Verzameling van kronyken, charters en oorkonden betrekkelijk de stad en meijerij van 's Hertogenbosch

[p. 693]

Berigten wegens het vervolgen van personen, verdacht van tooverij, in de meijerij van 's Hertogenbosch, in den jare 1592-1595.

[p. 695]

Ernstige waarschuwing van het Hof te Brussel aan den Bisschop van 's Hertogenbosch, om met zijne onderhoorige geestelijkheid te waken tegen de in zijn bisdom meer en meer toenemende tooverij, met opgave der verschillende betooveringsmiddelen en bedreiging der goddelijke en menschelijke straffen tegen die duivelskunsten, doch met verbod, om die in de vermaningen des volks bepaaldelijk op te noemen, uit vrees, dat de nieuwsgierigheid daarvan misbruik mogt maken. 20 Julij 1592.

Par le roy.

Trèsrévérend Père, cher et bien amë. Comme entre aultres grandz péchez, malheurs et abominations que ce misérable temps nous apporte chaque iour à la ruyne et confusion du monde, sont les sectes de divers maléfices, sorceleries, impostures, illusions, prestiges et impiétez que certains vrayz instrumens du diable, aprèz les hérésies, apostasies et athéismes, s'advancent iournellement mettre en avant, lesquelz usent de innumérables impostures de sortilèges, enchantemens, imprécations, vénéfices et aultres semblables maléfices et abominations quilz apprennent et exercent par linstruiction et communication particulière des malingz espritz, les ungz soubz umbre de la mathématique magie et astrologie iudiciaire et par pronostications: aultres comme généthliacques, par observa-

[p. 696]

tions des planètes dominantes à lheure de la nativité des personnes: aultres par art de devination, inspection des mains et aultrement s'advancent vouloir prédire les bonnes ou mauvaises fortunes des hommes, aussy les saisons du temps advenir, voires par aultres inventions superstitieuses et dampnables s'efforcent de vouloir troubler l'air, ensorceller et charmer les personnes, les occuper de vilaines amours et les rendre comme démentes, et aultres enseignent par art diabolicque de recouvrer les choses perdues, monstrer les personnes absentes, les ungz par miroirs, les autres par eaue, par fiolles, de voir, dire quelques parolles à l'oreille, faire parler le diable soubz la forme d'ung roy, aussy enchanter les personnes par filetz, esguilles, esguillettes, drapeaulx, faire diverses illusions par faschinations des yeulx, s'aydans semblablement de cartes et aultres choses, inventions illicités, détestables, en s'attribuans divers noms selon les espèces et sortes de leurs maléfices et enchantemens, qui se délaissent icy à réciter pour la détestation de si meschans et malheureux actes et impostures, à quoy ilz parviennent pour s'estre desvouez et dédiez du tout au diable en renonçant à Iesu Christ, nostre saulveur et rédempteur, et de plus non contens de se perdre eulx mesmes si misérablement, attirent encore les aultres aux mesmes erreurs et impiétez, soubz couleur de dire que ce sont choses naturelles et artz mathématicques selon les influences des planettes et astres célestes dominans sur les personnes, voires osent affermer que ce sont opérations divines et sainctes pour y mesler quelque eaue bénite ou de fons de babtesme, y insérant pour mieulx abuser en leurs billetz et charmes le nom sacré de Dieu ou de ses sainctz, prenant aussy certaines parolles de l'escriture saincte, y apposant

[p. 697]

divers caractères incognuz, voires l'effigie de la saincte croix, pour avecq cela curer les playes, guérir les fiebvres et faire comme ilz disent cures supernaturelles et miraculeuses, tant sur les hommes que sur les bestes, de quoy toutesfois la fin en est tousiours pernicieuse et infauste, comme les expériences l'ont démonstré et démonstrent iournellement, pour touttes lesquelles frivoles perverses et meschantes persuasions font que plusieurs ne pensent mal faire, d'user de ces practicques impostures et diabolicques inventions, aulcuns pour guérir eulx ou leurs bestes, aultres pour recouvrer les choses perdues et aultres par passetemps comme ilz disent, iusques là que aulcunz hommes, femmes et enfans s'en veuillent mesler, si comme de lier l'esguillette aux marians et prononcer parolles qu'ilz appellent les haultz noms, les porter chez eulx pour soy garder de tous périlz et accidens et semblables choses, de quoy tiennent livres et papiers par escript, ne pensant mal faire de les avoir practiquer, où toutesfois c'est des pluz grandz crimes et impiétez qui se puissent perpétrer contre Dieu, contre son honneur et sa doctrine, que l'escriture saincte a en telle abomination, horreur et détestation, qu'elle ne les veult laisser vivre aulcunement sur la terre, comme le mesme est aussy ordonné par les canons ecclésiasticques et loix civilles, tellement que la chose est si claire qu'il n'est aulcunement besoing de faire aulcune défence ou édict prohibitif par quelques appositions de peines nouvelles, pour aussy ne scandaler plusieurs gens de bien, que ne sçavent ces meschantetez et ont telles choses en horreur et détestation. Pour ceste cause nous tenaus pour maintenant pouvoir abondamment souffir, pour pourveoir à ces maulx, d'escrire lettres, tant aux archeves-

