Briefwisseling van Hugo Grotius. Deel 11

[p. 182]

4584. 1640 maart 31. Aan J.A. Salvius¹.

Illustrissime domine,

Plurimum Excellentiae vestrae debeo pro iis, quae mihi nuntiat aut nuntiari facit; quae ut semper vestris rebus sint optima, precor.

Viximus hic legatus Polonicus² et ego ea inter nos officiorum vicissitudine, quae conveniebat regnis in pace satis longa positis et ea vicinitate, ut amicitia mutua utrique genti utilis esse possit. Digrediens legatus me rogavit, ut efficerem, si possem, concedi principi Casimiro³ et ipsi literas tuti itineris per Pomeraniam et loca a nostris possessa. Dixi petendum hoc ab Excellentia vestra, quae illis in locis propinqua vicem regni Suedici fungeretur, me et desiderium hoc significandi et commendandi partes obiturum libenter. Rogavit autem, ut princeps Casimirus illis literis non aliter quam princeps Casimirus nominetur; in eo aucupenturne aliquid, quod in rem suam possint interpretari, an vero solius transitus commodum quaeratur, judicio atque arbitratui Excellentiae vestrae relinquo, cui et mea submitto omnia paratus, Illustrissime domine,

semper inservire Excellentiae vestrae
H. Grotius.

1 Gedrukt Epist., p. 608. Antw. op no. 4548. Johan Adler Salvius was Zweeds gezant, residerende te Hamburg.

2 Christophe Corvinus Gasziewski.

3 Jan II Kazimierz; zie ook no. 4571.

Lutetiae, 21/31 Martii 1640.