia, por ta señorita dams bèrdè. Pero e tin su mal ehèmpel kuné. Maske su kas ta dos stap for di esun di nos, e no a konta nos ni un pia di palabra.’

‘Sí, yu, manera mi ta konta bo. E ora ei a drenta Amelia un sorto di tristesa. Su kurason a kai. El a nenga kuminda. Dos siman el a keda tizga na bida. Anto e porko a haña santoli promé ku e muri.’

‘Ma ta unda nan a resa p'e?’

‘Kon mi por sa? Ami sí no ta resa pa muhé asina ei. Che. Dios libra mi.’