Briefwisseling van Hugo Grotius. Deel 12

5341. 1641 augustus 31. Aan A. Oxenstierna.¹

Excellentissime et illustrissime domine,

Tarragonae subvenire iterum Hispani tentarunt et terra Leganesius² et mari Ferandinus³ inani, ut audimus, conatu, ita ut ultima fames exspectetur equis in alimenta iam absumtis, restantibus adhuc qui edantur quingentis, ut narrant transfugae. Res ibi videtur spectare ad novum proelium navale.

In Italia Conisium brevi speratur Gallorum fore, quod pulvis bellicus desit. Princeps Thomas munit Volpianum, non longe ab urbe Taurinorum, videturque novam moliri eius urbis obsidionem, in cuius arce quicquid erat bellici pulveris, id incertum unde orto igne conflagravit.

Ad Airam hostis non contentus famem opperiri, etiam operibus rem agit. At Milleraius et Breszaeus⁴ captis oppidis Lentzio et Bassaea, quorum hoc firmum satis et opere et milite deditionem facere coactum est inopia bellici pulveris, ad Lisam eunt amnem, ut a castris hostilibus avertant commeatus, qui ab Insularum urbe advectari solent.

In Hispaniam venit quidem Peruana classis, non item Mexicana, quae nescio quomodo tardata ad Havanam iusto tempore non adfuit. Romae an episcopus Lamegae⁵ recipiendus sit ut regius legatus, etiamnunc consultatur, ut id fiat, Gallis annitentibus, Hispano contra, ut credi par est, nihil non contra movente.

Rex Galliae tum in Lotharingia tum in Barrensi ducatu recepit Barrum, Pontem Mousoni, Sanctum Michaelem, Ligniacum, Gondrecurtium, Novum Castellum, Trenelium, Mirecurtium neque aliud ibi iam duci Carolo⁶ restat, nisi Lamotta, Spinale, Remiremontium, Bicha.

Barcinonensis civitas multa de Gallis queritur, sed sero.

Deum rogo [etc.]

Lutetiae, XXI/XXXI Augusti MDCXLI.

In Conisio esse dicuntur sexcenti Hispani, ducenti Germani, mille ducenti Itali. Cardinalis Hispanus Stegae aegrotare dicitur et augere praesidium urbis Insularum.

1 Copie Dresden, Sächs. Landesbibl., C 61, 42; copie Leipzig, UB, ms. 2633, f. 96. Gedrukt Oxenst. Skrifter 2. afd., IV, p. 153 no. 392.

2 Diego Mexía Felípez de Guzmán, markies van Leganés, Spaans goeverneur van Milaan (no. 4996 n. 15).

3 García de Toledo y Osorio, markies van Villafranca, hertog van Fernandina.

4 Charles de La Porte, hertog van La Meilleraye (no. 5101 n. 7), en Urbain de Maillé, markies van Brezé (no. 5142 n. 16).

5 Dom Miguel de Portugal, bisschop van Lamego (no. 5028 n. 6).

6 Karel IV, hertog van Lotharingen.

Bovenaan de brief in de copie te Leipzig: Argumentum. Tarragonae obsidio. Italica. Belgica. Roma[e] dubia de recipiendo Lusitanico legato. Lotharingia a rege occupata.