Oeuvres complètes. Tome VII. Correspondance 1670-1675

N^o 2012.
Christiaan Huygens à J.B. Colbert.
16 février 1675^a).

La copie se trouve à Leiden, coll. Huygens.

A Paris ce 16 fevr. 1675.

Monseigneur

J'ay eu tant de confiance en la bonté de ma cause et en vostre justice et grand discernement, que je n'ay pas creu necessaire jusqu'icy de vous soliciter en ma faveur pour me guarantir de la supercherie que me veut faire l'horlogeur Thuret. Mais voyant qu'il persiste tousjours dans son mauvais dessein, et apprehendant que par les faussetez qu'il debite, il n'obscurcisse en quelque sorte la veritè, je me trouve obligè Monseigneur de vous la representer dans cette petite deduction, et de vous supplier treshumblement de ne pas permettre qu'il me soit fait un si insigne tort dans une affaire qui m'est de grande consequence et ou ma reputation mesme est interessee.

Lors que j'eus l'honneur de vous presenter le modelle de ma nouvelle invention vous vous serez souvenu Monseigneur que 8 jours auparavant Thuret vous avoit montrè un pareil modelle ou peu different; et je ne doute pas que me voyant ignorant de ce qui c'estoit passè, vous n'ayez jugè qu'il n'agissoit pas de bonne foy avec moy; parce que s'il tenoit de moy cette invention, il faisoit mal de la produire comme en estant l'autheur, ou s'il la sçavoit auparavant moy, il m'en devoit avoir averty lors que je m'estois adressè et confiè a luy, et ne pas me laisser m'exposer à recevoir de la honte en vous offrant la mesme chose comme estant de moy. Je n'appris, que quelques jours apres, que Thuret m'avoit fait ce mauvais tour, et qu'il taschoit de s'attribuer mon invention, ce qui m'obligea de chercher les raisons pour le convaincre. A la fin Monsieur Perrault le Controlleur l'ayant fait venir chez luy, et ou j'estois, ou Monsieur Galois voulut bien aussi se trouver, je fis veoir clairement, que le jour que Thuret vous fit veoir son modelle, estoit le lendemain du jour que je luy avois decouvert ma nouvelle invention, et que je luy eus fait faire un modelle pour moy. Il s'opiniatra pendant toute cette conference

a) Point envoiée [Chr. Huygens]¹⁾

1) Consultez la pièce No. 2008, p. 413.

[p. 421]

(comme Monsieur Galois peut tesmoigner) à nier ce fait, assurant qu'il avoit montrè son modelle longtemps auparavant que je luy eusse parlè de rien. Mais du depuis il a estè contraint de l'avouer a Monsieur Perrault, se voyant convaincu par de certaines dates, dont il constoit manifestement. Monsieur Perrault rendra tesmoignage de cet aveu, qui non seulement fait veoir l'effronterie de Thuret d'avoir soustenu une chose qu'il scavoit estre fausse, mais qui donne en mesme temps une forte presomption contre luy en ce qui regarde la chose mesme. Car s'il est vray qu'il n'a produit l'invention de ce balancier que le jour d'apres que je luy en eus communiquè la construction, il est bien apparent qu'il ne l'a eüe que de moy.

Le seul moyen qui luy reste pour soustenir sa fourberie c'est qu'il s'efforce de persuader a tous ceux qu'il connoit, qu'il m'a mis dans la voie et donnè la premiere ouverture pour parvenir a cette invention, dans des recherches que nous aurions fait ensemble touchant le mouvement et les vibrations egales des ressorts. A quoy je dis premierement que s'il estoit vray ce qu'il dit de ces recherches, et que de là j'eusse trouvè l'invention qu'il n'a point trouvée, elle ne laisseroit pas de m'appartenir. Mais ce qu'il en dit est une fausseté controuvée, parce qu'en tout ce que nous avons jamais parlè ensemble il n'y a eu rien qui m'ait facilitè le moyen de trouver cette nouvelle facon de montres. Et s'il pretend prouver (comme on me l'a dit) par des tesmoins, qu'il ait jamais proposè en ma presence, aucun moyen d'appliquer le ressort au balancier d'une montre, ce seront de faux tesmoins.

Que si apres tout ce que je viens de dire, il vous restoit encore quelque doute Monseigneur touchant la veritè de la chose, je vous demande la grace que vous me fassiez venir avec Thuret en vostre presence, pour juger par la maniere dont il soustiendra ses pretensions, si elles sont justes on non. Cependant comme il a entre ses mains la montre que je luy sis faire pour estre presentée au Roy, j'ose esperer Monseigneur que vous ne souffrirez pas qu'en cela il me previene. Vous suppliant treshumblement ou de luy ordonner de me livrer cette montre, ou que je puisse avoir le temps de faire achever celle que je fais faire par un autre ouvrier. Me consiant entierement en vostre bonté je demeure avec beaucoup de respect et de sousmission.

Monseigneur

Vostre treshumble et tresobeissant serviteur Hugens de Zulichem.

1) Consultez la pièce No. 2008, p. 413.