Rymkronyk van Jan van Heelu betreffende den slag van Woeringen van het jaer 1288

CXVIII. 11 décembre 1288.

Lettres de Guillaume, évêque de Cambrai, constatant quelques déclarations faites par le comte de Gueldre.

Nous Williaumes, par le grace de Dieu eveskes de Cambrai, disieres¹ de haut et de bas à une fois u à pluseurs et ordeneres de tous les debas et de le wiere et de tous les contens, ki ont estet et sont encore entre nobles princes Jehan, par le grace de Dieu duc de Lothier et de Braibant, les siens, ses aidans et ses alloiiés, d'une part, et Renaut conte de Ghelre, les siens, ses aidans et ses aloiiés, d'autre part, pour le raison u l'oquoison de le ducée de Lembourg et de toutes les avenues, qui pour celi chose avenues sunt, faisons savoir à tous ceaus ki ces presentes lettres verront et oront, ke li dis cuens, par devant Nous, en le presence de reverent pere Jehan, par le grace de Dieu eveske de Liege, maistre Jehan de Fieffes arch. de Flandres, Nicholon de Condeit segneur de Bailluel, Tieri dit Louf segneur de Tonneborch, Watier d'Antoing segneur de Belonne, le se-

1 Disieres, diseur, arbitre.

[p. 475]

gneur de Bruncorst, Gerart segneur de Batembourg, Tieri l'avoué de Ruremonde, Corte Louf de Cleves, chevaliers, Lotin de Bruges, et pluseurs autres boenes gens, approuva, otroia et grea et mist son assenstement, de se plaine volontei et sans destrainte, le mise faite sour les debas et contens devant dis et de le quele li nobles princes Guis cuens de Flandres et marchis de Namur et pluseur autre sunt plege, et le quele mise il ont saielée de leur saiaus. Et reconnent le dis cuens, par devant Nous, et en le presence des devant noumeis, un saiel nouviel, ki aporteis li fu, et en voloit user des ore en avant, et se se offri de quanque en li fu tont prest et appareilliés à saieleir dou dit saiel le dite mise, se avoir le peuist, et veir pour saieler, et pour ce ke avoir ne le peut, le conmanda il à saieleir de son saiel devant dit, et en fist tont ce ke faire en peut. Et se Nos requist li dis cuens souffisanment et en le presence des devant noumeis, ke Nous desissiens no dit, de ce dont Nous estiemes charciet, et pour ceste mise poursivir, jusques en le fin, stabli il, par devant Nous et en le presence des devant dis, et sans rapel, ses foiavles clers Jehan Calvard et Robin de Ruremonde, et chascun pour le tout, et leur donna plain pooir et special commandement, et à chascun pour le tout, de poursivir le besongne de le devant dite mise dusques en le fin, on ke mestiers seroit, et de jurer en se nom et en s'ame toutes les fois ke mestiers sera, et de requerre et de pourchacier, poursivir et attaindre et rechevoir le paine, ki expresseement est contenue es lettres faites sour le mise devant dite, s'il avenist ke li dus le fourfesist. Et voloit et comandoit le dis cuens, k'on leur donnast procuration le plus generaus k'on faire poroit, et voloit li dis cuens de Ghelre, et veut, s'il avenist chose, ke li dit procureur ne vosissent u ne peuissent poursivir le besongne devant dite dusques en le fin pour aucun empeechement dou cors, ke me sires li cuens de Flandres ait de par li plain pooir et special conmandement d'autres procureurs metre et stablir en leur liu, un, u pluseurs, ki ait u aient autre teil pooir, comme Jehans et Robins devantdit, en le besongne devant dite, ou plus grant, se avoir le peuissent. Et mist li cuens de Ghelre, par devant Nous et en le presence des devant noumeis, son saiel, sen cors, se tiere, se delivrance, sen honneur et tout quanqu'il avoit et a, en le main mon segneur de Flandres, pour faire de ce plainment se volenté de haut et de bas, et voloit, et veut, qu'il en face et en oeuvre conme dou sien, en toutes choses generalment et specialment, et avoit, a et ara ferme et estavle quanque me sire de Flandres i saielera, commandera, fera et ordenera, soit par ses lettres, soit autrement, en toutes les choses devant dites, et se se despostua li dis cuens de tous pooirs de cele eure en avant, tant comme il seroit en prison, et voloit k'on ne le creist de riens, de quanqu'il feroit u manderoit par lettres u autrement, et Nos requist souffissanment ke Nous vosissienmes aler avant es dites besongnes, dont Nous estienmes et sonmes carchiés, le plus hastivement ke nous porienmes, et requist à mon segneur le eveske de Liege, conme a ordenaire dou lui, et à Nous, comme à diseur, que toutes ces choses devant dites vosissienmes tiesmoignier souffisanment par no saiel. Et fu li saiaus le dit conte de Ghelre bailliés par sen conmandement en une bourse bullée dou saiel Lotin de Bruges à Robin de Ruremonde devant dit, pour porter à mon segneur de Flandres devant dit, pour faire ent se plaine volontei. Et pour ce ke ce soit convence, chose ferme et estavle, avons Nous ces presentes lettres saielées de nostre propre saiel. Ce fut fait à Niviele, le samedi apres le fieste saint Nicholai el mois de decembre, en l'an mil deus cens quatrevins et wit.

L'original, muni du sceau, aux archives de Gueldre.