Het II. Deel vanden speel-hof der liefde Godts

Een ander Liedeken, ter eeren van onse Lieve Vrauwe.

Stemme: Facele ciel ce qu'il voudra.

MAria schoone Coninghin,
Van onse vreuchden een beghin,
Naest Godt verheven hoogh hier boven,
Wat tongh kan u ten vollen loven;
Toont nu, en t'allen tijt,
Dat ghy ons Moeder zijt.

O schoon claer glinsterende licht,

Schiet in ons hert, u vlammigh schicht:
Op dat heel vierigh wort ontsteken,
Om uwen lof meer uyt te spreken;
Toont nu, &c.          bis.

O schoone Son' die altijt schijnt,

Waer door 't sondigh fenijn verdwijnt.
O claere Maen der duysternissen,
Wijst den wegh die s'Hemels baen missen;
Toont nu, &c.          bis.

Besloten schoonen Hof plaisant,

Omlommert jeughdigh groen beplant:
Vol van ghenuchte, en der wellusten,
Daer den vermoeyden hem comt rusten;
Toont nu, &c.          bis.

O claer schoon springhende Fonteyn,

Die de besmeurde ziel maeckt reyn:
Daer in den sondaer hem comt baeden,
Als den hert dorstigh hem versaeden;
Toont nu, &c.          bis.

Met recht wordt dan tot u gheseyt,

Een Moeder der Bermhertigheyt:
Op dat magh wesen t'onser baeten,
Wilt ons dan nimmermeer verlaeten;
Toont nu, &c.          bis.