Auriacus, sive libertas saucia

Chorvs

Choriambici, Dimetri Iambici, Dactylici Pentametri, Hexametri Sapphici.

FRustran' sollicitis condita vultibus
Obscuris latuit Cynthia nubibus?
An lapsum miseris fataque gentibus,
Et belli dubios nunciat impetus,
Et Mauortis opus? Fallere, fallere
Quisquis mente leuem vectus in aëra

[p. 57]

 

Adscribis nimiam syderibus fidem.

 

Namque illa emeritis pallida cornibus

 

Fratri blanda suo basia diuidit,

 

Seque exinde nouis instruit ignibus,

 

Et Phoebi tepidos concipit halitus.

 

Illinc dulcis humus parturit, & leuis

 

Humescit saturi penna Fauonij:

 

Illinc Daedalei progenies soli

 

Ridentes violaeque, & violae soror

 

Circum virgineis picta ruboribus

 

Florum nobilium dux Rosa nascitur.

 

Tellus vere nouo, iam genitalibus

 

Lucinam patitur faeta caloribus,

 

Lucinam patitur veris, & obstetrix

 

Aspirat leuibus Cynthia mensibus:

 

Caelum nutrit amor, nutrit amor solum.

 

Constant faederibus omnia mutuis,

 

Terramque magnus aether

 

Amplectitur, suisque

 

Gerit, fouetque in vlnis,

 

Taedasque ouans quot annis,

 

Redintegrat iugales,

 

Et coniugem fatetur,

 

Seseque miscet illi,

 

Et in sinum beatae

 

Se proripit maritae.

 

Tum volucrum toto vagus aethere

 

Dulcis hymen hymenaee sonat chorus:

[p. 58]

 

Pronubus exultat Zephyrus pater,

 

Syderaque aurata praeeunt face,

 

Et placidas caelum choreas agit,

 

Et domini praelucet amoribus,

 

Nuptaque in amplexum noua ducitur,

 

Sponsaque regales aperit senus,

 

Et varijs lasciuit amictibus,

 

Vtque suo placitura viro nitet.

 

Illinc flaua Ceres, & amabilis

 

Foemineus Bacchi refluit liquor.

 

Vuaque sub tremulis pendula palmitibus

 

Propter aquae dulcem luxuriat strepitum,

 

Quae pariat maestis gaudia pectoribus.

 

Tum vaga per tepidas exiliens latebras

 

Aetheris aurati filia, dulcis aqua

 

Garrula torrentem tentat iter per humum,

 

Arboribusque, suam, graminibusque, sitim

 

Sedat, & exiles soluitur in scatebras,

 

Vidimus horrendum caelo prodire cometen,`

 

Qua validas auriga leuis moderatur habenas

 

Lora regens axemque, polumque inuectus apertum

 

Lumina maioris turbatus conspicit Vrsae,

 

Quem licet armatus croceo qua fulgurat auro

 

Palluit Orion, trepidoque exterritus ensis

 

Excidit, ingentique animum reuocauit ab ausu.

 

‘Regiae & fortes metuant tyrannis

 

Nulla priuatis populis minantur

 

Sydera, aut paruo pecudum magistro,

[p. 59]

 

Parua non nouit polus; alta nutant,

 

Sorsque in occasum propriâ secunda

 

Mole dehiscit.’