Het Negerhollands der Deense Antillen

Bijdrage tot de geschiedenis der Nederlandse taal

Regelnummers proza verbergen

E. Teksten ontleend aan de vertaling van het Nieuwe Testament door de Herrnhutters (N.T.H.).
Die Evangelium van Mattheus.

Die 13 Capitel.
Vs. 1-58.

Na dieselvde Dag Jesus a loop ut van die Hoes, en a set neer na Sie van die See. 2.En moeschi Volk a kom malkander na Em, soo dat Em a stap nabinne een Skip, en a set; en allemaal Volk a staan na die Wal. 3.En Em a spreek na sender veel en meenig Dingen door Gliknissen, en a see: Kik, een Saayer a loop ut vor saay. 4.En toen Em a saay, da som (van die Saad) a vall na die Pad, en die Vogels a kom, en a jeet die op. 5.Som a vall na die Steen-Grond, maar die no a hab veel Aarde; en a kom gauw op, voordaarom, dat die no a hab Diepte van Aarde. 6.Maar toen die Son a kom op, soo die a bran, en derwil die no a hab Wolter, soo die a droog wee. 7.Som a vall tuschen die Doornen; en die Doornen a groey op, en a verstik die.

[p. 264]

8.Som a vall na een goeje Grond, en a breng Vrucht, som hondertvoudig, som sestigvoudig, en som dertigvoudig. 9.Wie hab Ooren voor hoor, die hoor. 10.En die Jungers a kom na Em, en a see: Voorwaarom Joe spreek door Gliknissen na sender? 11.Em a antwoord, en a see: Na jender die ben gegeven vor weet die Verborgenheid van die Koningrik van die Hemel; maar na deese die no ben gegeven. 12.Want wie hab, na em word gegeven, dat em hab in Overvloet; maar wie no hab, van em word genomen ookal, wat em hab. 13.Voordaarom mi spreek na sender door Gliknissen; want met Oogen, die kik, sender no kik, en met Ooren, die hoor, sender no hoor: want sender no verstaan die. 14.En na sender wordt vervoellt die Propheceying van Jesaias, die see: Met die Ooren jender sal hoor, en no verstaen die, en met Oogen, die kik, jender sal kik, en no vass die. 15.Want die Hert van deese Volk ben verstokt, en met die Ooren sender hoor swaarlik, en sender slot sender Oogen toe, dat sender no kik met die Oogen, en no hoor met die Ooren, en no verstaan met die Hert, soo dat sender no bekeer, dat mi kan help sender. 16.Maar salig ben jender Oogen, dat sender kik, en jender Ooren, dat sender hoor. 17.Voorwaar mi see na jender: Veel Propheeten en Rechtveerdigen ka begeer vor kik, wat jender kik, en no ka kik die, en vor hoor, wat jender hoor, en no ka hoor die. 18.Soo jender hoor noe deese Glikniss van die Saayer. 19.Als iemand hoor die Woord van die Koningrik, en em no verstaan die, soo die Quaaje kom, en roov die wee wat ben gesaayt nabinne si Hert; en deese ben em, die ben gesaayt na die Pad. 20.Maar waar die ben gesaayt na die Steen-Grond, die ben em, die hoor die Woord, en neem die op aanstonds met Bliskap. 21.Doch em no hab Wolter nabinne em selv, maar em draai glik as die Weer; wanneer Droefnis en Vervolging ris op om die will van die Woord, dan em erger si selv aanstonds. 22.En waar die ben gesaayt na onder die Doornen, die ben em, die hoor die Woord, maar die Sorg van deese Werld,

[p. 265]

