|
| |
| |
| |
Memorie opt d'inhalen van zyne Hoocheyt binnen deser stadt Shertoigenbossche.
Inden iersten zullen de twee halve vendelen wycken, snachs de wacht gehadt hebbende als zyne Hoocheyt dachs daer nae sall incomen, de wachten soo opt stadthuys als aende poirten allomme besetten, blyvende eenen capiteyn opt stadthuys met d'officialen van zyn helft ende drie rotten, besettende noch met een rot de Heeckel ende den Boom met het resterende rot. Den lieutenant van d'ander halff vendelen sall metten ionck rot zyn aende Vuchtere poirt; den vendrich aen sint Ians poirt met een rot; eenen sergeant met twee rot aende Hinthamer poirt, ende den anderen sergeant met een rot aen sint Anthonis poort.
Item de vier schutteryen sullen deur malcanderen hen vermengelen ende verdeylt worden in verscheyden troppen, te weten: achter ende voir musquettiers; de helft vande schutten naede musquettiers; de helft vande spiessen voir de vendelens; de vendelens vier ende vier neffens ende achter malcanderen; dander helft vande spiessen daer nae; dander helft der schutten daer achter aen, ende dander helft der musquettieren int sluyten, ende sullen geleyt worden als volcht:
Ende zullen de voirs. schutteryen, midtsgaders de soldaten ende ruyteryen in hen gemonstert geweer alsoo buy- | |
| |
ten trecken, te weten: de soldaten voer aen, ende sullen de acht wycken vuyt henne suppoisten vuytmaecken de bequaemste ende opt schoenste best gemonteerde persoonen ende meest int getall hen moigelyck wesende, die onder de voirs. schutteryen zullen vermingelt werden; ende sullen de capiteynen voir de voirscreve schutteryen gaende, zoe verre buyten trecken tot dat d'leste zyn aende binnen poirte, tzy H. Cruys ofte Pynappelsche poirt, ende aldaer hen binnen deser stadt van beyden zyde der straeten verdeylen ende de straet alsoo ter stadt waert in besetten ende open houden.
Ten daege vander incompste sal elck borger in persoon moeten compareren ende synen winckel toe moeten houden, omme te verhueden alle disordren: alles op peene van by elcken nyet comparerende met zyn behoirlyck ende gemonstert geweer ter gedesigneerder plaetsche ende tyde (vuytgescheyden alsulcke deeckenen vanden ambachten, als metten magistraet sullen geordineert wesen syne Hoocheyt tegen te gaen) ende henne winckelen open houdende, te verbueren twelff gulden.
Item sullen de capiteynen goede ordre houden, dat alles ordentelyck sonder confusie geschiede, ende den suppoosten vande schutteryen ende wycken te kennen geven, omme hen eerlick te cleeden ende accoutreren, soo eenygelicx qualiteyt ende staet vereyscht, ende daer aff eer begeren, sonder nochtans ymanden te astringeren, om hen in cleederen te becostingen meer dan den selven belieft.
Ende sal ygelyck, soo soldaet als borger, verbonden syn te blyven in henre ordre ende plaetsse, sonder, tzy om regen oft ennich onweder etc. sonder ordonnantie van synen capiteyn, daer vuyt te wycken oft vertrecken, op peene van drie gulden.
| |
| |
Item als syne Hoocheyt sall wesen int gesicht ende tselve gevuechelyck connen sien ende hooren, sal men van buyten aende verste beginnende ende soo voirts vervolgens totter stadt toe de roers ordentelyck eens lossen, sonder scerp te laden, ende daer naer het groff gescut, d'yser affgetrocken synde, dat staende is aen ende omtrent der poirte daer zyne Hoocheyt sal incomen. Ende salmen terstont nae het lossen des geschuts luyen allen de clocken, soo in kercken, cloesteren, goidtshuysen ende capellen deser stadt tot dat het groff geschut ten tweedemael, als onder geseecht wordt, sall syn gelost.
