Emblemata amatoria
(1611)–P.C. Hooft, R.J. de Nerée, C.G. Plemp–Afbeeldinghen van minne. Emblemes d'Amovr
[pagina 107]
| |
Wyse: Boerinneken als ghy gaet water halen.
Cephalus. Amaryllis.
C. ACh Amaryllis!
A. Seght wat u wil is.
C. Mijn harte gloeyt als vuyr van binne.
A. Wel neemt het soete wey van geyten inne.
C. Maer soo't gheen baet voelt?
A. Neemt Cicorey die koelt.
C. Al waerter mee bespoelt,
'T lescht gheen Minne.
A. Soudt Minne wesen?
C. Iae't soud ick vresen.
A. Die hoor ick plach een mensch te schenden.
C. Och 'tis een sware siecte vol ellenden.
A. Ist sieckte die besmet?
C. Och jae zy altemet.
A. Soo wil ick dan mijn tret
Van u gaen wenden.
C. Och wilt niet vlieden.
A. Mijn Ouders 't rieden.
C. Wat rieden die tot mijns verachten?
A. Dat ick my dapper van de Min sou wachten.
C. Och blijft my doch de naest.
A. Neen seecker niet. wat haest?
C. Soo moet ick dus verbaest,
Van Min versmachten.
A. En of ick bleve?
C. Soo hiel ick't leven.
A. Soud' ick u dan u leven baten?
C. Iae, want ick sturf, gingdy my verlaten.
A. Adieu ick neem mijn keer.
C. En ick beswijcke seer.
A. Ick heb wel Vryers meer
Soo hooren praten.
| |
[pagina 108]
| |
C. 'Tsal soo ghebeuren.
A. Praetgens zijn leuren.
C. Vw vlucht sal my mijn leven rooven.
A. Neen neen ick moet de Vryers niet ghelooven.
C. V Moeder gaft u in.
A. Adieu ick vrees de Min.
C. O jonghe domme sin!
Ick singh voor dooven.
A. Of ickse kreghe?
C. Soo waer't te deghe.
A. Wanneer wy bey sieck souden wesen?
C. Ia, want dan souden wy eerst bey ghenesen.
A. Neen dat gheloof ick niet.
C. Wel proeft het, en besiet.
A. Neen neen mijn Moeder riet
My noyt aen desen.
C. 'Tis soet dus wijckt // niet.
A. Aen u dat blijckt // niet.
C. 'Tzijn soete smerten die niet deeren.
A. Om smert ist niet de pyne waert te keeren.
C. Ghy weet niet wat ghy mijdt.
A. Adieu ick vlie met vlijt.
C. Wel Amaryl de tijdt
Sal u het leeren.
|
|