Emblemata amatoria

Afbeeldinghen van minne. Emblemes d'Amovr

[p. 101]

Sonnet.

VVech soete sotterny, flux segg' ick vvilt verreysen,

Eer dat mijn krancke breyn sich t'eenemael vergeckt.

Soo niet dan anxt, en vaer in't sotte Minnen steckt,

En sorghe vol verdriet, vvaer van het hart mach eysen;

O Min uyt mijn verstant vvilt dan te rugghe deysen,

Ghy die my het vernuft, met loose schijn, bevleckt.

Flux soete sotterny, vvech segg' ick, en vertreckt,

Met u beloften schoon van ydele ghepeysen.

Datmen der Minnen cracht in zijn ghemoet ghedoocht,

VVanneer een vaste gront sich aen u hoop vertoocht,

Is eenichsins gheraen, maer die kunt ghy niet vinnen.

Te minnen sonder hoop is droom en beuseling:

Dies soete sotterny vertreckt van hier ghering,

VVech segg' ick, en vertreckt uyt mijn vervverde sinnen.