Sranan Anansi tori

[p. 6]

Anansi nanga Dagu

Kownu ben abi Dagu nanga Anansi na fisiti. Dan Kownu taigi Anansi nanga Dagu taki: ‘Mi abi na baka na skerem tu kado gi unu. Yu e teki wan, Dagu e teki wan.’

Ma di den go teki a sani na baka a skerem, dan Anansi si wan deki titei nanga wan fini titei. Anansi si

[p. 7]

a deki titei èn a teki dati fosi. Dagu ben abi fu teki a fini wan. Ma now di Anansi teki a deki titei, ai hari en, dan a kon si taki na wan mangri kaw. Dagu now teki a fini titei. Di Dagu bigin hari, bijna a no ben man hari en, bika a ben hari wan bigi fatu kaw.

Now di Dagu nanga Anansi e gwe dan Anansi kon kisi bigi-ai. A luku, a taki: ‘Mi titei deki dan di fu yu fini. Dan yu kisi wan bigi fatu kaw, dan mi kisi wan mangri wan. A sani no e go so.’ Dan san yu denki Anansi du? Anansi taki: ‘Yere, mat' Dagu, san mi o du. Mi e go kiri a kaw fu mi, dan wi e go nyan en.’

Dagu piki en taki: ‘Mi no abi trobi. Na yu kaw. Efu yu wani kiri en, dan yu kan kiri en.’

Anansi no kon nanga no wan draidrai, a kiri a kaw fu en, a teki a meti. Dan a aksi Dagu taki: ‘Teki wan pisi, no?’

Dagu taki: ‘No, mi no wani.’

Anansi taki: ‘Hmm. Mi nanga yu na mati, tog. Yu kan teki wan pisi. Yu no wani a lefre?’

Dan Dagu taki: ‘Ai, gi mi a lefre.’ Ma Dagu na wan man, te ai nyan, a no e dringi watra, dan a nyanyan no e saka go ini en bere. So a lefre no saka go ini en bere.

Ma Anansi prakseri wan triki fu a kan nyan a kaw fu Dagu. Dan a taki: ‘Mat' Dagu, gi mi mi lefre baka.’ Dan Dagu no draidrai, a spiti a lefre gi en. Di Dagu spiti a lefre baka, Anansi skreki. Dan Anansi taki: ‘Man, na spotu mi e meki nanga yu, tog. San yu

[p. 8]

nyan, mi no kan nyan moro.’ Dagu teki a lefre, a ori en baka na ini en mofo.

Den waka wan pisi. A heri pisten disi Anansi e prakseri fa ai go nyan a kaw fu Dagu. Bika a kaw moi, a fatu. Dan di den waka wan pisi baka, Anansi taki: ‘Mati Dagu, gi mi mi lefre.’ Dan mati Dagu spiti a lefre baka. ‘Yongu, a man disi, yu de wan sani, yèrè. Na spotu mi e meki nanga yu, tog.’ Dagu nyan a pisi lefre baka.

Ma di den waka wan pisi, dan watra ben kiri Dagu. Dan Dagu go na wan watra-olo, a dringi watra. Soleki a dringi a watra, a lefre go ini en bere. Dati na a sani san Anansi ben wani. Den waka wan pisi moro. Anansi bigin baka: ‘Mat' Dagu, gi mi mi lefre.’

Dagu spiti, a taki: ‘Mi swari en, mi no abi en moro.’

Anansi taki: ‘We yere dya, fa yu e go du efu fa yu no e go du, yu o kon gi mi a lefre baka.’

Di Dagu no ben man moro nanga a sani san Anansi e meki, Dagu taki: ‘I sabi san mi o du? Mi sa kiri mi kaw. Dan yu e go nyan mi kaw. Mi sa gi yu a pisi lefre baka, bika na dati yu e suku.’ Dan di Dagu kon kiri a kaw fu en, a gi Anansi en lefre. Dan Anansi teki a lefre nanga wan pisi meti.

Di Anansi du dati, Dagu lon gwe bika a si taki Anansi teki furu meti fu en. Dagu lon, lon, lon, lon. Di a doro wan pisi, a krabu wan olo. Èn di a krabu a olo, a go didon ini a olo. Ma dan a piri en tifi ini a olo.

[p. 9]

Anansi now e waka kon, a breiti fu di a feni a kaw fu a trawan. Anansi e waka nanga a kaw na tapu en skowru. Nomo di a doro na a presi pe Dagu didon ini a gron e piri en tifi, Anansi skreki sote. A piri en ai, a taki: ‘San, san, san, san, san! Gron e piri tifi. Fa mi e go psa?’

Anansi no sabi fa a mu psa. A saka na saka nanga meti. A taki: ‘Yere dyaso, gronmama. Mi e gi yu wan pisi meti, dan mi kan psa?’ A meti fadon gwe ini Dagu mofo bika na Dagu ben piri tifi. (Gronmama bestaat er niet.) Dagu nyan a pisi meti dati. Ai piri tifi ete. Na so Dagu meki a sani nanga Anansi te a puru ala a meti na Anansi anu. Anansi aksi: ‘Mi kan psa?’ Gronmama no e piki.

[p. 10]

Anansi drai baka. A lon go na kownu oso. Dagu no kon nanga wan weri, a opo kmopo ini a oio. A sabi taki a abi ala en meti baka. A gwe.

Anansi doro na Kownu oso. Bam, bam, bam, bam, bam. ‘Kownu, Kownu, kon luku wan sani, kon luku wan sani! Gron e piri tifi!’

Kownu taki: ‘Yongu, kmoto na mi tapu, freipostu pikin boi Anansi.’

Anansi taki: ‘Nono, Kownu, a no leitori. Kownu kon!’

Di Kownu gwe nanga Anansi, Anansi doro a busi pe a ben si taki gron ben piri tifi. A taki: ‘Kownu, na dya mi ben si a sani.’

Kownu ati bron, a taigi Anansi taki: ‘San! Yu puru mi fu soso na mi oso?’

Anansi waka lontu ini a busi, a suku. A no man sori Kownu pe. So dan Kownu meki den srudati fu en kisi Anansi, tyari Anansi gwe go sroto. Na so Dagu kon abi en meti baka. Anansi sidon na straf'oso. A puru bigi-ai nanga fufuru gi Anansi.

[p. 11]