CXXI. 15 décembre 1288.
Lettres de Guillaume, évêque de Cambrai, par lesquelles il déclare que le duc de Brabant est en défaut, et doit payer l'amende de 100,000 livres.
Nous Guillaumes, par le grasce de Diu eveske de Cambrai, disieres et ordeneres de tons les debas, de le were et de tons contens, ki sunt et ont esté entre nobles princes Jehan, par le grasce de Diu duch de Loth. et de Brabant, les siens, ses aidans et ses alloiés, d'une part, et Renaut conte de Ghelre, les siens, ses aidans et ses alloiés, d'autre part; faisons savoir à tous chiaus, ki ces lettres verront et orront, ke jour essené de Nous as dittes parties é Rohingies, al lundi apres le feste saint Nicholai en yver dedens miedi, pour rechevoir, oyr et mettre à oevre no dit et no ordenance en tout on en partie, selonc ce k'il Nous sanleroit ke boin fust, à le dite journée Nous engongissiemes par no dit et no ordenance, al duch devant nomei present par devant Nous, sour paine de cent mille lib. par. à rendre et à paier selonc le fourme dou compromis, ke li dis dus de Brabant le mardi prochain ensuiwant, ke fu apres le feste sainte Lusse, dedens eure de nonne, par lui ou par autrui, nous delivrast et mesist en no main à le caucie de lès Librechies le devant nommei Renaut conte de Ghelre, quite et delivre, pour mener quel part k'il Nous plaroit, ensi comme il est contenut en no ordenance ki de chou est faite, al quel mardi Nous fumes à le dite cauchie de les Librechies, et la attendimes des le mattinée duskes apres eure de none, et fu tesmoingiet par boines gens, ki aveec Nous estoient, ke li eure de nonc estait passée, et fu cryet et demandet en haut oiant tous ceaus ki la estoient, se mis estoit la pour le duch de Brabant ou de par lui, pour faire che k'il devoit; et ke Nous li aviemes engoint, ou pour monstrer excusances ou autres raisons s'il les eust, à le quele demande mis ne se monstra ne respondi pour le duch de Brabant devant nommeit, si disons et tesmoingnons, ke celi mardi li dis dus fu del tout en defaute de faire chou ke Nous
li aviemes engoint, sour le paine des cent mille lib. de par. car il n'i vint, ne envoia, ne amena, ne fist amener, ne delivra à Nous, ne fist delivrer, ne mettre en no main, le devant dit Renaut conte de Gelre, ensi ke Nous li aviesmes engoint sour le ditte paine, par no dit et par no ordenance devant dite. En tesmoingnage des queles choses Nous avons ces presentes lettres saielées de no saiel. Ce fu donné en l'an de grasse mil deus cens quatrevins wit, le mekredi apres le feste sainte Lusse.
L'original, muni du sceau, aux archives de Gueldre.
Auteursrechtvrij