Oeuvres complètes. Tome I. Correspondance 1638-1656

[p. 504]

N^o 341.
Fr. van Schooten à Christiaan Huygens.
8 octobre 1656.

La lettre se trouve à Leiden, coll. Huygens.
Elle est la réponse au No. 340.

Clarissimo Viro Domino Christiano Hugenio Fr. à Schooten S.P.

Gratias Tibi ago Vir Clarissime, pro Epistola quam misisti, in qua ubi literas Cartesij impressas vidi, optavi simul, et ea quae à Domino de Beaune fuerunt annotata, à Te typis fuisse mandata ut eò magis, quae de hac Circuli Quadratura autor in lucem emisit, infirmis fundamentis superstructa esse cuivis constaret, et Tu auctoritatem auctoritati superadderes. Alterum exemplum Clarissimo Domino Lipstorpio dedi, qui, ut Tibi quoque ipsius nomine gratias agerem, rogavit, atque nuper hìc, die videlicet 2 Octobris, publicè ad gradum Doctoratus et summa in utroque Jure privilegia consequenda, de Appellationibus in causis criminalibus¹⁾, magno cum applausu disputavit, quique propediem, ut narravit, in Angliam est profecturus. Caeterum, quoniam Dominus Mylon [ut]²⁾ scribit, per Te literas ad me dare consuevit, quò unà sub ductu litterarum Domini de Carcavj ad me pervenirent, Tuque Vir Clarissime, ob studiorum commercium, quod cum ijs inijsti frequentius ad illos scribis, rogo ut has insertas quàm primum cum tuis ad Dominum Mylonium amandare digneris. Quod si feceris plurimum Tibi devinxeris

Tui officiosissimum Fr. à Schooten.

Lugd. Bat. 8 Octobr. 1656.

A Monsieur, Monsieur, Christianus Hugenius, gelogeert ten huijse van Myn Heer van Zuijlechem

op

t'pleijn

in S'Graven-hage.

Cito

cito

port.

1) Disputatio Iuridica Inavgvralis de Appellationibus in cavsis criminalibvs qvam Ter Opt. Ter Max. Auspiciis Ex auctoritate Magnifici Rectoris Dn. Iacobi Golii, Linguae Arabicae & Matheseos in Inlustri Lugduno-Batava Professoris Ordinarii & famigeratissimi, nec non Amplissimi Senatus Academici consensu, & Nobilissimae Facultatis Iuridicae decreto, pro gradu Doctoratus, & summis in utroque lure privilegiis ritè consequendis Publicè sine Praeside defendet Daniel Lipstorpius, Lubecensis. Ad diem 2 Octobris, horis locoque solitis, Lvgdvni Batavorvm; Ex Officinâ Philippi de Cro-y, Anno 1656. in-4^o.

2) Ici la lettre est déchirée.