Der heeren Staten van Hollandt ende West-Vrieslandt godts-diensticheyt

Ferdinandus Vasquius,
des Conincx van Spaengien Philippi Raedt, int elfde boeck vande vermaerde gheschillen. Cap. 51.

Hier wt besloot ick datmen voor claer, vast ende onghetwijffelt houden moste, dat den machtichsten Coningh van Spaengien ende onsen Heere, oock noch huyden ten daghe moste gheheel ende onverseert bewaert blijven, t'Recht ende de macht van te vergheven alle Eertsbisdommen, Bisdommen, Provens, Digniteyten, Personaten, Rectoorschappen: ende voorts alle beneficien aende Kerckelicke persoonen door gheheel Spaengien, alsoo wel als in voortijden: ende dat dat recht in gheenen deele, door prescriptie, ghewoonte, of eenighe andere maniere of occasie en schijnt verandert, verswackt of vermindert, niet meer dan het te vooren gheweest is, ende hadde moghen wesen, &c. Ende en doet ter saecke niet, dat t'selve Recht, hoe wel het int gebruyck is ende geweest is, soo veel de Aertsbisdommen ende Bis

[p. VI]

dommen, ende sommighe Abdien in Spaengien aengaet, even-wel nu niet volcomelick int ghebruyck en is, soo veel belangt d'andere Digniteyten vande Cathedrale Kercken, ende andere beneficien &c. Want om volcomen kennisse deser sake te hebben, moet dit voor henen ghestelt ende gheseydt worden, dat t'gundt de Coningen van Spaengien hebben int vergheven of nomineren van soodanighe beneficien, niet en is alleen ende simpelick t'Recht van Patronaetschap: noch wt de toelatinghe vant Canonijcke Recht alleen: maer voornamelick wt het Conincklick Recht selve, ende volgens dien wt het Recht der natuere.