Latijnse gedichten 1607-1620

92 ±04 02 1613 Ged., dl. 1 p. 46aant.

Inclute, Nassaviae celeberrima gloria gentis,
Mauriti, cui clara suas Victoria lauros
attribuit toties, toties dignata coronis
cingere maiori dignos diademate crines,
cuius ab occasu memorabile nomen ad ortum
transtulit immensum volitans vaga fama per orbem:

hactenus horrendi patuere sacraria Iani

belliferaeque fores, miseris invisa colonis
limina et herbosis nil tale merentibus agris,
dum furit insanus violenta Marspiter ira,
oppida laeta viris viduans et messibus arva
et pastore greges et dulci prole parentes.
Hactenus in tantis iactatur Belgia turbis,
Belgia cui clarum et nullo delebile saeclo
nomen acerba dedit dubiis fortuna periclis.

Et nunc (pro superi!) laceras a caede recenti

sanguinolenta genas vix tandem ad sidera tollit,
magno aerumnarum depressum pondere collum,
ut tibi, caelicolum rector supreme deorum,
persolvat meritas longo post tempore grates.

Tu quoque, magnanimi suboles generosa parentis,

Mauriti, rabidis illi Palinurus in undis
semper eras. Te freta, malis licet obruta tantis,
pertulit ingentes patienter Belgia poenas.
Nec sinet illa tuas caecis ingrata tenebris
condere plus meritas obscura silentia laudes,
sed dabit hancce suis quibus incluta floret Homeris
Iliadem longo memorandaque carmine gesta,
ut levibus quascumque solent impendere nugis