en die Bedrug van Rikdom verstik die Woord, en em no breng Vrucht. 23.Maar waar die ben gesaayt nabinne een goeje Grond, die ben em, die hoor die Woord, en verstaan die, en breng dan Vrucht ookal, en som draag hondertvoudig, som sestigvoudig, en som dertigvoudig. 24.En Em a stell sender een ander Gliknis voor, en a see: Die Koningrik van die Hemel ben glik as een Mensch, die a saay goeje Saad na si Veld. 25.Maar toen die Menschen a slaap, da si Vyand a kom, en a saay Onkruit tuschen die Weit, en a loop wee. 26.Toen noe die Kruit a spreng op, en a breng Vrucht, da die Onkruit a wees vor vind ookal. 27.Da die Dienst-Knechten a kom na die Hoes-Vader, en a see: Heere, Joe ka saay dan niet goeje Saad na joe Veld? Van waar die Onkruit kom dan? 28.Em a see na sender: Die Vyand ka doe die. Die Dienst-Knechten a see na Em: Joe will dan, dat ons loop hen, en trek die ut? 29.Em a see: Neen! voor dat jender no trek met een die Weit ut ookal, as jender trek die Onkruit uit. 30.Lat alltwee groey malkander, tee na die Krop; en na die Krop-Tid mi will see na die Maajers: Vergaader vooreerst die Onkruit, en bind die in Bondels, vor bran die op; maar die Weit vergaader voor mi nabinne mi Magazinen. 31.Een ander Gliknis Em a stell voor na sender, en a see: Die Koningrik van die Hemel ben glik as een Mostert-Saad, die een Mensch a neem, en a saay die na si Veld. 32.Deese ben die Kleenste van allemaal Saad; maar wanneer die groey op, soo die ben die Grootste onder allemaal Soort van Kool, en word een Boom, dat die Vogels na onder die Hemel kom, en woon na onder sie Takkies. 33.Een ander Gliknis Em a spreek na sender: Die Koningrik van die Hemel ben glik as een Suurdeeg, die een Vrouw a neem, en a mingel die onder drie Skepels Meel, tee die a kom geheel doorgesuurt. 34.Al deese Dingen Jesus a spreek door Gliknissen na die Volk; en sonder Gliknissen Em no a spreek na sender. 35.Voor dat die a sal kom vervoellt, wat gesproken ben door die Propheet, die see: Mi will open mi Mond in Gliknissen, en mi wil spreek ut Verborgenheden, die a wees onbekent van die Begin van die Werld.

[p. 266]

36.Dan Jesus a latstaan die Volk van Em, en a kom na Hoes; en si Jungers a kom na Em, en a see: Verklaar na ons die Gliknis van die Onkruit op die Veld. 37.Em a antwoord en a see na sender: Em, die saay die goeje Saad, ben die Mensch si Soon. 38.Die Veld ben die Werld. Die Kinders van die Koningrik ben die goeje Saad. Die Kinders van Boosheid ben die Onkruit. 39.Die Vyand, die saay sender, die ben die Duvel. Die Krop-Tid ben die End van die Werld. Die Maajers ben die Engels. 40.Glik as Volk trek noe die Onkruit ut, en bran die op met Vuur; soo die sal wees ookal na die End van deese Werld. 41.Die Mensch si Soon sal stier si Engels, en sender sal vergaader ut van si Koningrik allemaal Ergernissen, en sender, die doe Ongerechtigheid; 42.En sal gooy sender nabinne die Vuur-Oven; daar sal wees Gekrisch en Kneersing van Tanden. 43.Dan die Rechtveerdigen sal skien, glik as die Son, in die Koningrik van sender Vader. Wie hab Ooren voor hoor, die hoor. 44.Weeraan die Koningrik van die Hemel ben glik as een verborgen Skat in een Veld; die een Mensch a vind, en a verberg die, en a loop hen voor Bliskap over dieselvde, en a verkoop allegaar wat em a hab, en a koop die Veld. 45.Weeraan die Koningrik van die Hemel ben glik as een Koopman, die a soek goeje Perlen. 46.En toen em a vind Een kostlik Perl, em a loop hen, en a verkoop allemaal, wat em a hab, en a koop dieselvde. 47.Weeraan die Koningrik van die Hemel ben glik as een Net, die word gegooyt nabinne die See, met die Volk kan vang divers Soort (van Visch). 48.En wanneer die ben voll, soo sender haal die ut na die Wal, en set, en pek die goeje nabinne een Vat malkander, maar die quaaje sender gooy wee. 49.Soo die sal wees ookal na die End van die Werld. Die Engels sal loop ut, en sal separeer die Quaajen van die Rechtveerdigen. 50.En sal gooy sender nabinne die Vuur-Oven; daar sal wees Gekrisch en Kneersing van Tanden. 51.En Jesus a see na sender: Jender ka verstaan dan all deese Dingen? Sender a see: Ja, Heere!

[p. 267]

52.Da Em a see: Voordaarom elkeen Skriftgeleerde, die ben geleerd tot die Koningrik van die Hemel ben glik as een Hoes-Vader, die breng voort ut si Skat nieuwe en oude Dingen. 53.En die a geskied, toen Jesus a vollendig deese Gliknissen, dat Em a loop wee van daar; 54.En Em a kom na si Vaderland, en a leer sender nabinne sender Skoelen, soo dat sender a verwonder goe, en a see: Van waar soo een Wiesheid kom na deese Man, en soo machtige Werken? 55.Em ben dan niet die Soon van een Timmerman? Ben dan niet die Naam van si Moeder Maria? en si Broeders Jacob en Joses, en Simon en Judas. 56.En ben dan niet ook si Susters allemaal hier by ons? Van waar all deese Dingen kom dan na Em? 57.En sender a erger sender na Em. Maar Jesus a see na sender: Een Propheet na niet een Plaats hab soo weenig Eer, as na si Vaderland, en na si Hoes. 58.En Em no a doe veel Teekens daar, om die will van sender Ongloof.