Rymkronyk van Jan van Heelu betreffende den slag van Woeringen van het jaer 1288

CXX. 15 décembre 1288.

Lettres de Guillaume, évêque de Cambrai, par lesquelles il s'excuse de ne pouvoir se rendre à Rohengnies au jour par lui fixé.

Nous Guillaumes, par le grasse de Dieu eveske de Cambrai, desieres et ordeneres de tous debas, de le were et de tous contens, ki ont esteit et sunt encore entre noubles prinches Jehan, par le grasse de Dieu duch de Loth. et de Brabant, les siens, ses aidans et ses aloiiés, d'une part, et Renaut conte de Ghelre, les siens, ses aidans et ses aloiiés, d'autre part; faisons savoir à tous chiaus ki ces lettres veront et oront, ke comme Nous eussiemes jour asseneit as dites parties à ce dioes¹ apres le feste saint Lusse dedans eure de midie par devant Nous à Rohingnies, pour oir et rechevoir et metre à oevre no dit et no ordenance en tout ou en partie, selonc ce ke boin Nous samblera; Nous, pour l'empeechement de no propre cors ne poons estre en nule maniere à le dite journée pour aleir avant en le besoigne devant dite, si metons en liu de Nous sengneur Pieron doiien de Fairins, pour denonchier as dites parties, ou à leur procureurs, de par Nous et en no non, no empeechement devant dit, le queil empeechement Nous avons denonchiet as procureurs le dit conte de Ghelre, et volons encore ke denonchiet lor soit, s'il sunt au jour et au liu devant dis. En tesmoignage des quels choses Nous avons ces letres saielées de no saiel, ki furent données en l'an de grasse mil deus cens quatre vins et wit, le merkedi apres le feste sainte Lusse.

L'original, muni du sceau, aux archives de Gueldre.

1 Diues, mereredi.