De hane va Job. Euëver deere en luuj oet 't land va Mergraote

[p. 111]

Keersjmis

In de Keersjnach weere doar de aw luuj alle meute* en alle tobbe en alle gruulle* vol water boete gezat. In de Keersjnach wurt ozzen Hergod es Keersjkinneke gebooëre. De Ingele zinge in de Keersjnach in de loch booëve de dörrepe, booëve de gewande* en booëve de häöf*. En 't water in de meute en in de tobbe en in de gruulle is da gezeiëngent, 't water is wien woore: De luuj drinke gein aander water, veuërdat 't Keersjwater op is. De peiërd, de keu, de verreke, de hoonder en de hane kriege 't Keersjwater te zoepe. 't Keersjwater bringt geluk bie de luuj en bie 't vieje.

Zaodvruchte en kuukeries en majjes weere ooch in de Keersjnach boete gezat. Haver, terref en kooëre die boete höbbe gesjtaande bringe geluk bie 't vieje en i ge veld. Geen laeg* vieje, gein las mit de maere, de peiërd kriege d'r krop* neet en ze kriege 't neet op 't blood. De kraos en aestere* haole de kuuke neet foert dee van d'r kuukeries höbbe vreeëte dae in de Keersjnach haet boete gesjtaande. Ze dun niks draan. En de hoonder en de hane vreeëte wie soeker aan d'r majjes dae in petieële* is boete gezat in de Keersjnach. D'r vos deet niks mieje draan.

Haver wurt driejmaol boete gezat, in de Keersjnach, in de nach van Driekeuninge en in de Paosjnach.

Dao wurt ooch gezag, in de Keersjnach um twelf oore sjtönt alle peiërd en alle keu rech in d'r sjtal. Es de keender gönt kieke sjtënt ze allemaol sjooën rech in de riej. Mae de knechs höbbe de deere van te veuëre gaw opgejaagt.

Dao wurt ooch gezag: dae op Keersjdaag appele iet, kriegt sjwaere. En es 't Keersjkinneke is gebooëre höbbe wortele en reube d'r sjmaak verlooëre.

En de waerprofieëte zegke: 'n greun Keersimis, 'n witte Paosje. Keersjmis op gen lèn, Paosje a gen bren*, zegke die van te Bannet. Tussje Keersjmis en Driekeuninge lengen de daag eene hanesjreij. En de twelf daag nao Keersjmis zunt de loerdaag*. Wie d'r weend op eeker van de loerdaag sjteet zoeë sjteet d'r weend eeder maond van 't jaor.

Kristesdaag* is d'r sjooënste daag van 't jaor veuër de aw luuj en veuër de jong luuj die geleuve. 't Gelouf bringt 't geluk i gen hoes, i genne sjtal en i ge veld. 't Gelouf aan Keersjmis bringt 't geluk ooch veuër 't nuuj jaor.

1962