Kantika pa Bjentu

[p. 7]

Ta kon bo ke mi pinta bo harí

Ta kon bo ke mi pinta bo harí
su bunitesa i koló kalor?
Por kompar'e ku zona di barí
den temp'i Simadan, ora furor
di tokadó tin kweru molostjá,
o bo ta preferá mi igual'e
ku kanto di laman, ku mas ajá
di kósta ta lorand' un kongolé?
Tin mil manera pa mi inventá
i deskribj'e, ma kon bo ta hal'e
na karkahada, ku ta rementá
mi alma kada be ku mi sintj'e,
lo keda un deseo aumentá
den kurason, sin nunka por skirbj'e.