Oeuvres complètes. Tome I. Correspondance 1638-1656

N^o 97.
Christiaan Huygens à Fr. van Schooten.
[octobre 1651.]

La minute et la copie se trouvent à Leiden, coll. Huygens.
La lettre est la réponse au No. 95.

Chr. Hugenius F. Schotenio Viro Clarissimo S.D.

Libellum meum a te perlectum et remissum laetus recepi, laetus inquam tam laudibus quibus me affatim cumulasti, nam cui non gratissimum accidat laudari à laudato viro, quam accuratis in loca quaedam animadversionibus tuis, praecipuè quod nonnulla de compositione et conversione rationis merito commonuisti, atque effecisti ut in posterum cautius ijs sim usurus. Sanè si quando haec ut erant impressa fuissent, duos istos errores magno redemptos voluissem puto, etiamsi nullius ineptae ratiocinationis sed tantum incuriae indicium futuri fuerint atque tibi tam leves videantur ut ne errores quidem volueris vocare. De caetero videbo ut cum primum commodum erit, Theoremata ista in lucem edantur quandoquidem usque adeo absoluta et Archimedea tibi videntur. De Patre Gregorio dixi tibi nuper me machinari aliquid,

[p. 149]

quo Cyclometriam ipsius evertam, Eam jam duabus confutationibus ad absurdum deduxi. et constitui ad ipsum literas dare ut sciam num adhuc in sententia permaneat, ita enim et patri visum est atque utrum monitu meo Palinodiam edere malit an expectare ut ego quae deprehendi faciam publici juris. Videbo, quid hisce fecialibus responsi daturus sit, et interea bellum quam accuratissime potero instruere pergam. puto enim omnino eo opus fore.

Quae ad litem tuam pertinent, nimirum excerpta et exemplar apochae patris tui, quod petieras ea jam procuravi et penes me habeo, cumque a Buseroio¹⁾ subscripta erunt confestim patrono tuae causae mittentur. Vale.

1) Laurentius Buysero mourut le 29 mars 1674. Il était greffier du Prince Frederik Hendrik.