Den lust-hof der Christelycke leeringhe

[p. 7]

[p. 8]

Ghebed der Christelijcke Ionckheyd tot Iesvm Christvm, de eeuvvige vvijsheyd, om den Catechismus vvel te leeren.

Op de wijse:
1. Bienheureux est vne ame.
2. VVel aen springht op van vreughden.
3. Quotquot regni coelestis. soeckt in't tweede deel van desen Lust-hof.
Oft: als vooren pag 7.

GOdt ende mensch te gader,
Iesv des Vaders Woordt,
Schoon levende springh-ader
Der wijsheyd, ons verhoordt:

Komt, komt verlicht

Ons' herten, ende sinnen;

Godts kenniss', ende minnen,

In ons ghenadigh sticht.

⁺Ghy spraeckt: Laet my ghenaecken
Die kleyne kinderen:
Die hen als kinders maecken
En selfs verminderen,

⁺Die sullen gaen

In 'themelrijck verheven:

Dus komen wy ghedreven

Tot u, door u vermaen.

De Christelijcke leere
Komen wy hooren al,
Die men tot uwer eere
Ons hier uyt-legghen sal:

Laet ons die wel

Begrijpen, en t'huys draghen,

Antwoorden, en wel vraghen,

En doen naer u bevel.

+ Marc. 10. 13.

+ Matth. 18. 3.

[p. 9]

 

Ach! sonder u wy dolen,

 

Godts-wijsheyd hoogh-ghe-eert:

 

Noch meester helpt, noch scholen,

 

'tEn zy dat ghy ons leert.

 

Scherpt dan 'tverstandt,

 

Bevestight ons' ghedachten,

 

Al' onser zielen krachten

 

Helpt door uw' onderstandt.

 

 

 

Wilt ons, Heer, tot u trecken;

 

Want niemandt komt tot u,

 

Dan dien ghy wilt verwecken: ⁺

 

Treckt Iesv, treckt ons nu:

 

Ons' ziel verblindt

 

Doet door u straelen open,

 

Datse tot u komt lopen;

 

S'is u bruydt, ende kindt.

 

 

 

Vw' wijsheyd sal niet woonen⁺

 

In een vuyl sondigh hert;

 

Dus wilt ghenade thoonen,

 

Maeckt suyver dat is swert:

 

Och maeckt ons reyn

 

Van sonden en ghebreken;

 

Laet uwen lof uytspreken

 

Ons' mondekens noch kleyn.

 

 

 

Al wat wy hier aenhooren

 

Doet ons onthouden dat:

 

In ons, als uyt-verkooren

 

Vaten, stort uwen schat:

 

En ons dan doet,

 

O waerheydt, wegh, en leven,

 

Tot sulcken wegh begheven

 

Die leydt tot't eeuwigh goet.

+ Ioan. 6. 44.

+ Sap. 1. 4.