hoofd tot naedeel van de konst te volghen, so plaght de vreese van strenghe wetten teghen de verderven der konsten ghemaeekt dese haere onghebondenheyd krachtighlick te betoomen: in dien sy daer en teghen van oprechtigheyd haerer eerster onderwijsinghe in het minste niet ghesint waeren af te wijcken, so wierden sy in desen standvastighen loop dapper ghestijft door eenen sekeren Naer-yver, ofte AEmulatie, die de wackere verstanden gheen ruste liet ghenieten tot dat sy niet alleen haer Meesters achterhaelden: maer ook de Meesters haerer Meesters te boven gingen. Doch over mids d'outste en beste Konstenaers de voornaemste kracht haeres wercks niet soo seer en stelden in 't opghepronckte cieraet van schoone en kostelicke verwen als in een slecht effene maniere van wercken doe ter tijd ghebruykelick, so plaght sich desen gantsch prijswaerdighen naer-yver ontrent d'eenvoudigheydt der Konste so gheluckighlick besigh te houden, dat de Konst-gherige Nae-yveraers de soete vermaeckelickheyd der konste (die uyt sulcken onbedwongen nae volghinghe ontstond) recht ghesmaeckt hebbende, met eenen oock tot meerder neerstigheyd ontsteken wierden, niet alleen door d'aenmerckinghe van het menighvuldighe gebruyck deser Konsten, maer oock door d'aenmerckinghe van d'over groote eere die de Konstenaers allent halven plaghten te genieten. Dese ghenoten eere was 't smaeckelicke hengelaes, waer door haeren vlijt wierd opghescherpt om so gretighlick nae de Konst te snacken, dat sy haer selven met de daghelicksche Konst-oeffeningh van andere Meesters
Auteursrechtvrij