Christus patiens

[fol. *viv]

Lectori.

ARgumentum hoc, religionis non dubie caput, iam olim Gregorius Nazianzenus in morem Tragoediae digerere ausus similes aliorum conatus a morosis iudicijs exempli sui auctoritate absolvit: post quem Latino sermone alij idem aggresssi sunt, ita tamen plerique vt post se venturis eandem materiam accuratius tractandi spem non praeciderent. Ad eorum numerum nos postremi accessimus, dum studemus horas ab alijs occupationibus recisas ita poeticis exercitijs permittere, vt Christianis cogitationibus non perirent. Sed dum quaerimus historiam Tragoedia dignissimam in difficillimam simul incidimus. Nam cum omnis narratio quae ex sacris literis depromitur Poëticae inventioni quam minimum indulgeat, tum haec ante caeteras multiplicibus circumstantijs variata est, quas omittere negligentiae, invertere pene impietatis foret. Harum autem nonnullae quam non vltro eum cultum induant quem Tragoedia sibi proprium fecit, mihi quoque, nisi experto, vix crederem. Habuit & hoc molestiae nonnihil quod multa per internuntios repraesentanda fuerunt: neque enim per

[fol. *vijr]

leges Tragoediae licuit, aut capturam Christi miraculis insignem, aut cruce pendentis supplicium in scenam producere: quin & ipsa inquisitio tum Pontificum tum Pilati ante oculos poni, vtpote intus facta, non debuit. Vt autem ipsius Tragoediae dispositionem breviter indicem, ea circuitu suo id tempus amplectitur, quod ab ea noctis parte, qua Christus post coenam foras egressus est, ad vesperam sequentem, quae erat parasceue, interfuit. Locus est partim in ipsae vrbe Hierosolymorum inter templum & praetorium, partim extra vrbem in itinere ad sepulchrum: quod exemplo non caret, vti nec chorus quem duplicem fecimus. Prior constat ex feminis Iudaeis quae Iesum dominum nostrum non pro eo qui erat agnoscebant, sed vitae sanctimonia & miraculis permotae prophetam esse credebant, aut ex veteribus aliquem ad vitam resuscitatum, aut veteribus non minorem. Posterior est custodia militaris. Mutas quoque personas nonnullas inducere oportuit, ne loquentium numerus legitimum modum excederet. Tales sunt apostoli novem, sacerdotes qui cum Caiapha exierant, consilium Pilati & satellites, seniores populi turbae permixti, mulieres Galilaeae & aliae a

[fol. vijv]

cruce redeuntes & mox corpori affusae. Christo autem primas loquendi partes ideo tribuimus, quia sequentia ferme ipso silente transiguntur, neque per alium potuit commodius in ipso initio argumenti maiestas explicari. Rogo te, lector, vt honestum otij, quod sane non superfuit, oblectamentum benigne interpreteris. quod si eius voluptatis quam ego in scribendo cepi tibi pars aliqua in legendo continget, is eventus spes meas vicerit.