Latijnse gedichten 1607-1620

105 ←31 12 1614 Ged., dl. 1 p. 57
Iambus de ordine servato mihi in lectione Institutionum Iustiniani. παραβληδηνaant.

Quaeris, legendis Institutionibus
quis ordo servetur mihi? Vide, pater.

Studium omne pono machinis simillimum

horariis, solaris asseclis gradus.
Hic ut rotarum maximas lento fere
per orbis ambitum trahi videas gradu,
parvas item peridrome levi ac brevi
saepe ante magnas circulis volvi suis
ideoque non parvas minus quam maximas
in munus impigras suum iunctam dare
operam trahendae machinae, quantum decet,
et circumagendae, quatenus Phoebus praeit.

Sic, lectionis ambitum ducens meae,

genus rotarum machinam trahentium
duplex resigno, parvulumque et maximum,
adeo ut rotarum maximae subeat vicem
haec illa totos lectio absumens dies
mensesque totos - qualis aut Giphanii,
Minsingerii aut cuius velis e plurimis
deducta commentario, quae, quamlibet
longam ambeundo circulo trahat moram,
agendae confert machinae vel plurimum.

Accedit alter (haec erit minor rota)

decursus, ambitu magis levi ac brevi.
Haec illa crebra, non coacta lectio,
horis, minutis, horulis, minutulis
contenta, qualis aut sedentis ad focum
et temperantis otium negotio,
aut, si serena luxit e caelo dies
nitidusque mentem Phoebus elicit foras,