Gheestelijcken A. B. C.
Inhoudende de voornaemste leeringhen, die de Christelijcke jonckheyd ter saligheydt van node zijn.
Op de wijse:
Almachtigh Godt u loven wy.
A Enbidt, vreest, en eert eenen Godt,
B emindt hem, en houdt sijn ghebodt,
C ruyst uwen wil, schoudt quaede wercken,
D eughden vergaert, gaet gheern' ter kercken.
E endrachtigh leeft, u seed-baer houdt,
F ielen en quaed gheselschap schoudt,
G hehoorsaem zijt, wilt weynigh spreken,
H ebt schaemte, betert u ghebreken.
I n't eten doet gheen overdaet,
K endt u selven, houdt middel-maet,
L eert goede boecken, en manieren,
M ijdt lieghen, sweeren, slaen, en tieren.
N ijdt, dronckenschap, hoveerdigheyd,
O nkuysheyd vliet en ghierigheyd,
P eyst op den Heer, en die vier lesten,
Q uelt niemandt; keert het quaedt ten besten.
R ekent des avonds u misdaedt,
S ijt ootmoedigh, te biechten gaet,
T racht naer volmaecktheyd, leert wel strijden,
V erduldigh zijt in druck en lijden.
W acht u van achterklap, en twist,
X ristum volght naer, gheen tijdt verquist,
Y delheyd wilt noch doen noch hooren,
Z iel eens verlooren, al verlooren.
| |
Auteursrechtvrij
