Briefwisseling van Hugo Grotius. Deel 13

6019. 1642 december 27. Aan J. de Wicquefort.¹

De touts les discours² que l'on faict du feu cardinal-duc il n'y a aucun qui soit dans la mediocrité. Nous avons veu plusieurs poemes et discours faicts après sa mort à son honneur. Il y en a aussy d'aultre sorte, mais qui ne s'impriment poinct et le mareschal de Bressé,³ s'offençant plus de ce qu'il n'a pas obtenu que luy sçachant du gré de ce qui luy est laissé, parle fort à son desavantage. Un escrivain n'a pas mal rencontré qui a dict qu'à la verité il s'estoit rendu maistre de l'esprit de son roy, mais que par là il a faict le roy le maistre des roys. Le roy ayant appris que les Espagnols s'en rejouissent a dict qu'ils n'auront pas meillieur marché pour cela.

Le roy est souventesfois à son Conseil et les affaires ne vont pas mal jusques à cet heure. Les discours que le cardinal a tenu au roy et, autant qu'on peut apprendre, ses memoires vont à la continuation de la guerre, laquelle sert à la grandeur de sa maison. Et il a dict qu'en la continuant quelque temps on aura la paix telle qu'on voudra. On croit qu'il a faict esperer au roy la revolte des vice-roys des Indes Occidentales, laquelle selon toute apparence seroit suivie de celle de Naples, Sicile, Milan et peut-estre de quelques provinces de l'Espagne. Mais si un si grand abbaissement de l'Espagne, en un temps que la France faict si bien ses affaires, seroit le soubhaict general des princes neutres, à cela il y a à penser.

On met icy bon ordre pour augmenter et bien payer l'armée de monsieur de Guebrian, sur quel subject je vous ay mandé ce que le roy m'avoit dict sur ce que j'avois dit à sa Majesté.

1 Kladafschrift in copieboek Den Haag, ARA, Eerste afd., coll. Hugo de Groot, aanw. 1911 XXIII no. 3, p. 123.

2 Onderstaande berichten komen ook voor in Grotius' brieven dd. 26-27 december 1642 (nos. 6015, 6017 en 6018).

3 Urbain de Maillé, markies van Brezé, die uit de erfenis van zijn zwager Richelieu niet kreeg wat hij zichzelf had toegedacht.

[p. 590]

Cela estant faict, s'il sera à propos que ledict comte se joigne au mareschal Torstenson pour donner un nouveau combat, ou bien qu'ils agissent en divers endroicts, de cela il fault laisser les soings à ceux qui sont sur les lieux.

Nous croyons icy par les advis de Cassel et de Coulogne que Leipsich est aux nostres,⁴ ce qui ouvrira le chemin pour aller plus avant. On parle icy de travailler afin que la Baviere se mette du costé du roy, ce que je ne croy pas que reussisse. On augmente les trouppes de monsieur Erlach et ne doubte-[t]-on plus qu'il ait pris Dutlingen nonobstant le bruict qui a courru au contraire. Les princes du sang ont triumphé icy sur les cardinaux et les precederont au Conseil et à la cour et n'ont besoing d'aller aux eglises où les cardinaux seront et voudroient proceder.

Je seray tousjours, monsieur,

vostre tres humble serviteur.

4 Lennart Torstensson bevestigde met de inname van Leipzig op 6 december eens te meer de stootkracht van het Zweedse leger.

27 Decembre.

On tient que le pape se met plus du costé de l'Espagne que de la France. Le prince de Monaco, monsieur du Halier et d'aultres chefs sont icy. A la cour les uns sont pour la paix, les aultres pour la guerre. Cependant on veult faire l'armée de Catalogne de 20 mille hommes et destine-[t]-on en Italie deux millions pour les levées, quatre pour la campagne. Monsieur le duc de Beaufort est revenu chez luy sans rien dire. Treville et autres capitaines de guardes sont revenus en leurs charges. Quelques-uns disent que le duc Charles est mort, aultres fou, ce que je croy.⁵

5 Hertog Karel IV van Lotharingen, die volgens de Gazette 1642, no. 164, dd. 27 december 1642, druk doende was geld te vorderen van de stad Worms.

Bovenaan de copie staat: Vicquefort.