|
| |
| |
| |
Balada di Buchi Fil
Buchi Fil, katibu toro di Kenepa,
un mansebu kurpa grueso i sobèrbè,
nunka su rudijanan a tochi swela
pa sutá di watapana ni karbachi.
Tur mainta ku katibunan ta pasa,
ba' kabes i kita nan sombré pa donjo,
Buchi Fil, kabes sunú i orgujoso,
sa baj traha, sin sikjera bira kara.
Bomba sutadó sa kunsumí tur dia,
pero Fil su lomba hanchu a spant'ele,
i kòrdando riba Fil su forsa brutu,
el a grunja, kome djente den su rábja.
‘Kwalke dia mi ta garna tur bo kara’,
bomba Jendi a hur'e. M'a Fil a hari,
bira man i ranka un tronkón di indju,
puntra Jendi den kí mondi nan lo topa.
Rib' un dia Fil a gusta Mosa Nena,
e nigrita di mas fjera di Kenepa,
ku su kurpa na lugá i wowo bibu.
I nan dos a forma nan bibá pa sempr.
| |
| |
Pero Shon i Bomba, ku ta'tin nan bista
basta dia rib'e dushi Mosa Nena,
por a skuma den deseo di vengansa,
i nan dos a pens' un chake p'e katibu.
‘But'e traha, lagu'e roza mondi grandi’,
Shon a bisa bomba Jendi, ‘or'e kansa,
bo ta habrak'e ku sla di watapana.
Si e bastr, warawara lo kom'ele’.
Buchi Fil a kuminsá ku su machete,
fo'i mainta, sigui traha te atardi,
sin kumínda, sin pok' awa pa su sedu,
mjentras bomba sutadó a sinta mira.
Ora skur a drenta tera, Fil a para,
puntra Jendi, ku manjan ta sigui roza.
‘Bo ta loko?’ bomba Jendi a grit'ele,
‘Ata luna ta saljendo. Sigui traha’.
Te mainta Buchi Fil a ranka rama,
kap infròw, te laga mondi limpi-limpi.
Bomba Jendi a mir'ele trose kurpa,
kalkulá ku ja e n' por tin fors'i bringa.
| |
| |
‘Buchi Fil’, el a grit'ele, ‘Bo ta duru?
Awe ta mi dia di butabo jora.
Awe lo bo sinti mi karbachi kamna’,
i ku furja el a skupi den su kara.
‘Bo por purba’, Buchi Fil a kontest'ele,
‘ma mi man lo ta barete den bo stoma.
Bini. Drenta si bo ta sintibo machu,
pa mi pat'i mula machiká bo kurpa’.
Tantu brijo bomba Jendi n' por a spera,
i di sustu el a kore plama panja,
skonde kurpa ocho dia, sin ke sali,
p'e katibu no kibr'e na filingrana.
‘Tin manera di mans'ele, tin manera
pa kibr'ele’, Shon a bisa bomba Jendi,
‘otro luna mi ta bende Mosa Nena;
anto Fil lo lastra boka 'bòw den tera’.
Mjentras Fil ta kòrta palu den kunuku,
nan a mara Mosa Nena den garoshi,
baj bend'ele ku 'n kaptan di bark'i bela,
ku a sali pa laman e mes atardi.
| |
| |
Ora Fil a kaba traha den kunuku,
i kontentu el a buska su sosjegu,
un bjehita labadera a kont'ele
kon e bomba sutadó a hiba Nena.
‘Desgrasjadu’, Buchi Fil a grita jora,
‘mi nigrita nan a hòrta, pa kibrami’,
i mesora tur su fors' a para kaba,
di manera ku un mucha por a dal e.
Man na larja Fil a kamna drenta mondi.
‘Mosa Nena’, el a jora, ‘Fil ta muri.
Fil a kaba, mi nigrita, Fil a kaba,
ma si bomba ke sutami, el a pèrdè’.
N'e baranka den kabes dje seru haltu
Fil a para wak laman i grita Nena,
pa despwes e tira kurpa den abismo,
ku e nòmbr dje nigrita na su boka.
Den anochi tin spiritu rib'e seru.
Nan ta bisa t' un katibu kara tristu,
ku ta sklama sigun bjentu supla duru:
‘Mosa Nena, Mosa Nena, Mosa Nena’.
|
|
Auteursrechtelijk beschermd