Psalmen Davids na d'Ebreeusche waerheit

Domine dominus noster.
Psalme. VIII.

Dauid recht hier uut, en oeffent med groot verwonderen de groote macht van den Schepper alder dinghen, ende de groote goetheyt, die hy hem ghewaerdicht heeft te ghebrukē voor den mensche, hebbende hem ghemaect zulck als hi is.

HOe wonderbaer, en eerelick van fame
Is (eeuwigh God) dinen helighen name
Ouer gheheel d'aerde, zoo men beseft Die
dine macht bouen d'Hemelen heft!

⁺ In als condy ons dijn groote cracht betooghen

Ia oock an de ionghe kinders die zooghen:

+ Matt. 21. b

[p. 25]

 

Daer mede ghy beschaemt maect, en verwind

 

Al die ghy dijn viand en nider vind.

 

 

 

Maer als ick wil gade slaen en anmaercken

 

Die hemelen uwer vingheren waercken,

 

Als Mane, Sterre, en gh'eel het Firmament

 

Zoo wel gheschict, bequaem en excellent.

 

 

 

Dan dinck'ick als die hem verwondert zeere'⁺

 

VVat ist oock toch vanden mensche (ô Heere!)

 

Dat ghy u zijns te ghedincken verneert,

 

Hem gade slaet, beweeght, en assisteert?

 

 

 

VVant, ghy hebt hem zoo edelick gheschepen

 

Dat hem (voorwaer) niet en faelt, onbegrepen,

 

Dan God te sijn', dwelck ghy alleene zijd

 

Die hem verciert met veel eeren altijd.

 

 

 

En ghy hebt hem ghesteld in alle landen

 

Meester, op al de waercken dijner handen:

 

Stellende onder zijn voeten gh'eel subiect,⁺

 

Alle zaken, zoo verre als d'aerde strect.

 

 

 

Schapen, Ossen, en Lammers al te male,

 

Beesten des velds, ende oock int generale

 

Voghels der lucht, zee vissch' en zulck ghediert

 

Med alle dat de wateren anthiert.

+ Hebr. 2. b.

+ 1. Cor. 15. d Hebr. 2. b.

[p. 26]

 

O Heere God, onsen regierder crachtigh

 

Hoe triumphant, en eerelick warachtigh

 

Is dinen Naem', nu ende t'alder stond

 

Verbreedt ouer gheheel aerderijck rond.