Paraenesis politica of politijcke onderwijsinghe tot dienste van alle menschen om te gebruicken maticheyt in voorspoet, en stantvasticheijt in teghenspoet

[p. 25]

d'Autheur

O Constantia dit ghewest met sijn schoon chieraten,
Heb ick nu onlancx gheweest van sinne,
Te abandonneren en te verlaten,
Om den nijt partialiteyt en onminne,
Om den dieren tijt sterfte, en oorloghe die inne,
Dees Landen nu regneert aen alle canten,
Noch twijffel ick of ick vertrecken wil t'mynen ghewinne,
Om elders gaen te Sayen te Mayen en te Planten.
Dit Lant is vol Roovers Moorders en vol Trauwanten.
Daer isser veele die daer steken haer hant,, tusschen,
Schors en boom, maer niemant en wilt den brant, blusschen.

EEnighe raden my noch dat ick sou vertrecken,
Om elders in rust en vrede te leven,
Soud' ick u den boosen handel ontdecken,
Die hier om gaet u herte sou in u lichaem beven,
V hayr sou over eynde staen, den moet sou u begheven,
Ten waer dat ghy soo constant waert als Picas in Zee,
In een maent en sou van my niet worden beschreven,
Al onsen onverdraechelijcken teghenspoet en wee,
Die wy lyden en t'sweert der wraken is noch uyter schee
Wy en weten noch niet wat Godt ons voort verleenen,, sal,
Oft hy ons verlossen sal, oft als gruys vercleenen,, sal.