Het Negerhollands der Deense Antillen

Bijdrage tot de geschiedenis der Nederlandse taal

Regelnummers proza verbergen

Die Handlingen van die Apostels.

Die 8 Capitel.
Vs. 27-40.

En em a staan op, en a loop hen; en kik, een Man van Moorenland, een Kamerling en een machtig Heer van die Koningin Candaces na Moorenland, die a wees over allemaal si Skat-Kamers, em a ka kom na Jerusalem, vor bed aan. 28.En em a reis weeraan na Hoes, en a set op si Wagen, en a lees die Propheet Jesaias. 29.En die Geest a see na Philippus: Loop voort, en hou joe by deese Wagen. 30.Da Philippus a loop hen, en a hoor, dat em a lees die Propheet Jesaias, en a see: Joe verstaan dan ook, wat joe lees?

[p. 268]

31.Em a see: Hoesoo mi sal kan, as niet iemand onderwies mi? en em a bed die Philippus, vor kom op, en vor set by em. 32.Maar die Woorden van die Skrift, die em a lees, a wees deese: Em ben geleyd glik as een Skaap na die Slachting, en still as een Lam navoor diejeen, die skeer em, soo Em no a open si Mond. 33.Na si Verneedering ben si Oordeel weegenomen, en wie sal kan vor vertell si Geslacht? Want si Leev ka word weegenomen van die Aarde. 34.Da die Kamerling a antwoord na Philippus, en a see: Mi bed joe, van wie die Propheet spreek soo? Van em selv, of van iemand anders? 35.En Philippus a open si Mond, en a begin van deese Skrift, en a predik na em die Evangelium van Jesus. 36.En toen sender a reis verder over die Pad, soo sender a kom na een Water; en die Kamerling a see: Kik, hier ben Water, wat verhinder mi, vor word gedoopt? 37.Maar Philippus a see: As joe gloof van geheele Hert, soo die kan geskied. Em a antwoord, en a see: Mi gloof, dat Jesus Christus ben die Soon van God. 38.En em a gie Order, dat die Wagen sal hou still. En sender a stap af nabinne die Water, soo wel Philippus as die Kamerling, en Philippus a doop em. 39.En toen sender a kom op ut die Water, da die Geest van die Heere a neem Philippus wee, en die Kamerling no a kik em meer; maar em a reis si Pad met Bliskap. 40.En Philippus a word gevonden na Asdod, en em a wandel rondom, en a predik die Evangelium na allemaal Steden, tee em a kom na Cesarien.

Die 19 Capitel.
Vs. 23-40.

Maar na dieselvde Tid niet een kleen Beweeging a kom op, van wegens deese Pad. 24.Want een Silversmid, met Naam Demetrius, a maak Silver-Tempeln van Diana, en a breng niet een kleen Profit na diejeen, die a wees van deese Ambacht. 25.Dieselvde em a neem malkander, en die Met-Arbeiders van deese Ambacht, en

[p. 269]

a see: Liefe Mans! jender weet, dat ons hab ons Welvaart van deese Handel. 26.En jender kik en hoor, dat niet alleen na Ephesus, maar ook meest na geheel Asien deese Paulus keer af veel Volk, bepraat sender, en see: Die no ben Goden die ka maak met Handen. 27.Noe niet alleen ons Handel sal loop Risiko, vor kom veracht; maar selv die Tempel van die groot Godinne Diana, no sal word geëstimeert meer, en si Majesteit sal ondergaan, na die doch geheel Asien en die Werld bewies Gods-Dienst. 28.Toen sender hoor die, soo sender a kom voll van Toorn, a roep en a see: Groot ben die Diana van die Ephesers! 29.En die geheele Stadt a kom voll met Oproer, en a kom malkander met een Geraas, na die Skouw-Plaats, eenmoedig, en a vass Gajus en Aristarchus van Macedonien, die a wees Paulus si Companie op die Reis. 30.Toen noe Paulus a will loop onder die Volk: da die Jungers no a lat em die toe. 31.Som van die Oversten na Asien ookal, die a wees goeje Vrienden van Paulus, a stier na em, en a vermaan em, dat em no a sal gie si selv op die Skouw-Plaats. 32.Som a roep dan soo, en som wat anders; en die Vergaadering a wees confus, en die meeste Part no a weet, voor wat sender a ka kom malkander. 33.En som van die Volk a trek Alexander voort, toen die Jooden a stoot em navoor. Maar Alexander a wink met die Hand, en a will verantwoord em navoor die Volk. 34.Maar toen sender a bemerk, dat em a wees een Jood, soo sender allemaal a roep met een groot Stem, omtrent twee Uur lang: Groot ben die Diana van die Ephesers! 35.En toen die Stadtskriever a ka maak die Volk still, da em a see: O Mans van Ephesus, welk Mensch ben, die no weet, dat die Stadt van Ephesus ben een Tempel-Bewaarerin van die Godinne Diana, en van die Beeld, die ka vall ut van die Hemel? 36.Derwil noe niet een Mensch kan spreek tegen die, soo jender sal wees ja still, en no handel onverstandig. 37.Jender ka breng deese Mensen hier, die no ben Kerk-Roovers, en ook geen Lasteraars van jender Godinne. 38.Voordaarom, as Demetrius, en die ben van een Ambacht met em, haab eenigste Saake tegen iemand, soo die

[p. 270]

hab ja Dagen vor hou Recht, en Land-Voogten ben da, lat sender verklaag sender onder malkander. 39.Maar as jender will handel van ander Saaken, soo die moet word afgemaakt na een ordentlik Vergaadering van die Gemeente. 40.Want ons loop Risiko ookal, dat ons sal kan word verklaagt, over die Oproer, die ka geskied van Dag, en ons no sal hab Excus, die ons kan maak, voor deese Oproer. En Aster em a ka see die, soo em a latstaan die Gemeente loop.