Ende eenyegelyck alsoo lossgescoten hebbende, en sal hem niemant vervoirderen wederom te scieten voor ende aleer zyne Hoocheyt binnen deser stadt en sall wesen, op verbuerte van lyff ende goet. Ende zyne Hoocheyt mette guarde gepasseert synde, sullen daerop strax volgen de soldaten ende immediate daernae de schutteryen in ordre, soe sy daer naest aen de soldaten syn staende, treckende alsoe nae de kerck ingeval, ende soo voirts neffens het pallays van zyn Hoocheyt, doende aldaer salue, ende soe voirts yegelyck voor tvendelen vande scutterye daer onder hy gegaen heeft, ende aldaer scheyden. Ende sall wederom tgroff gescut geloost worden soo wanneer de leste vande scutterye binnen de stadt sall wesen gecomen.
Item de heeren van Grobbendonck, schouteth, schepenen, gesworen, raedtsheeren, secretarissen, midtsgaders vuyt yegelyck ambacht eenen deecken daer toe te deputeren, sullen goets tyts vergaderen opt stadthuys ende van daer gaen buyten de stadt twee ende twee, te weten: mynen heere van Grobbendoncq metten heere schouteth; daernae de groenroeden met henne stocken; daer
| |
| |
nae de heeren schepenen, geswooren, raedtsheeren, secretarissen ende deeckens, ygelyck nae syn qualiteyt ende ordre, ende daerachter aen de twee der heeren scepenen dienaers, de welcke neffens myn heere den pensionarius hen inden naem der drye leeden deser stadt sullen presenteren bycans int midden vanden steenwech oft daeromtrent, alwaer de plaetsche bequaemste bevonden sall worden, omme aldaer zyne Hoocheyt te salueren ende congratuleren etc.: ende tselve gedaen wesende, sullen voirde familie van zyne Hoocheyt de voirs. heeren als boven, in contrarie ordre, de notabelste ende eerlickste achter, wederom naede stadt gaen, te weeten: de twee heeren schepenen dienaers voor den ioncxten deecken; daernaer etc., ende de groenroede voirden ioncxsten schepen, tot voir der stadt poirten toe, alwaer hen sullen vynden de heeren vanden clergie, om deselve syn Hoocheyt insgelycx te salueren, blyvende midlertyt den raet ofte drye leden aen beyden syden buyten de clergie voirs. voor aen staen; welcke clergie alsdaen voor de magistraet ende voor zyne Hoocheyt gaen sall, tzy totter kercke ofte logement, soomen verstaen sall dintentie vande selve zyne Hoocheyt te wesen.
Ende sullen de heeren vande magistraet, raede en. dekenen voirs. gaende blyven voor zyn Hoocheyt als voor, tzy totter kercke oft logement als boven, ende ingevall ierst inde kercke, van daer voirts totten voirs. logement toe, ende aldaer zyne Hoocheyt te bescencken soo ende gelyck den raeth gedragen sall.
Item te doen maecken een hemelsel.
Item dat de rentmeesteren deser stadt terstont sullen doen provisie van hout ende mutssaerts, tot behoeff vanden brant voor zyn Hoocheyt.
| |
| |
Item te deputeren de gene, die zyn Hoocheyt ende ordinarisse suitte sullen billetteren ende fourieren met commissie van authoriteyt daer toe dienende, ten eynde de fouriers vande selve syne Hoocheyt vuyt hen authoriteyt de voirs. fourieringe nyet en behoeven te doen, ende sall inde selve logeringe noch geestelyck noch werlyck wesen exempt.
Item dat alle de stallinge binnen deser stadt voor twee dordendeelen sullen worden ledich gehouden ende geopent tot behoeff vande suitte van zyne Hoocheyt, op peene van xxv gulden, ende desnyettemin alsdaen moeten ledigen den geheelen stall.
Item dat de ghenen, die van wegen deser stadt sullen wesen gebilletteert ende ter cause van dyen sullen genootsaeckt syn te dragen eenige lasten van brant, kerssen ende andere dyergelycke servicie, ende tselve verclarende op haere vromicheyt, sullen van wegen deser stadt daer aff inde redelicheyt worden gerecompenseert.
Item die gene bewonende huysen nyet bequaem totte logeringe, sullen met bedden, lynwaet, tenne ende andere meubelen gehouden syn te assisteren den genen daer sy gelycke servicie op sullen worden bewesen te doen, ende anderssins nae henne qualiteyt mede helpen dragen ende gelden totten oncosten van andere lasten, by der stadt nootelyck ter cause der voirs. incomste te vervallen.
