Latijnse gedichten 1607-1620

91 ±01 01 1613 Ged., dl. 1 p. 44
Patri colendissimo felix huius anni auspicium exoptat Constantinus Huygens.
1613aant.

Care pater, nostris toties celebrate Camenis,

unica laus studiis praesidiumque meis,

unice Maecenas, quo non mihi carior alter

qua sua diffundens lumina Phoebus agit:

accipe, sed facilis, quando tibi nulla quietem

impedit affligens tarda podagra pedes,

quando nec intentam spinosa negotia mentem

dilacerant, nostris aemula deliciis,

accipe quos non hoc tibi consecramus ἀϰαίρους

sed magis εὐϰαίρους tempore versiculos.

Frigida bruma suas retulit de more Kalendas,

ancipiti quondam tempora sacra deo.

Illa dies priscis toties celebrata poetis,

illa meo toties omine fausta tibi,

en redit - et simul ille lyrae, simul ille poesis

inventor vires temptat Apollo meas.

Temptat, et instigans animum dat et imperat idem.

O! Utinam vires addat et ille pares!

Sed moror ac sero divinis pareo iussis.

Non fert tam longas noster Apollo moras.