Kantika pa Bjentu

[p. 14]

Mi ta stima e punjá di mi ruman melankolia

Mi ta stima e punjá di mi ruman melankolía.
Sjegamente mi ta sigui baj su tras
te n'e kaminda ku mi mira e tronkón di mi sintí
ta pari flor di blachi pretu,
blach'i felpa, pretu, tristu,
kada un dòrná ku got'i lagrima i sangr,
ku lantando riba warwarú di bjentu
ta baj transformá na trupa di makwaku
den un shelu jen di chumbu.
I sumiso mi ta drumi, habri pechu,
p'e borami poko-poko, na mi tinu,
mjentras stroisto di flor pretu ta tapami
i makwakunan su gritu ta kòrtando den kjetut di mondi.
Un rosea mi ta bira,
nubja, huma pasahero,
ku ta lastra e kadávr di su sómbra delegá
den un paisahe di baranka den sekura.
Den sabana lo mi forma
mi santana di rekwèrdo,
sinta sklama elegía sin refrán.
Melankolía, mi amante, mi ruman i mi maestro,
Kwa muhe por igwalá bo atrakshon?