Item dat nyemant ennige huysen oft cameren en sall moigen verhueren oft vollick by hem innemen, om te ontgaen de logeringe vanden volcke van zyne Hoocheyt, maer sullen in allen gevall gehouden syn te ontfangen de gene, die van wegen deser stadt aldaer sullen wor- | |
| |
den gebilletteert, die welcke voor de huerlingen sullen worden geprefereert.
Item ten effecte van allen de welcke sullen oock geordonneert worden commissarissen, ten eynde alles ordentelyck gesciede.
| |
Publicatie.
Men laet weten ende vercondigt, dat alle brouwers ende backers terstont sullen hebben te brouwen ende backen tot dienste vanden volcke ende leger van haere Hoocheden, om tselve voor hen gelt te worden vercocht.
Item dat alle andere ende yegelyck vanden ingesetenen deser stadt, hebbende ennighe provisie van vivres, tzy boter, kese, vlees, visch, bier oft dergelycke provanden, metten iersten ende van stonden aene hen sullen gereet houden, om den voirs. leger daermede om gelt te worden gedient.
Item datmen den vivandiers, zoetelaers ende andere vuyt het leger binnen deser stadt, om henne nootelicheden ende provisien vry ende ongemolesteert sal laten passeren ende repasseren, zonder deselve oft henne provisien, karren oft wagenen aende porten oft elders aen persoonen oft goedens te moigen verhynderen, beletten, misdoen oft misseggen in enniger manieren, op pene van arbitrale correctie.
Men gebiet van wegen haere Hoocheden, schouteth, schepenen ende drie leden deser stadt, dat eenen igelyck, soo geestelyck als werlyck, niemant vuytgescheyden, sonder ennige weygeringe, promptelyck obediere de billetten, die van wegen der drye leden voirs. sullen worden vuytgegeven, om te logeren ende t'accommoderen zyne
| |
| |
Hoocheyt raede ende suyte van dyen, op pene van vyfftich Carolus gulden ende arbitrale correctie.
Men gebiet alnoch als voor, dat niemant, vande wachte nyet synde, inne het innecomen tzy van zyne Hoocheyt oft andere, oock nyet tusschen tyden hem vervoirderen sall ennichsins hem met tgene daer passeert met woorden oft met wercken te moyen, maer laeten daermede begaen d'overicheyt, die sulcx is gecommitteert, op peene als voor.
Ende sall oyck tusschen dit ende morgen vroech voor sess uren eenygelyck het hout, mest, steenen ende andere henne goeden opter straten liggende moeten vervuert ende geruymt hebben, op verbuerte van tselve ende arbitrale correctie.
Ende sall eenyegelyck voor syn deure de straten vegen ende de vuylicheyt daer van doen ende alsoo deurewech reynlyck houden, op pene van seven stuvers telcker reyse in gebreke bevonden daer aff te verbuerene.
Item dat egeene vrouwen, iongers, noch borgers oft huyslieden, wye hy oyck sy, inde wapenen nyet gecommandeert synde, om zyne Hoocheyt te helpen inne halen, buyten oft omtrent der porten deser stadt zullen moigen comen, noch inde straten ten tyde der innecomste buyten de soyen vande huysen moigen staen, op pene van dopperste cleet ende arbitrale correctie.
Men vercondicht alnoch als voor, dat eenyegelyck, tzy geestelyck off werlyck, vanden ambachten van den molders nyet synde, sall moigen malen alderhande cooren, ende dat by provisie ende tot dat anders sall wesen geordonneert, overmidts den tegenwordighen noot, allet nochtans sonder prejuditie der charte vanden molders ambacht; ende sullen de cloosteren deser stadt gehouden syn henne
| |
| |
ovenen ende backeryen te leenen ten dienste vanden leger ende alle hulp en. bystant hen moigelyck synde daer toe doen.
Gelyck oock eenyegelyck, tzy van binnen oft van buyten, sall moigen backen ende broot vercoopen gedurende dese occurentie, zonder nochtans prejuditie der charte vanden ambacht vande beckers.
Ten archieve der stad 's Hertogenbosch, onder de losse stukken, zijnde Memorie no. 3 wegens deze voorgenomen inhuldiging.
Volgens Van Heurn, dl. II, bladz. 235, had de inhuldiging der aartshertogen geen plaats: dat de stad echter daartoe het stellige voornemen had, blijkt uit de medegedeelde Memorien.
|
|
Auteursrechtvrij