Rymkronyk van Jan van Heelu betreffende den slag van Woeringen van het jaer 1288

CXVII. 11 décembre 1288.

Lettres de Guillaume, évêque de Cambrai, constatant la reconnaissance du sceau apposé par le comte de Flandre au nom de Renaud, comte de Gueldre, aux lettres de compromis ci-dessus, et la commission donnée à Robin de Ruremonde et à Jean Calvard, pour suivre cette affaire.

Nous Guilliames, par le grace de Dieu eveskes de Cambrai, faisons savoir à tous, ki ces presentes lettres verront et orront, ke nobles hom Renaut cuens de Ghelre, par devant Nous et en le presence de reverent pere Jehan, par le grace de Dieu eveske de Liege, maistre Jehan de Fiffes archid. de Flandres, Nicolon de Condeit seigneur de Baillioil, Thierri dit Louf signeur de Thonnebourch, Wautier de Antoing signeur de Belonne, le signeur de Bruncost, Gerart signeur de Batenborch, Thierri l'avoé de Rurmonde et Corte Louf de Cleve, chevaliers, Lotin de Bruges, et pluseurs autres boines gens, de se plaine volenté sans destrainte et pour se delivrance, a greeit, octroiet et approuvé le mise¹, de le quele li nobles princes, no chiers oncles Guis cuens de Flandres et marchis de Namur, Robbers cuens de Neviers, Williames de Flandres ses freres, Jehans sires de Gistele et Williames de Mortainge sirus de Rumes, sont pleges, et le quele il ont sailée de leur seaus, des debas et des guerres, ki sont et ont estei entre le dit conte de Ghelre, d'une part, et le noble homme Jehan, par le grace de Dieu duic de Lother et de Brabant, d'autre part, pour le ducée de Lemborch, et reconnust li dit cuens de Ghelre, pardevant Nous et en le presence des devant nommées, son saiel, et se se offroit, tout prest et appareillies, à sailer le dite mise, si avoir le peust, et pour ce k'il le dite mise avoir ne poot, voloit il, et commandoit à salier de son saiel le mise deseure dite et en fist tout c'on ke faire en puet, de le quele mise li dit cuens Nous requist en le presence de ceaus ki deseure sont dit, ke Nous en disissienmes no dit et ke Nous le determinissiens. Et pour le dite mise poursuir duskes en le fin, i a li dit cuens, en le presence des devant dis, fait, ordineit et establi saus rapel ses procureurs generaus, ses foiables clers Robbin de Rurmonde et Jehan Calvard, et cascun pour le tont, et donna as dis procureurs, et à cascun par lui et pour le tout, plain pooir et especial

1 Mise, arbitrage.

[p. 474]

commandement de besoigne de le dite mise poursuir duskes à fin, et de jurer pour lui et en se non et en s'ame toutes les fies ke mestiers i est, et de requerre et pourchacier et ataindre le paine, ki expressement est contenue es lettres de le mise devant dite, s'il avenist, ke li dus le fourfesist, et de toutes autres coses faire en generail et en special, ki a le dite besoigne apartiennent u doivent apartenir, et de tout ce faire, ke le dit cuens feroit mesmes, u porroit faire, s'il i estoit presens, et d'autres procureurs mettre en leur lieu, soit un, soit pluseurs, ki ait u aient autre teil pooir comme il u li uns d'iaus en le cause devant dite. Et s'il avenist chose, ke li devant dit procureur ne vosissent u peuissent le dite cause poursuir duskes en le fin, en le maniere ke deseure est dit, pour aucun empeechement de cors, se donna le dit cuens de Ghelre et a donnet à mon signeur le conte de Flandres devant dit plain pooir d'autres procureurs un u pluseurs, mettre en lieu des procureurs devant dis, ki ait u aient autre teil pooir en le cause devant dite, comme Robbins et Jehans devant dis, et promist li dit cuens de Ghelre et octrioit, par devant Nous et par devant chiaus, ki chi devant sont nommées, à tenir ferm et estable, tout ce ke fet i seroit par le noble homme mon signeur le conte de Flandres et par les procureurs devant dis en le besongne devant dite. En tesmongnage de le quele chose nous avons ces presentes lettres saillées de no propre saiel. Ce fu fet l'an de grace mil deus cens quatre vins et wiit, le samedi apres le jour saint Nicholai, el mois de decembre.

L'original, muni du sceau, aux archives de Gueldre.