Emblemata amatoria
(1611)–P.C. Hooft, R.J. de Nerée, C.G. Plemp–Afbeeldinghen van minne. Emblemes d'Amovr
Wyse: Fortuyn elaes bedroeft, &c.VErheven grootsche siel die 'swerelts doen belacht;
Die Rijckdoom boven maet, en heerschappy veracht;
Eerwaerde wyse Vrouw, die met u hooch verstandt,
Der andren glans verdooft, en zeden maeckt te schandt.
Dit's mijn hoochdraghentheyt, dit's al mijn hovaerdy,
Dat u verheven siel comt over een met my.
Dit's al mijn hooghe moed dat ick u waerde ken;
Dit's my mijn vryheydt waerd dat ick daer slaef van ben.
| |
[pagina 100]
| |
Mijn Vrou, ick ben u slaef nu heel, want ghy verwondt,
'Tweerspannich deel mijns harts, dat u noch teghenstondt;
Wanneer u heuscheyts cracht beweechde mijn ghemoet,
Ghelijck de sachte slaep den afghesloofden doet.
Vol oproers was mijn borst, vol felle windt en brandt;
Een onbesuysde storm quelde mijn inghewandt;
En mijn verdoolde gheest was heel met twist beroert;
Dewijlmen in mijn hart een heftich oorloch voert.
Mijn Vrou 't verwonnen deel van't hart was op u zy;
En't onverwonnen deel weygherde slaverny;
Hier was een harden strijt, tot dat u heusheyt quam,
Die licht de rest van't hart vermeestert innenam.
Ghelijck den sachten slaep, die veel ellenden sust,
De moede leden stroockt met aenghename rust:
Alsoo u heusheyt, die van't hart was langh verbeyt,
Streelt my't ghemoet, met noch heftigher sachtigheyt.
Door u verwinningh Vrouw eyndicht den harden strijt.
In mijn verwonnen hart ghy de Princesse zijt:
Daer u verheven deucht op't rijckst gheschildert staet,
Ach soete slaverny die boven vryheyt gaet!
|
|