[p. 698]

ques, évesques et aultres prélatz ecclésiasticques que a ceulx dez consaux et iuges présidiaulx, en les réquerrant, exhortant, admonestant et commandant respectivement d'avoir en cecy l'oeil ouvert et esveillé, pour extirper ceste grande meschanceté, selon que commande l'escripture saincte, aussy les canons sacrez, bulles apostolicques et loix civilles, suivant que chascun face son debvoir, sçavoir est que les prélatz ecclésiasticques ordonnent incontinent aux pasteurs et prédicateurs, chacun en son diocèse, de préadvertir et admonester diligamment et souvent le poeuple de soy garder de telz abuseurs, imposteurs et trompeurs comme vraiz instrumens diabolicques, commettant ces impiétez et abominations par secrète assistence dez malingz espritz contre Dieu et leur prochain, les admonestant et commandant aussy d'avoir en horreur et détestation telz meschans péchez, condempnez en premier de Dieu et aprèz des hommes, procédant seulement, comme dict est, de l'invention du diable, ennemy commun du genre humain, à quelque couleur que ce soit de demnation, magie, mathématicque, astrologie, pronostication, physionomie, nigromantie, chiromantie ou aultres titres spécieulx que ce puist estre, procédant cecy en grande partie de la suicte et effect de tant de hérésies et fausses doctrines et d'appostasies pullulantes par tout; advertissant par tant que chacun eut à s'en garder, voires interdisant de hanter avecq semblables personnes, aultrement que ceulx de la iustice tant ecclésiasticque que séculière feront leurs debvoirs d'enquester et procéder respectivement contre tous ceulx qui useront, practicqueront et consenteront à telz maléfices, pour les punir en court spirituelle selon les canons et bulles apostolicques, et en court séculière par

[p. 699]

les loix civilles et ordonnances. En faisant par lesdicts ecclésiasticques entendre au poeuple qu'avons commandé à tous noz consaulx, officiers, iusticiers et ceulx de noz vassaulx de faire semblables informations et chastoy exemplaire selon les loix divines et humaines, et néantmoingz voulons bien préadvertir toux, que comme une partie de innocence est ne sçavoir les péchez, tant est fragille la nature humaine, que nostre intention est que quand lesdicts pasteurs et prédicateurs exhorteront le poeuple d'eux garder de semblables crimes détestables, il ne sera besoing [de] spécifier aulcuns diceulx par quelque démonstration ou explication par où le poeuple pourroit apprendre comme ces impostures se font ou mettre les auditeurs en quelque curiosité de le vouloir sçavoir, mais dire en termes généraulx que touttes ces choses et spéciallement les plus fréquentes sont actes diabolicques, dampnez et reprouvez de Dieu, inventions des espritz malingz pour perdre et dampner perpétuellement les personnes, vous déclairants que ce que le avons icy particularisé, est seullement pour instruction des iuges, quand semblables malfaiteurs viennent en leurs mains: par quoy pour effectuer ce que dessus, [nous] vous ordonnons bien expressément et à certes que incontinent ces présentes receues, vous envoyez les doubles d'icelles deuement collationnées et auctenticquées à voz officiaulx et promoteurs, leur mandant qu'ilz ayent chacun endroict soy l'oeil en bon regard, pour non seulement tenir la main et procurer que les debvoirs cy dessuz soyent faictz, mais aussy diligamment enquester et informer de ces abuz et crimes, affin de descouvrir ceulx qui en seront attachez et coulpables pour les chastier, et signamment enquérir contre ceulx ou celles qui peuvent estre les plus diffa-

[p. 700]

mez d'estre devins, enchanteurs, sorcières, vaudois, ou notez de semblables maléfices et crimes, èt s'ils en sçavent aulcuns qu'ilz ayent à procéder trèsrigoureusement contre eulx, par touttes les peines de chastoyemens sévères et exemplaires, en conformité desdictes loix divines et humaines, sans y faire faulte. A tant, trèsrévérend Père, cher et bien amé, nostre Seigneur vous ayt en sa saincte garde. Escript en nostre ville de Bruxelles, le xxv de Iuillet xv^c nonante deux. Paraphé: A.V., et soubzsigné: Verreycken. La superscription estoit: A trèsrévérend Père, nostre cher et bien amé, l'Évesque de Boisleducq.

Collationné à son originelle et ceste copie trouvé accorder à icelle par moy Ghysbert vanden Velde, secrétaire et greffier de la ville de Boisleducq.
G. vanden Velde.
Ten archieve der stad 's Hertogenbosch, onder de losse stukken.