Emblemata amatoria

Afbeeldinghen van minne. Emblemes d'Amovr

Sonnet.

Indien mijn leven sich soo langhe kan vervveeren

Teghen mijn vvreet gheluck en onghesiene kans,

Dat ick verdooven sie, de Songhelijcke glans,

Vrouw, van u ooghen schoon, door ouderdooms vermeeren;

En u goutdradich hayr in silverdraet verkeeren;

En uvve lust vergaen van sanck en spel van dans;

Van soete boertery van kruyt van Roosekrans;

Van geel, van groen, van wit, en incarnate kleeren:

Dat sal mijn oude Min my gheven in de mondt

Vermaningh van de tijt die ghy niet recht bestede;

En oft dan schoon gheviel, dat ghy noch voore stondt

V merckelijcke schult, met woordt en schijnbaer reden;

Soo sal nochtans een sucht diep uyt uvvs hartsen grondt,

Leetvvesens bode zijn, en ick ten deel te vreden.