Sranan Anansi tori

[p. III]

Anansi...

[p. IV]

[p. 1]

Anansi, Kownu nanga Tigri

We, Anansi na wan man, a abi someni triki. Èn Anansi e lei. So Anansi go na Kownu oso, a taigi Kownu taki: ‘Mi Kownu, mi e rei Tigri.’

Kownu taki: ‘Aa, leitori. Yu na so wan pikin meti. Fa yu kan rei Tigri, so wan bigibigi man?’

‘Futru mi Kownu, mi no e lei.’

Kownu taki: ‘Boi, kmopo na mi tapu. Mi e go seni kari Tigri, fu aksi en efu a tru taki yu e rei en.’

‘Kownu kan seni aksi en. Kownu e go si taki mi e rei Tigri.’

Kownu taki: ‘A bun, yu kan go.’

Anansi gwe. Ma di Anansi e gwe, a taki: ‘Fa mi o du a tori disi? Yu sabi san? Mi o go na oso, mi o taigi a boi fu mi, èn mi o taigi Ma Akuba taki mi abi korsu.’

Di Anansi gwe, Kownu seni kari Tigri. Kownu seni wan boskopu gi Tigri taki a mus kon na en oso, a abi wan sani fu taigi en. Tigri prakseri: ‘San Kownu abi fu taigi mi? Hmm, afèn.’ Ma Tigri breiti dati a kan go na Kownu oso. Bika fu go na Kownu oso a no aladei tori gi den.

Di Tigri doro na Kownu oso, Kownu taki: ‘We, mi ben seni kari yu fu aksi yu wan tori. Fa yu kan meki Anansi, wan pikinpikin boi, rei yu?’

Tigri taki: ‘San! Suma taki so?’

[p. 2]

Kownu taki: ‘Na Anansi taigi mi dati.’

Tigri taki: ‘Wakti Kownu, mi e gwe, mi e gwe. Mi e go teki a pikin boi tyari en kon dya. Mi e go puru lei gi en. Lei gi mi, wan bigibigi man so.’

Tigri teki pasi, a gwe na Anansi oso. Ma di a doro a strati, a si a pikin boi fu Anansi e prei. A taki: ‘Boi, pe yu papa de?’

A boi taki: ‘Mi tata Tigri, mi papa siki. A de na oso. Ai beifi, a abi korsu.’

Tigri taki: ‘Kownu taki dati yu papa taki tak' a rei mi. Èn mi sabi taki yu papa e lei gi mi. Dus mi kon fu tyari yu papa go na Kownu.’

Dan di a boi taigi Tigri dati, dan Tigri go na Ma Akuba, a wefi fu Anansi. Di a doro a taki: ‘Ma Akuba, pe a boi Anansi de?’

Ma Akuba taki: ‘Tata Tigri, ai siki. A abi korsu, ai beifi.’

Tata Tigri taki: ‘Pe a de? Mi wani si en.’

Dan Akuba tyari tata Tigri go ini a kamra pe Anansi didon na tapu a bedi. Tigri taki: ‘Yu boi Anansi, sanede yu lei gi mi? Sanede yu taigi Kownu taki yu rei mi?’

Anansi taki: ‘Mi tata, mi e siki. Ma Kownu lei gi mi?’

Tigri taki: ‘Wantewante yu e kon go nanga mi?’

Anansi taki: ‘Mi tata, luku fa mi e beifi?’

Tigri taki: ‘Mi no abi trobi, mi no abi trobi. Yu mu kon wantewante.’

[p. 3]

Dan Anansi taki: ‘Ba Tigri, a no kan tan te wan tra dei te a korsu saka?’

Tigri taki: ‘Nono. Nownow, nownow, i mu kon go nanga mi. Meki mi tyari yu go puru lei gi yu.’

Anansi taki: ‘Baya, fa wi e go du?’

Tigri taki: ‘Fa yu e go du, efu fa yu no e go du, kon dati yu o abi fu kon. A winsi na tapu mi mindribaka yu o abi fu sidon.’ A drape Anansi ben wani Tigri!

Di Anansi pinapina opo, a taki: ‘Mi tata Tigri, mi abi na baka a doro wan saka. Mi no kan teki a saka fu poti na yu baka? Dan mi kan sidon pikin moro betre.’

[p. 4]

Tigri taki: ‘Mi no abi trobi, ma yu e kon nanga mi na Kownu.’

Dan di Anansi dyompo na Tigri baka, dan den gwe. Ma di Anansi abi en prakseri san a wani fu du nanga Tigri, ai sekseki na Tigri mindribaka. Dan Tigri taki: ‘Sanede yu e sekseki so, boi?’

A taki: ‘Mi papa, na korsu. Ba Tigri, mi abi wan titei dya leki wan ton. Mi no kan weri en gi yu na yu mofo? Dan mi e ori en, dan mi e sidon pikin moro steifi.’

Tigri taki: ‘Mi no abi trobi, ma go dati yu o go na Kownu oso.’

Anansi weri a ton gi Tigri, a ori en. Dan di Tigri waka wan pisi Anansi bigin sekseki baka. Tigri taki: ‘Boi, sanede yu e sekseki so?’

Anansi taki: ‘Tata, na korsu mi abi nomo, korsu, korsu baya.’

Tigri taki: ‘I kan abi korsu, efu yu no abi korsu, ma yu e kon go na Kownu oso.’

Di den waka wan bun pisi dan Anansi taki: ‘Mi tata, mi abi wan titei dyaso. Mi kan teki a titei? Maskita e beti mi. Na dati meki mi e seki so.’

Tigri taki: ‘A bun, teki a wipi. Dan yu e naki den maskita na yu baka meki den gwe?’

Ma di den doro wan pisi Anansi opo en ai, a si a oso fu Kownu. Dan Anansi taki: ‘Mi tata, maskita, maskita e beti mi!’ Nomo Anansi bigin wipi Tigri nanga a titei. Bika san dan? Anansi ben de fu doro

[p. 5]

Kownu oso. A si someni sma tnapu na tapu a balkon. Den ben luku fa Anansi e rei Tigri tyari kon.

Anansi wipi Tigri. Tigri dyompo na loktu. Anansi wipi en.

Di den doro Anansi bigin bari taki: ‘Mi Kownu, kon luku, kon luku, kon luku! Kon luku fa mi e rei Tigri. Mi rei Tigri tyari kon na yu oso. A ben taki mi lei gi yu.’ Ai wipi nomo, Tigri e dyompo. Bika fa a poti a ton, dan a hori en tranga. Ai dyompo! Ala sma ben tnapu e luku, Kownu srefi kon tnapu e luku. Tigri firi so syen. A lon. A lon gwe na busi. Anansi go na insei. So a kon wini a tori.