Oeuvres complètes. Tome II. Correspondance 1657-1659

[p. 165]

N^o 480.
J. Chapelain à Christiaan Huygens.
12 avril 1658.

La lettre se trouve à Leiden, coll. Huygens.
Elle est la réponse au No. 477. Chr. Huygens y répondit par le No. 482.

Monsieur

Si dans mes deux lettres¹⁾ vous aues trouué quelquechose qui eust l'air d'vne cajolerie, je le desauoüe comme contraire a mon intention. J'estime l'amitié trop sacrée pour en faire vn commerce de complimens, lequel n'est vne pasture que de gens de Cour et de testes ou fourbes ou legeres. Je traitte philosophiquement auec les Personnes sinceres et solides comme vous et ne me laisse jamais eschapper vne parole que je ne vueille faire bonne jusquau bout. N'ayés donc point sil vous plaist de peine a receuoir les miennes et ne craignés point d'adjouster foy aux pures expressions de la verité lorsqu'elle parle a vostre auantage. Mais pour vous oster tout scrupule consultes seulement Monsieur Heinsius sur la confiance quon peut prendre en ma candeur et je suis certain que vous prendrés tousjours au pied de la lettre ce que je diray serieusement a vn Homme aussi vertueux que vous. Cependant croyés qu'il y a long temps que je n'ay receu vne joye aussi grande que celle que vostre derniere despesche ma donnée tant pour la faueur que vous m'y aués faitte de my respondre sur deux demandes de limportance de celles qui regardent vostre Systeme de Saturne et la Construction de vostre Horloge, que pour l'excellence des choses que portent auec elles ces deux Expositions que vous aués eu la bonté de m'en faire. Quant au Systeme j'en demeure si remply, j'en trouue l'hypothese si vray semblable et tout le detail se rapportant si justement soit aux apparences soit aux mouuemens obserués que si j'estois plus fort en ces matieres et d'asses d'authorité pour y porter coup je me declarerois hautement en faueur de l'Idée que vous en aues conceuë, et je la voudrois maintenir contre tous venans. Je suis particulierement rauy de ce que la descouuerte que vous m'en aués faitte ne se rencontre pas auec ce que Monsieur de Roberual en auoit imaginé²⁾ et quil expliqua il y aura demain quinze jours en nostre Assemblee, ou entre autres il pretendoit que le phenomene de ses Anses n'estoit autre chose que des vapeurs grossieres et dvne tres grande espaisseur qui seleuoient continuellement de la Zone torride de Saturne, comme faisoient les Taches Solaires dans la seule Zone torride du Soleil, lesquels vapeurs Saturniennes nous paroissoient sous differentes phases selon quelles estoient regardees du Soleil dans le tour que Saturne fait sur son

1) Voir les Lettres N^os. 467 et 470.

2) Voir la Lettre N^o. 324.

[p. 166]

propre axe et dans celuy qu'il fait en trente annees au tour du Soleil ou du centre du Monde. Neantmoins cette explication me semble peu soustenable a comparaison de la vostre et je ne pus mempescher de luy objecter quil ny auoit point dapparence que de simples vapeurs pussent reflechir la lumière de Saturne jusqu'a nous veu la distance comme infinie quil y a de son globe au nostre; et que cestoit bien tout ce que pouuoit faire vn solide aussi vaste que deuoit estre le corps de cette Planette; Cela ne luy fit pas pourtant changer d'opinion soustenant tousjours que pour la reflexion elle se faisoit aussi fortement dvn nuage que dvn rocher et dvn liquide que dvn solide. Je ne dis rien des autres apparences de cette Planette en diuers temps ou il ne me parut point du tout satisfaire au prix de vous, quoy quen luy faisant voir vostre premiere lettre il tesmoignast de croire que vous eussiés ou emprunté ou imité vostre hypothese de Saturne sur la sienne laquelle il vous auoit communiquee au voyage que vous fistes en France il y a deux ou trois ans. Quant a la construction de lhorloge je ladmire plus que je ne la comprens soit par la durete de mon intelligence, soit par vostre trop succinte exposition. Quoy quil en soit l'inuention vous en sera tresglorieuse puisquelle a reussi dans la pratique et qu'on commence desja a sen seruir en vos quartiers. Par la figure que vous m'en aues tracée je ne voy ce me semble desset que celuy que produisent les poids et contrepoids et je n'y entens point celuy qui doit estre causé par le ressort, la situation des poids et du ressort estant differente. Si vous preniés la peine de me distinguer plus particulierement tout cela et de me le rendre plus conceuable je vous en serois fort obligé. Au reste quelquvn nous auoit dit que par cette horloge de nouuelle fabrique vous pretendies faciliter la nauigation et trouuer le secret des longitudes. Vous me feres grace aussi si vous me mandes le fondement de ce bruit afin que sil est vray je me puisse resjoüir auec vous d'vn succes si admirable de vos estudes, de l'eclatante gloire qui vous en reuiendra outre la suitte des auantages de fortune, quoyque vous ne les cherchiés pas et que vous n'en ayes pas besoin mais que Messieurs les Estats se sont engagés a donner a quiconque leur fournira le premier vn secours si desire d'eux et si peu attendu de tout le monde. Maintenant Monsieur, bien que je fusse fort tenté de faire voir vostre excellente lettre a nostre Assemblee des demain pour vostre honneur, comme je vous voy dans le doute qu'il soit encore a propos de rendre le Systeme de Saturne public, je nay osé le hazarder sans en auoir vne expresse permission de vous et n'ay pas voulu estre moins discret que la esté Monsieur Bouillaud³⁾ qui me dit bien il y a six mois que vous luy auiés justifie vostre hypothese, mais sans m'en rien dire dauantage de peur de vous manquer de secret. Je jouiray donc en moy mesme de la confiance que vous aues prise en moy pour cela jusques a nouuel ordre, et en attendant je vous diray que pose que vous soyés bien confirme dans la creance de la verite de vostre Systeme il n'y a nul peril a le

3) Chr. Huygens avait écrit à Boulliau la Lettre N^o. 443 sur le système de Saturne.

[p. 167]

publier des a present par cette lettre et quil y en a a ne le point publier par la mesme raison qui vous persuada de publier vostre lune lors que je vous representay que si quelqu'vn penetroit vostre pensee et vostre obseruation il sen pourroit attribuer l'honneur en la publiant le premier. Vous y penseres et quand vous m'aurés laissé la liberté de la faire connoistre je dis celle de vostre Systeme je me charge d'en donner connoissance a Son Altesse Royale Monseigneur dorleans par lvn de ses principaux Officiers, grand Amateur des Mathematiques et l'vn de mes intimes Amis. Monsieur Bigot⁴⁾ vous saluera en mon nom en reuenant de Francford. Je vous supplie dembrasser Monsieur Heinsius pour moy et de me croire entierement

Monsieur

Vostre treshumble et tresobeissant seruiteur Chapelain.

De Paris ce 12. Auril 1658.

A Monsieur Monsieur Christianus Hugens de Zuilichem. A la Haye en hollande.

4) Emery Bigot naquit en octobre 1626 à Rouen, où il mourut le 18 octobre 1689. Il voyagea beaucoup aux Pays-Bas, en Angleterre, en Allemagne et en Italie. De son père, doyen de la cour des aides en Normandie, il avait hérité d'une belle bibliothèque, riche en manuscrits, qu'il augmenta notablement; quoique dans son testament il eût ordonné qu'elle ne serait jamais vendue, le catalogue de la vente parut déjà en juillet 1706.