Rymkronyk van Jan van Heelu betreffende den slag van Woeringen van het jaer 1288

[p. 476]

CXIX. 13 décembre 1288.

Lettres de Guillaume, évêque de Cambrai, par lesquelles il fixe jour pour prononcer sur les débats ci-dessus.

En non dou Pere et dou Fill et dou saint Esperit. Nous Williaumes, par le grace de Dieu eveskes de Cambray, disieres et ordeneres de haut et de bas à une fois u à pluseurs de tous les debas, de le were, et de tous contens, ki ont esté et sont encore entre nobles prinches Jehan, par le grace de Dieu duc de Loth. et de Braibant, les siens, ses aidans et ses aloiés, d'une part, et Renaut comte de Ghelre, les siens, ses aidans et ses aloiés, d'autre part, pour le raison u l'okison de le duchei de Lembourch et de toutes les avenues ki pour cheli choze avenues sont; faisons savoir à tous chiaus, ki ces lettres verront et orront, ke jour assené de Nous, de tel pooir comme Nous avons, par les mises, les compromis et les estrumens, ki de chou sunt fait, as parties devant dites par devant Nous à Rohignies à ce lundi après le feste saint Nicholay en yvier, dedens eure de midi, pour oir, rechevoir et mettre à weure¹, no dit et no ordenance en tout u en partie, selonc chou ke Nous verons ke boin sera, disons et ordonons partie de no dit en tel maniere, ke Nous engoignons au duc de Loth. et de Braibant devant dit, sour le paine de cent mile lib. de par., à rendre et à paier selonc le fourme dou dit compromis, ke li dus Nous delivre et mete en no main, par lui u par autrui, à le cauchie de làs Librechies, ce prochain mardi apres le leste sainte Luce el mois de decembre, dedens eure de noune, le devant nonmé Renaut conte de Ghelre, delivre quite et sans calenge, en teil maniere, ke Nous puissons le cors de lui mener sans nul empeechement et paisivlement quel part k'il nous plaira, par coi dou dit duc, de ses aidans, ne de ses aloiés, ne de ses gens, ne de nule okison, ki de par chiaus viegne u puist venir, Nous, ne li nostre, ne nos commans, ne nos gens, ne chil ki seront awec Nous, n'en puissons estre enpeechiet en nule maniere, ne destourbet pour nule okison. Et dou sourplus de toutes les cozes devant dites, dont Nous sommes diseur et ordeneur, ensi comme dit est, Nous, de tel pooir ke nous avons, assenons jour as dites parties pardevant nous à Rohignies à ce prochain diwes² apres le dite feste sainte Luce dedans eure de midi, pour rechevoir, oir, et metre à weure chou ke Nous venrons dire et ordener, en tout u en partie, des cozes devant dites, ensi comme Nous verons ke boin sera, et retenons pooir entirement, de dire, de ordener, de atemprer, de declarer et de pluseurs jours mettre, et de faire de haut et de bas tout chou ke boin nous sanlera, à une fois, u a pluseurs, de toutes les cozes devant dites et de cascune a par li, et de tout chou ki est contenu es mises et es compromis. Et toutes ces cozes, et cascune par li, disons Nous et ordenons à tenir et à werder sour le paine devant dite des perties deseure nommées, selone ke nos dis u no ordenance fais u à faire à une fois u à pluseurs les

1 Weure, oeuvre.

2 Diwes, mereredi (Woes-di).

[p. 477]

touche u pora touchier en tout u en partie. En tiesmoignage des quels cozes Nous avons ces presentes lettres seelées de no seel, ki furent données en l'an de grace mil deus cens quatre vins et wit, le lundi apres le feste saint Nicholay en yver.

L'original, muni du sceau, aux archives de Gueldre.