Oeuvres complètes. Tome I. Correspondance 1638-1656

[p. 264]

N^o 173.
Christiaan Huygens à Gregorius a St. Vincentio.
5 janvier 1654.

La minute et la copie se trouvent à Leiden, coll. Huygens.
La lettre est la réponse au No. 125. Gregorius à St. Vincentio y répondit par le No. 175.

Gregorio a Sancto Vincentio faustum optat et auspicatur anni exordium.

Christianus Hugenius.

5 Janua. 1654.

Non decet perpetuum hoc fieri silentium nostrum Vir Clarissime, quod ut mea culpa quodammodo hucusque productum fateor ita nihil minuisse scio de affectu ergo te meo aut venerationi qua et virtutes Tuas caeteras et humanitatem eximiam quâ me coram excepisti merito sum prosecutus. Expectavi huc usque et frustra quidem ut nova scribendi occasio nasceretur nobis ex Apologia Patris Ainscomij¹⁾, quam ante menses aliquot ad finem jam perductam mihi nunciatum est, et sub eorum manibus versari quibus censura librorum curae est. Eam igitur quid adhuc luce publica arceat equidem excogitare mihi difficile est, tibi verò cognitum proculdubio quapropter rogo ne id diutius à me ignorari patiare sed pro solito candore significes. Illud quoque nosti quod aliam Tui defensionem²⁾ adornat Dominus Aloysius Kinnerus quocum amicitiam te conciliante contraxi; proximis enim quas ad me dedit literis³⁾ sub praelo sudare opusculum suum significavit; an Tuum potius; quo secundam ordine Quadraturam tuam concinnius explicandam suscepisse ait et in meliorem ordinem dirigendam quàm tibi temporis angustia et invita festinatio permiserint. Spero reperturum ipsum qua via exemplar ad nos perferatur, valde enim quid effecerit videre desidero. Plures jam literae ultro citroque inter nos commearunt, unde Ingenium ejus optimum sane atque acutum, aliquatenus mihi innotuit. Caeterum id quod multas ob causas nescire me non oportet, quo loco aut conditione sit inter suos, nondum satis compertum habeo; atque hoc me aequum est à te edoceri. quum diuturna inter vos, nisi fallor, constiterit familiaritas. Equidem omnibus quotquot ad me dedit epistolis peramicam et honorificam Tui mentionem fecit. Et postremis istis quas dixi Aesonis tibi juventam aut Nestoreos annos tibi praecabatur ut perficere posses et publico bono vulgare quaecunque prae manibus haberes. dicebat autem Deliaco Problemati⁴⁾ te animum nunc adjecisse. igitur per plana constructionem ejus tentari opinor rem arduam planè et multorum opinione impossibilem; de qua tamen cur omnino desperandum sit, à nemine ratio adhuc reddita est idonea. Varijs istis diversorum artificum repertis quae Eutocius in Solutionem dif-

1) Voyez la Lettre N^o. 145, Note 6.

2) Voyez la Lettre N^o. 167, Note 3.

3) Voyez la Lettre N^o. 172.

4) Voyez la Lettre N^o. 167.

[p. 265]

ficilis hujuscemodi recensuit, suis in Archimedem commentariis duo vel tria eodem fini à me superaddita sunt, quorum alterum cum demonstratione Domino Kinnero pridem exhibui; Et methodus certa est, quâ plures ejusdem problematis ne dicam innumerae constructiones inveniri queant. Utilissima autem proculdubio est eadem, quae factu facillima; Ideoque in hoc dandam operam dicerem, ut per anguli trisectionem aut aliquid quod aeque facilem χειρ♉ργíαν admitteret, propositum efficiatur. Utique si ad planam constructionem perveniri natura rei non patitur. Apollonij Conicorum libri 8 Edente Claudio Richardo⁴⁾ utrum prodierint etiamnum incertus sum, cum in catalogo quidem librorum qui Fràncofurtensibus nundinis prostitere numerentur, nec tamen mitti mihi eos videam ab ijs qui Antwerpiae hoc in se muneris receperunt. Si bene recordor coram mihi narrasti non ipsos Apollonij libros illum edere sed suos, neque aliud praeter argumenta in ijs genuina esse, quae apud Pappum Alexandrinum proponuntur. Quod si ita est, dabo equidem operam ut Clarissimus Golius noster tandem aliquando manum operi admoveat neve diutius in manes Apollonianos peccet scripta ejus premendo quae à multis jam annis possidet. lentum illum dicerem nisi et ipsi mihi talis viderer qui sesquianno fere vix unam Dioptricorum Tractationem absolvi. neque tamen ita absolutus est quin tempore concesso auctior evadere possit aut certe limatior. Itaque seposui nunc tantisper donec refrigerato inventionis amore velut alienum inspicere revertar. Postea vero editionem non differam, siquidem a plurimis eum desiderari comperio, quorum lectione et comprobatione praecipuum mihi laboris praemium parari arbitror. A te verò Vir Praestantissime non minimam quoque ejus partem expecto. Quem proinde diu nobis superstitem precor et incolumem. Vale.

4) Voyez la Lettre N^o. 175.